Read Tarao Naga 1 KORINTHIA 4 Bible Online

1 KORINTHIA 4 - Tarao Naga bible

1 KORINTHIA 4

¹Khrista vaa roijuih mahche Ringpu anthup trongta aksil amrel kannihta kanjah tupotchou.

²Mah chukhopnoh a thlou amrel mii eikha malot aja mii vei tupotei.

³Nannih in keita pichaar keitloh choule, nohle miivaa pichaar nujuih a pichaar keitloh choule, keiningva mahchu jakhat khonoh, kei kitakluungkho pichaar intlohnoh ang.

⁴Kitak in kitak rella romnoh ang, che mah khannakho keita kamchim vanoh. Chuta keita pichaar aktlohva Akpu ning.

⁵Churella Akpu athlengnohmiil, laita aphahnoh maa a pichaar tlohnohve, inthim kaara anthunpeita amah in akvaara athlentuei che miiril suunga inchaanga am jikchakho amdangtu. Mahlai miirel in Ringpu ta mapaak anphahtu.

⁶Unaoeio, tukhat inkho miichunga nan orh noh natu injihnata ralphunoh ta kannih kanpaalla kanrompeita nansonnatu keiin nanchuungnatu kitak talleh Appolos kuunga kamtheihchou.

⁷Alamva tunang in nangta aktleinata namthlin peime? Nidoon chela niphahnoh jaknangta ammangme? Nangin kutthol phahnoh nangjimma jarella in orhmang cheme?

⁸Nannihva sipchou, doonchou! Kannih injaonoh a nannihva kurung veisachou. Kannih in nannihsoh kurung veia paaljou i keiin kikdit.

⁹Alamva achena veia Ringpu in raangroi aknita inimmuhta keiin thinata raitla nanga; ringroileh miitinga tukleipaaltu kumhei annatu inimveipei.

¹⁰Inih in Khrista rella kmongsame, chuta nannihva Khrista tinga singsachou. Inihva marnopme. Chuta kannihta athlangtla naniannuung.

¹¹Pek pungiphah a vontraam tuiiraal kanphahmang, puunrei doonnoh ung,

¹²Kannih in insuullung kankut in tranga thlou kantloh, che kannihta thranoh a kanisaalung ankuunga doi kamilan, kannihta kanichut laia kandou;

¹³Kannihta loonna antronglai anmahta kamineemei; kannihva tukleiramna buurnam nanga veisung. Pekphah kannihva poot anaamtu burnam veisung.

¹⁴Nannihta nanimjaktang ta mah i majihnoh ang, chuta nannihta kirilvol kisanang kikchaakchou.

¹⁵Alamva nannihta Khrista tinga nanichingnatu inteen cheknoh mii doonsachou lakho, nanpa tam amnoh. Alamva akthratrong apaalla Jisu Khrista ninga keiin nanpa veisang.

¹⁶Keiin kamsohchou mah chuvah kei kihoongta keitamve.

¹⁷Mah churella Akpu ninga malot aja kirilvol Timothi ta nankuunga kamthlah, khakla ah keiin kamheih nanga, Khrista ninga kiseh kilonna kihoong kiva pumte amah in nannihta nanimtheihtu.

¹⁸Nannih kuunga thlengnoh usang tihnanga mii arouva thoisachou.

¹⁹Chuta Akpu in amdon veile nankuunga intha thlengtung, anmah akthoi antrongta kijonnatu noh a anmah antuuita jonnatu thlengtung.

²⁰Alamva Ringpu kurung huunnavaa trong khop noh a chuta tuuia,

²¹Nannih in jaknangta nanditme? Keiin sungsoh nohle rilvolsoh inruuia ril inneemsoh thlengtungme?