Read Tarao Naga 2 KORINTHIA 7 Bible Online

2 KORINTHIA 7 - Tarao Naga bible

2 KORINTHIA 7

¹Kirilvol eio, trongchet iphah peitaningva akbuur khatkho thranoh linata ikrouva inseengrei. Ringpu ta trih a akseengta mapung maphareio.

²Nanril kannihting mahoongve, tukhat tingkho chimnoh tlohnoh ung, tukhat tingkho akbuurthlou tlohnoh ung, kanchuungnatu tancha tukhat tingkho lounoh ung.

³Keiin nannihta nanimlaal tangta sonnoh ang, alamva thijou mahche ringjounatu nannihta kanrilla amta matnsah a kasonpeichou.

⁴Keiin nannihta khalmo kamlotna am, keiin nankuunga thoisang, kei kitakva inboh in sipsang. Ilah inangna anaamte ah thloiralla kiroomthoksang.

⁵Alamva kannih in Mesidonia ah kanthlenglai kanruungin inngaiva phanoh chuta apaaltingna insuuk inhal mahche asuungtinga intritnava am.

⁶Chuta amidonkoi anmahta akboh Ringpu in Titas athlenginkho kaniboh ung.

⁷Amah in thlengkhop noh a chuta nankuunga naniboh nanga kannihkho kaniboh ung, marhuuia nanlah nannang, keirella nanril luutkha kanisonpei, chunna keiin ralla kroomthoksang.

⁸Kei trongjihthuun in nanril malah slakho, keiin insiirnoh ang (insiir sanglakho) keiin kiromva trongjihthuun khanna nannihta kakva nanril amlahpei.

⁹Mainanga nannih nanril alahrella kroomthoknoh ang, chuta nanril alah khanna nanrilta nanthlengpei tihrelna kroomthoksang; alamva nanlah i Ringpu turella lahsachou, chunna kannihrel alamveia nanlah nansamkha amaangna amnoh.

¹⁰Alamva Ringpu tuveia klah knangin inih chaanringting iniseh pinatu ril inithleng che insiirna inimsuuknoh, chuta tukleiramtu veia klah knangin antakta thi amsuuk,

¹¹alamva anve, jaknang ngaaklipnoh in Ringpu tu vei klah knang nankuunga amthruhpeime, malunghaangna jikchain, intritna jikchain, madonna jikchain, rilluutna jikchain, tandi jikcha innahme nohle jaknang ngaaklipnoh thlouin nanrouva inseng sachoume! Alamva anaamte rellavah kansoi amnohta namidang.

¹²Nga tloh a keiin nankuunga majih sanglakho, mahkha chimnoh aktloh mii khat relna noh, nohleh chimnoh a alah anangrelna khonoh, chuta kannihturel nanrilluut a nantloh nankhaljahang amsuuknatu Ringpu akuunga nannihta kammuhnachou.

¹³Alamchunna inihkho inibohpei. Mahche itakrou dil mathlannata ralla Taitas phlaak huui khanna inih in ralla iroomthoksa, alamva nannih nannaam in amah arilta inngai namiphahpei.

¹⁴Alamva nannih rella keiin kithoinata amahkuunga son sangleva, keita injak kamphahknoh; chuta bilam anaamte nankuunga kansonkha chim, chunna Taitas amaikuunga kanthoinakha chimta kanloh.

¹⁵Amah in asonta namijuih rella nankuunga sehsa, amah atrongson aktheih nannaamte in roomthok a nanlouloh rella nankuunga aril ralla am.

¹⁶Keiin kroomthok, alamva nankuunga kamlotnava mapungpha.