Read Tarao Naga 1 KORINTHIA 7 Bible Online

1 KORINTHIA 7 - Tarao Naga bible

1 KORINTHIA 7

¹Pek nannih in namijih trongrol kharella: “Kupakhat in kumei khating apaalnoh in thratu.”

²Chuta mairella kumei kupa inlaalna madoi tinga nantlaknoh natu, kuparel in akmei amsoh che kumeirel inkho amsal amsoh.

³Amsal in akmeikuungah changvaangna malanphu malanso; mainanga akmei inkho amsalkuunga changvaangna malanphu amsalkuunga malanso.

⁴Alamva akmei in atak aruungvaa akpunoh, chunanga amah amsaltasa, mahchunanga amsal inkho atak aruungvaa akpunoh; chuta akmeiva amah atasa.

⁵Manjangnuram khat khopnatu injana khanoh a khatleh khat injanoh tlohnohve, ngenna nanril maluutve; chuta nantak nanroua intel nanvaat rella seitan in nanimdoinoh natu inchunve.

⁶Mah i ajanatu veia keiin kisonchou, trongthuun vanoh.

⁷Keiin kiam nanga mii naamtein nanveinatu kamdon. Chuta miirel in Ringpu tingnata amah amahtu kutthol khatkhat am, mii khat in kutthol khat, aktleikhat in aktlei kutthol khat am.

⁸Changvaangnoh ei mahche trulmeinuta kisonchou, mah chuvah keiin kikroua kiam nanga anmahkho am eile thratu.

⁹Chuta anrouva inseelcheknoh eile changvaang eiso. Alamva anruungin anditta thocheknoh eileva changvaangin thloia thra.

¹⁰Changvaangei nankuunga trongthuun kamlanchou, mah i keiin nanimlannoh ang Akpu trongthuun, mah chuvah akmei in amsalta inthrekpinoh so.

¹¹Chuta akmei inta mahle amah in innjongnoh a amso, nohle amsalsoh inja a inchamso, amsal in akmeita madah nohso.

¹²Aktleikuunga keiin kisonchou, Akpu in sonnoh; tukhat unao pasa kupakhat in Akpu malotnoh kumeita akmei maveia ampile, kumei inta amahsoh amjou dile amah in kumeikha madah nohso.

¹³Akpu malotnoh kupa khatta amsal maveia ampile, kupa inta amahsoh amjou dile, kupakha madah nohso.

¹⁴Alamva Akpu malotnoh amsalkha Akpu amlot akmei apaalla amseengpei, che Akpu malotnoh akmeikha amsal apaalla amseengpei. Mah chunohleva nansakha seengnoh vei tuei, chuta pekva anmah akseeng veisei,

¹⁵Chuta Akpu malotnoh miikhanta inthrekpia mahle mahthlangso. Akpu malotnoh kupa nohle kumeikha innjong inkht a amnoh nangsa. Alamva leh oia iamnatu Ringpu in iniong.

¹⁶Akmei eio nang namsalta kikaltu nohle kalnohtung tih i khatloh a niromme? Nohle amsallo, nang nikmeita kikaltu kalnohtung tih khatloh a niromme?

¹⁷Akpu in mii khatkhatta thlou amsilnanga mahche Ringpu in mii khatkhatta aongnanga chingso. Mah i khakla naamteting kamlan trongthuunsa.

¹⁸Tunangta avun antanche aongme? Chuta amah in avun intannohnang hukveinohso. Avun intannoh amaa a tunangta aongme? Chuleva amah in avun intannanga hukveinohso.

¹⁹Avun intan in jakhat khanoh che intannoh in jakhat khonoh, chuta Ringpu vaa trongthuunta amjuihkhata amuvei.

²⁰Mii naamte Ringpu in aonglai talla a amna chaangkhanna amsoh.

²¹Naichi niveilaitalla nak ongme? Mah khanna nang nirilsokna veinohso; chuta nanginta thlaang thlaang phahchek a nichuungna veichekle nangtu nivaithra veiso.

²²Alamva naichi aveilai Akpu in aong miikha Akpu vaa thlaang thlaangta akphah miisa. Mahchunanga thlaang thlaang aphahlai aong miikha Khrista vaa naichi veisa.

²³Nannihta aman teenna nanileipei, chunna nannih in miivaa naichi veinohvesa.

²⁴Chunna unaoeio, mii khatkhatta aonglai talla a amna chaangkhanna mii naamtein Ringpu soh incheknoh a amso.

²⁵Pek changvaangnoh a am mii eita keiin Akpu vaa trongthuunta sonnoh ang, chuta Akpu rilvoltheihta keiin kaphah malot aja mii khat nanga keiin kamdonta kamlanchou.

²⁶Keiin kimdonvah pekpek klah knang iphah i ianlaiva mii khat in a amnatal chaanga an am in thratu kimdon.

²⁷Nangin kumei khat kuunga inkhit a amcheme? Nanlitnatu jonnohro. Nangin kumei khatkuung nata inlit sacheme? Changvaangnatu jonnohro.

²⁸Chuta nangin changvaang chele, aleh tlohnohsache, radaang khat in changvaangle amah in aleh tlohnohsa. Chulata tukhat changvaangin tukleiramma klah knang anphah, che mah chunangi keiva nanimphah dinoh ang.

²⁹Unaoeio, keiin mah i kisonnava akthra kanana lai i khalmo chomsa, peknata mathronna akmei am mii in akmei amnohnanga amso,

³⁰marhuui mii in marhuuinoh nanga ameiso, roomthok mii in roomthoknoh nanga ameiso, che pootchei aklei mii in doonnoh nanga am eiso.

³¹Tukleiramta ak huuina anmah in chimnoh a huuinanoh eiso; alamva tukleiram ahoongva maang umang.

³²Nannih in nanril inhal inhil tlohnoh a nan am kikdit. Changvaangnoh kupa in Akpu thlouta kantloh a amahta kampel umeta kirilla inchoiang.

³³Chuta changvaang kupa invah amah akmeita khatloh a kampe umeta tukleiramtu veia pootchei rella aril inchoisa,

³⁴che amah in akdit arilkho inthrek baak veimele che changvaangche kumeileh akseeng rungaakho anthliinna am. Changvaangnoh kumei in ruunga mahche li ah kseeng aveinatu amah in khatloh a Akputa kampel umeta amdon, Chuta changvaangche kumei invah amsalta khatloh a kampel umeta tukleiram thlou rella inchoi.

³⁵Nannih in nanchuungna aveina turel mah i keiin kisonchou, keiin nannihta nanivattang tihrella mah i sonnoh ang, chuta nannih in alam thra chimma nanpornau mahche nanril inthrek baak amnoh a Akpu routloh nanveinatu kisonchou.

³⁶Tukhat in trong amromche amah in chimma seh nohle amah in amdon nujuih a veiso, che sehso; anmah in changvaang eiso mah i alehnoh.

³⁷Chuta tukhat in changvaangnoh slakho aja tih a che amah in amdonta ngirra chetkanga amle, mahche amah arilvolta seenga sihnatu aril ata ngirle, amah in akthra thlouta atloh.

³⁸Chunna amah aringvolta akmei veia aklou mii khankho akthra thlou atlohpei, chuta changvaang andah amah inkho ralla akthra atlohpei.

³⁹Amsal in aringsootva akmei in amsalkuunga inkhit a am; chuta amsalta thile aningtamma amah in amdon nujuih a innjong ajapei, Akpu malot mii veitu tla.

⁴⁰Chuta kei pichaarva amah inta inn paalnoh a amle amah turelva ralla roomthokna veitu. Ringpu in kikuunga amta kimdon.