Read Tarao Naga 1 KORINTHIA 3 Bible Online

1 KORINTHIA 3 - Tarao Naga bible

1 KORINTHIA 3

¹Unaoeio, Li ah aksip mii nanga nankuunga trong cheknoh ang, chuta ruungvaa mii nanga Khrista kuunga naoson nanga keiin trongsang.

²Keiin siilchuh kim iinpeichou, antlang saakphu nanimsaaknoh ang, alamva mairella nannih in inchaang nohchou, che inchaang khonoh mangchou,

³isonnava nannih in pekphah ruunga ammangchou. Alamva nankaar a kallak hangche innah insuul amchou i nannihvah ruungnanoh choume, che apupuh mii nanga ringnoh choume?

⁴Alamva tukhat in, “Keiva Paul amiisang,” aktlei inla, “Keiva Appolos amiisang,” tihsachoule nannihva ruunga am miinoh choume?

⁵Chuleva Appolos tume? Paul tume? Roijuih anpaalla nannih in malot nanphah, Akpu in thlou amsilna nujiuh a.

⁶Keiin klin, Appolos in tuii apoih, chuta Ringpu in amliin.

⁷Chunna aklin amah khanoh tuii akpoih amah khanoh chuta amliin Akpu khaning.

⁸Aklin leh tuii akpoih amahvah intrimmei; miirel in athlou athlou nujuih a kutlangman aphahtu.

⁹Alamva inihvah Ringpu soh thlou aktlohjoume; nannihvah Ringpu alouchou Ringpu ainnchou.

¹⁰Ringpu in keikuunga amlan malungsi nujuih a intloh aktheih akpunanga keiin innmun kithoolpei, che aktleikhat in achunga inn atlohpei. Inn aktlohmii in khatloh a inn kitloh ume cheksilso.

¹¹Jisu Khrista in atholche innmun khanoh a aktlei tukhat in innmunthol cheknoh.

¹²Pekva tukhat in mah innmun i ra — ao ah, harngou ah, amanchaal lunga, akchaar inloua chakpoolla tlohle —

¹³mii khatkhatvaa athloukha seenga ammuhtu, alamva mah khanna amdangtu, alamva mahkha mei in amdangtu, mii in atlohthloukha khakhame tihva mei in chaang a antu.

¹⁴Tukhat in antholche tihva mah innchunga aktloh innta inthrit cheknoh luunga amle, amah in atlohkhaan aphahtu.

¹⁵Tukhat in atlohthlouta kaangleva amaangna veitu, chuta meikaarnata inkal khananga inkaltu.

¹⁶Nannihva Ringpu vaa akseeng thlaamsachou mahche Ringpu ak Li in nankuunga amta romnoh choume?

¹⁷Tukhat in Ringpu mathruunna akseeng thlaamta mamaangleva, amahta Ringpu in ammaangtu. Alamva Ringpu mathruunna thlaamva akseeng mahche thlaamkha nannihchou.

¹⁸Tukhat inkho anroua insimna nohso. Nannih nankaarna tukhat in mah chup inna kei aksingsangta madonle, amah in kmong veiso aksing aveinoh natu.

¹⁹Alamva tukleiramna lousingi Ringpu kuung avah kmong. Alamva mah i nga tloh a injihsa, “Aksing eita anmah antheih ansinga Amah in asuurei.”

²⁰Khatla, “Aksingei in amidon ril akanana amnoh tih a Akpu in arom.”

²¹Churella tukhat inkho miirelna thoinohso. Alamva poot naamte nannih nanta,

²²Paul slakho, nohle Appolos slakho, nohle Keiphas slakho, nohle tukleiram slakho, nohle akthi slakho ipekna slakho nohle vaknuna slakho anaamte nannih nantasa,

²³nannihvah Khrista vaa atasachou; che Khrista in Ringpu vaa atasa.