Read Tarao Naga 1 KORINTHIA 9 Bible Online

1 KORINTHIA 9 - Tarao Naga bible

1 KORINTHIA 9

¹Keiva kiningtammii noh angme? Keiva raangroi inkhatnoh angme? Keiin inihvaa Akpu Jisu Khrista ta kmuhnoh peime? Nannihva keisoh Akpu kuunga thloutlohjou miinohmeme?

²Aktlei mii in keita nangva raangroi noh cheta madon aja, tak a nankuunga keiva raangroi inkhatsng, alamva raangroi kiveina chuumva Akpu kuunga nannihkho veisachou.

³Keita minna keisui keijon ankuung avah mah i kitakta kanngaakna.

⁴Saak iin relna inih in itlohtuphu amnohme?

⁵Aktlei raangroiei, Akpu vaa unaoeio, mahche Keiphas nanga amlot kumeita miisoh inruuijou thoknohme?

⁶Nohleh ringnatu thlou aktloh miiva Barnabas leh keikhop ningsungme?

⁷Tunang in atak alanai inbaobeh ah raalmiithlou atlohme? Ngangli thakbil itlohche akrah aksaanoh tu amme? Sadamloom iselche sadamchuh ak iinnohtu amme?

⁸Mah i akchek amneh antronga keiin kisonme? Trongsuur in maisoh intrimma sonnohme?

⁹Alamva mah i Moses trongsuur ah injih a am, “Siilchal in chi akchilhlai nangin amuur khitnoh tupotche.” Ringpu in Siilchal relna amdonnohme?

¹⁰Mah naamte i inihta inisonna nohme? Mah i inih turelna injihsa, alamva loukhoi mii in amtuursoh inruuia akhoi, mahche akrah aksir in akrah kiluhtuta matuursoh inruuia asirh.

¹¹Kannih in nankaar a litu vei chi kanvorhche nankuungnata achuungnatu vei akrah phahmele, mahchu aralmal peime?

¹²Nannih in nandoonta aktlei mii in kannihkho mah i phahphomthok ta nanisonle, kannih in oirella jarella nanisonnoh tu ungme? Oichunga inih in akchim tlohphomsuuk amnohme? Chulata mainang akchim tlohphomsuuk inih in huuinanohme, chuta Jisu Khrista vaa akthratrongta raanna kanpektu ngut a kannih in bilamma kannoolchou.

¹³Mathruunna thlaamma routloh ei in mathruunna thlaamma anthlenta saa iinna ringei tih i romnoh choume? Mahche thiilkuunga routloh ei in chuum anjajou nohme?

¹⁴Mahchunanga akthra trongraan mii in Akthra Trong anraan nujuih a ringtuei tih a Ringpu in trongthuun amlanpei.

¹⁵Chuta keiva mainang tlohphomsuuk jikcha i huuinanoh ang, nohle mainanga nannih in kikuunga nantlohnatu mah i majihnoh ang. Keiin kin orhnakha tunangkhat in jakhatnohluung maveileva, kei turelva kithih in ralla kichuunga veitu.

¹⁶Alamva keiin akthratrongta raan angle, keitu kithoina amnoh. Alamva mahkha tlohnoh janoh thlouta keikuunga kampuih ang. Keiin akthratrongta raannoh angle keitu klahna veisa!

¹⁷Alamva keiinta tlohtangta kimdon khanna tloh angle keitu kitlohkhaan am; chuta keiinta tlohtangta kimdon khanna tlohnoh angle akthra trongta raannatu kikuunga thloukha kamsilpeiang.

¹⁸Chuleva, keiin kitloh khaankha khasame? Kitak in akthratrongta raannatu tlohphom suukta huuinanoh a, akthratrong kiraankha kitlohkhaan lounoh a kiraan.

¹⁹Alamva keiin mii naamte nata thlaang thlaang phah sanglakho kichek makhei mii naamteta Khrista kuunga thlennatu kitak in naichi veisang.

²⁰Judi eita kithlen cheknatu keiin anmah kuunga Judi nanga veisang; trongsuur thlanga ak am eita thlen kicheknatu keiin anmah kuunga trongsuur thlanga amnang veisang.

²¹Trongsuur athlanga ak amnoh eita thlen kicheknatu keiin trongsuur thlanga amnohnang veisang. Chuta Ringpu vaa trongsuur jaonoh a am vanoh ang. Khrista vaa trongsuur athlanga ammang.

²²Marnop eita thlen kicheknatu keiin marnop ankuunga marnopnang veisang. Upai tloh a mii arouta kal kicheknatu mii naamte ankuunga keiin anmahnang veisang.

²³Keiin mah anaamte i akthratrong rella kitloh, mah chuvah doi naamte khanna chuum iphahjounatu.

²⁴Aktlaan mii naamtein tlaan insinei, chuta mii khatru in khaan aphahning ta nannih in romnoh choume?

²⁵Akleeng rel in bilam aksuul. Maang makhei in bilam aksuul. Maang aja boorpiita anphahnatu insuulei, chuta inihva maang janoh boorpiita phahnatu insuulme.

²⁶Thrasa, keiin kamsinna amnoh avah sulla tlaannoh ang, marvaanting apupuh chumnanga keiin chumnoh ang;

²⁷chuta aktleitinga trong kiraanche kei kiruungta kikutthlanga kisih.