Read Tarao Naga 2 KORINTHIA 3 Bible Online

2 KORINTHIA 3 - Tarao Naga bible

2 KORINTHIA 3

¹Veikhat itak ikrouta inpaak imthronpeime? Chunoleh arouin antlohnanga nannihtingna slakho mapaakna trongjihthuun inih in darkaarmangme?

²Nannih nantak nanrilla injihkhata mii naamtein paa a anromnatu nannihva kannihtu trongjihthuun sachou;

³Nannihva kannih in kamithlah Khrista tingna trongjihthuun sungta namimuhpei, muk ah injih veinoh a chuta akring Ringpu vaa Li a injih sachou, lung inpepchunga injih veinoh a chuta malungchunga injih sachou.

⁴Khrista apaalla Akpu ta tak a malot i inih itak ah amme,

⁵bilam inih tingnata veiche thlengta isonnatu imtik amnoh; inihtu akchekva Ringpu tingnaning,

⁶amah in inihta akthar trongirhnavaa amtik am khatkho inihta rou aktlohmii inimveipei, mah i anjih nanoh chuta Lina; alamva anjih invah athat, chuta Li in chaan inimlan.

⁷Ipek akthivaa routlohta, lungchunga anvil trongjihthuun veileva injih a thloiral paarthra thlengsa, mah chuvah matsah avah vaarnoh slakho ameel antleta Israel in ancheknoh eileva,

⁸Li vaa routlohkha jikcha liinthloia paarthra ume?

⁹Alamva maraal malanna routloh khata thloiral paarthra amleva, akchimlamseh routlohna in jikcha thloiral paarthra vei ume.

¹⁰Tak a amaana paarhtra akvaarkha chesa ipek mahkhachung akvaar paarthrakha thlengsa.

¹¹Alamva anthamche khanna paarthra veia thlengle, thlunglin akveikhava jikcha ralla paarthra ume.

¹²Inih in oinang matuurta iamrella rilthokna khalmo thrame,

¹³intham paarthrava Israel in mah khanna an amnohnatu Moses in amaipuun ajaar khanangnoh.

¹⁴Chuta anmah anrilta amtrongpei, alamva mi in phah a, anmah in amlui trongirhna ah anpaallai, puun injaarkha inlounoh a am, alamva Khrista apaalla mah i inlousa.

¹⁵Oi, mi in phah Moses vaa trongsuurta anpaarel injaarpuun in kanikhalta anrilla amidon.

¹⁶Chuta mii khat in Akpu ting inheileva injaar puunkha inlousa.

¹⁷Akpu vah Li, Akpu vaa Li amna ah ningtamna am.

¹⁸Inih inaamte imai ah puun injaarnohsa, inruuia Akpu vaa paarthrata ian, mahchunanga ankaang thaak khatnata paarthravaa ankaang thaaktinga inithlentu; alamva mah i Akpu tingnata akthleng amah ak Lisa.