Read Tarao Naga 1 KORINTHIA 6 Bible Online

1 KORINTHIA 6 - Tarao Naga bible

1 KORINTHIA 6

¹Nannih nankaar a tunangkhat in unao khatchunga tlannoh a injanohna amle akseengei kuunga pichaar tlohnatu ankuunga seh angut a akchimlamseh noh ankuunga pichaar naltohnatu seh ah nanthouna thrachoume?

²Akseeng mii in tukleiramta pichaar atlohtu ta romnoh choume? Chuleva iringlai nannih inta tukleiramta pichaar tlohchoule, indih indah trongsuura pichaar tlohnatu matik chanoh choume?

³Ringroi eita inih in pichaar itlohtu ta romnoh choume? Chuleva iringlai aksuuk thlouei i inih in ralla pichaar itlohchektu phunohme?

⁴Chuleva iringlai aksuuk thlouei rella nannih in pichaar nantloh in, khakla avah amuveinoh ta amdon mii eita pichaar nannih in nancharpei.

⁵Nannih in nanjaknatu mah ita kitihchou. Chuleva amah unaota ankaara pichaar akltohchek nankaar a aksingmii inkhatkho amnoh choume?

⁶Mahchu ngut a unao khat in unao khatchunga indenpinatu trongkat seh, mahchu Akpu malotnoh ankuunga seh ei.

⁷Khat in inkhatchunga apaalting trongkat sehchou i, nannih turella khalmo injakna thlou. Akchimnoh miita inih imiining tih a machimma ngathlangsoh ta nansaalche madong janohme?

⁸Chuta nitakva chimnoh mahche miisimna thlouva nantlohche nan uh nannao chunga thranoh thlouvah nantloh.

⁹Akchimlamseh noh mii in Ringpu kurung huunna phahnohtu ta romnoh choume? Nanroua insimnanohve kumeile kumei mahche kupaleh kupa seengseeng chimnoh hoonga seh khatkho rappu rapnaita mathruun, nohle miimei miimasal nohle sa lamchat ah seh, nohle karaam nohle tuiibuh inruii,

¹⁰inru inraan nohle inkhah a trong oinang mii in tikniakho Ringpu kurung huunna phahnoh tuei.

¹¹Nannih mii arouva mainangjim chou, chuta nannihva nanichaampei, nanimchimpei, Akpu Jisu Khrista minga che inih Ringpu akli a nannihva nanimchimpei.

¹²“Kei turelva bilam naamte aiil in ajakir” chuta anaamteva keining akana amnoh, “Bilam naamte kei turelva ajakir” chuta keiva jakhat inkho naichi kamveinohtu.

¹³“Buh in vonpii turelna che vonpii in buh turelna” — che annih a khatkho khatkho Ringpu in ammaangtu. Ruungi kumei kupa chimnoh hoonga huuinatu phunoh, chuta Akpu turelna, mahche Akpuva ruung turelna.

¹⁴Akputa Ringpu in amringpei che inihkho amah atuui in inihta inimtrangpei.

¹⁵Nannih nanruungi Khrista vaa akholsa ta nannih in romnoh choume? Khrista aruungvaa akholta keiin kilohche ahoong thranoh kumei aruung kamveiume? Mah chutalva veinohso.

¹⁶Kochanoh kumeisoh anchun mii in kochanohsoh inkhat veisei ta romnoh choume? Alamva mah i injihsa, “Innihvah ruung inkhat vei ume.”

¹⁷Chuta Akpu soh inkhatveia anchun mii in amahsoh li inkhat veisei.

¹⁸Kumei kupa chimnoh lamchat thranoh thloukha dongve. Mii in alehthlou atloh anaame ruungvaa apaaltonga suuk; chuta thranoh hoonga sehmii in amah aruung saakta jekna a alehthlouta atloh.

¹⁹Nannih nanruungi Ringpu ningnata nanphah, Akseeng thlaam nantaksuunga amta romnoh choume?

²⁰Nannihta Ringpu in nanman teenna nanileipei, chunna nanruung in Ringpu ta paar mathratve.