Read Tarao Naga 2 KORINTHIA 10 Bible Online

2 KORINTHIA 10 - Tarao Naga bible

2 KORINTHIA 10

¹Khrista vaa ariltap mahche aril inneem apaalla Paul kitaksaak in klukanga kisonchou, keiin nannihsoh kiamjoulai inruruh ang, chuta kiamnoh laikho nankuunga kiril am!

²Keiin kisonchou mah chuvah keiin kithleng laia keita tukleiramvaa ahoong amvaata amjuihpeita keichingna mii steta janoh a mamuhnatu kiril kamtrangkha kitlohnohnatu.

³Alamva inih in tukleiramma ring melakho inih in tukleiramna ahoong nujuih a raal tlohnohme,

⁴alamva inih in raal itlohna raal kutlaiva tukleiram tanoh chuta raalpal mamaangnatu akseeng ringramtingna atuui am.

⁵Trong inkharh mahche Ringpu khiialta romnoh natu akvaat akthoinaamte inih in immaang, mahche mii in amidon ril naamteta suura Khrista atrong amijuihnatu amahkuunga ithlen.

⁶Nannih in atrongson namijuih i mapung aphalaia, atrongson amjuihnoh mii naamteta tandi malannatu imchaang.

⁷Nannih nimit amaa ah jangamme anve. Tukhat in keiva Khrista atasangta aril seengleva amah in keiva Khrista vaa atasang ta amso.

⁸Nannihta mamaangnoh a aseemnatu Akpu in nannih turel aktloh akhal keita kamveirella ste thoi sanglakho, keiin kanjaknatu amnoh.

⁹Kei trongjihthuun khanna nannihta nanimthrit tanoh ang.

¹⁰Alamva anmah in anson, “Amah trongthuunvah kirik che trang, chuta amah aruungin a amlaiva marnop mahche atrong avaa jangkhat veinoh.”

¹¹Oinang miiva bahab tlaeiso mah chuvah iamnohlai inih trongjihthuun in kha asonme, iamlaikho mahkhata itlohning.

¹²Antak anroua inpaakmii eisoh ipai imveinatu nohle malaknatu ichek amnoh. Chuta anroua khatkhat a chaang in olla mahche anmahseengta antak anroua inlaak eivah romnoh ei.

¹³Chuta achaangkhat nata maraldoia kannihva thoinoh tu ung, chuta Ringpu in kanimlanna achaangsoh intrimma thoi uningung nannihkho naniphahnatu.

¹⁴Alamva kannih in kanroua raldoia sehnoh ung, kannih in nankuunga naniphahnoh sunglakho, Khrista vaa akthra trongsoh inruuia matsah a nankuunga thlengsung.

¹⁵Aktleimiivaa anthloukhanna kannih in mah achaangnata maralla thoinoh ung; chuta kannih in kamituurva nannih in namilotkha ahanral in nankaar a kanthlou khalmo ahanral,

¹⁶chunna nanramnata ralla ak am anmahtingkho akthratrong kanraannatu, aktlei ram akho kanraannatu che thlou kantloh relnava kanthoinoh natu.

¹⁷“Tunangkhat akthloimiiva, Akpu turel thoisoh.”

¹⁸Alamva atak anroua inpaakmii khanoh chuta Akpu in ampaakmii veia routlohso.