Read Tarao Naga 2 KORINTHIA 1 Bible Online

2 KORINTHIA 1 - Tarao Naga bible

2 KORINTHIA 1

¹Ringpu in amdon nujuih a Khrista Jisu vaa raangroi Paul, mahche inih unao Timothi in korinthia ah am Ringpu vaa khakla, inruuia Akhaia apumte ah am akseeng anaamteta.

²Inih Pa Ringpu mahche Akpu Jisu Khrista tingna malungsi che leh oi nankuunga am veiso.

³Inih Akpu Jisu Khrista vaa Apakho Ringpu kho vei, rilvoltheihvaa Pa che anaamteta akboh Pa Ringpu tingnata doiphah veirei.

⁴Inih ilah isam anaamteta inibohkhanna inih inkho bilam klah knang akphah eita boh icheknatu Ringpu in inih itak ah ilah isamna jikcha ah inibohpei.

⁵Alamva inihrella Khrista in huuitanga klah knang adounanga, Khrista apaalla inihkho huuitanga inibohpei.

⁶Inih in klah knang iphahlaia, amah inta nannihta nanibohleh mahchu chaanring turelnasa, che inihta inibohkha inihta inimthlanna turelna. Mah chuvah kannih in kanphah klah knangsoh intrimma nannih inkho doutranga nanphahkha nanrompei.

⁷Nannih turella kannih in kamituurva incheknoh, alamva kannih in kanlah kansamma chuum nanjajou nanga, kannih in kanbohna akho chuum nanjajou tuta kanrom.

⁸Alamva unaoeio, Asia ah itakchunga klah knang suukrella nannih in jakhatkho nanromnoh i dinoh ung alamva tlohkhal icheknoh tupot khem phah a che ikpuih checknoh tupot phah a klah knang inimphah achunna inih in ichek umangta madonkho madonnohsame.

⁹Jarelna, thihnatu tandi aklu inih in iphahpei; chuta itak ikrouin imdonna ah matuurnoh a thinata amring Ringpu ta imlotnatu.

¹⁰Thihna phah a thranoh suuksamta amah in inikalpei, chekho amah in inikal umang; veikhatlakho inikal umangta amahkuunga kamituurmang.

¹¹Nannih inkho ngenna kanimjoom umangchou chunna mii jikcha in anngenta masanga, inikuunga inimlan doih rella miitam in inih ingut a amipaaktu.

¹²Alamva inih in in orhnava, chim chimnoh romna sakhi i inih in Ringpu tingna akseengin mahche iril seenga tukleiramma tlohkhalla iam isa, che inih in ralthloiakho itloh i inihtingna lousingnoh a chuta Ringpu vaa malungsia mahche nannihtingna akthrahoonga sehsung.

¹³Alamva kannih in nankuunga jakhatkho majihnoh ung chuta nannih in akpaa leh nanromchekna tukhopning; nannih in thratea nanromtuta keiin kamtuur.

¹⁴Nannih in steva nanrompei kannih rella in orchou mah chuvah Akpu Jisu aknichunna nannihrel kannikho in orh kanchek usa.

¹⁵Alamva oirella keiva inlitnohtung ta nankuunga matsah a kithlengja luungsa, chunna nannih in saruk innih nanril peltu;

¹⁶Mesidonia ah kisehlai nannihta kphahja hangchou che Mesidonia nata nankuunga inlenga Judia namisehtung ta kamdon.

¹⁷Maita tlohtang kitihlai keita kamdonve. Keiin kamchaang anaamte tukleiramna mii in amchaang peime?

¹⁸Ringpu vah ataktak a malot aja taningva, nankuunga kantrongi oi nohleh ah ta isonnatu amnoh.

¹⁹Alamva kannih in mah chuvah Silvanas leh Timothi mahche keiin Ringpu Asa kupa Jisu Khrista rella nankaar a akthratrongta kanraankha oi nohle a atih a isonna amnoh, chuta amahningva lai amrel oi ning.

²⁰Alamva Ringpu atrongchet naamteva amahningvah oi ning. Mairella amah apaalla Ringpu paarthratnatu ison. Amen.

²¹Chuta Khrista tinga kannih leh nannihta akseem akliinni Ringpu sa, mahche thlou tlohnatu inihta inimsilpei;

²²itakchunga amah chumta ininampei mahche irilsuunga amah ita trongchet veia inisihpei.

²³Nannihta malahnoh natu keiin Korinthia ah thlengnoh angta kei kichunga Ringpu in sakhi aveinatu kiong.

²⁴Namilot khata phlaak huuinatu thlou itlohjou, alamva namilotna khanna ngat a nanngirhnatu.