Read Tarao Naga 1 KORINTHIA 5 Bible Online

1 KORINTHIA 5 - Tarao Naga bible

1 KORINTHIA 5

¹Mah i tak a antongpei mah chuvah nankaar a kumei kupa ah lamchat chimnoh akseh amchouta, oinang kumei kupa ah chimnoh hoonga seh i rappu amthruun ankaar rounakho tuuknohme; alamva mii in apa akmeita paalpia am.

²Nangva kei ningsangta in orhcheme? Inthleng adom nangin sinthruuihnoh ucheme? Tukhat in oinanga chimnohoong aksehkha nankaarnata manomve.

³Alamva kiruungin nankaar ah jaonoh sanglakho, kei kikli inva nannihsoh inruuimang, kei kitak injaoa oinang aktloh mii eita keiin matsah a pichaar kitlohpei ei.

⁴Akpu Jisu Khrista minga nannihsoh kei kikli in Akpu Khrista vaa tuuisoh anchunlai a,

⁵oinang mii anruungta mamaangnatu seitan kuunga malanve chunna amah Akpu Jisu Khrista aknia inkal aphahtu.

⁶Nannih in orhchou i akthra vanoh. Chol steruin alom apumteta amphochek ta romnoh choume?

⁷Nannihva chol injaonoh vei taningchouva akthrachol inpool nanveinoh natu amlui cholta maseengve. Alamva inihva laalna sadamte buhdoonna ah akvei Khrista in inihturel inkatsa.

⁸Churella inih in buhdoonna chol amlui, akthranoh khatkho kochanoh chol jaonoh a akchim khatkho akseeng tolsoh mapaangve.

⁹Chimnoh hoonga kumei kupa nanchunnnoh natu trongthuun nankuunga kimjihchou,

¹⁰Mahchu tukleiramna kumei kupa chimnoh hoonga seh nohle karaam, nohle inruraan, nohle rappu amthruun eisoh inchunnoh natu tihnoh ang, chunangleva tukleiram nata inthurh a sehtu tlasachou.

¹¹Chuta tukhat in keiva Akpu amlot miisang atihche kumei kupa ah chimnoh hoonga seh nohleh karaam, nohle leili mathruun, nohle inkhahkanga trong, tuiibuh inruii, nohle inru inraan mii veimele inchunpinoh veta kamjihpeichou, mainang miita saajou iinjoupinohve.

¹²Alamva apaaltongna mii eita pichaar tlohnatu kei kithlou jangamme?

¹³Khakla suunga ak am mii eita Ringpu in pichaar atloh ei, “Nannih nankaar ah akthranoh mii eita manomve.”