Read Tarao Naga KALATIA 1 Bible Online

KALATIA 1 - Tarao Naga bible

KALATIA 1

¹Raangroi Paul in mii tingnata veinoh a miivaa anpaal akho veinoh a Jisu Khrista vaa apaalla che thinata amring amahta Pa Ringpu vaa apaalla —

²mahche keisoh inruuijou unao anaam in, Kalatia ah am khakla ankuunga:

³Pa Ringpu mahche inih Akpu Jisu Khrista tingna malungsi khatkho leh — oita nantak ah am veiso,

⁴inih Ringpu mahche Pa vaa amdon nujuih a ipek thranoh juk innata inikalnatu inih ileh rella ataktalta amlanpei;

⁵amahkuunga ache amnoh a paarthrachu veiso. Amen.

⁶Keivah salungkhousang mah chuvah Khrista vaa malungsi ah naniong amahta mah a inthliin aktlei akthratrong tingah khalmo intha a nanhei rella —

⁷onna aktlei inthlin akthratrong amnoh, chuta mii ste in nannihta nanimlah a mahche Khrista vaa akthratrongta chimnoh nanimvei aja.

⁸Chuta kannih in nankuunga kanraanche akthra trongnata inthlenga aktlei akthratrong khat kantakluung inkho nohle ringramtingna ringroi inkhat inta raanleva phool tlungtu.

⁹Kannih in matsah a nankuunga kansonche khananga, pekkho veikhatla nankuunga kansonchou, mah chuvah nannih in nanphahche akthratrong khata nankuungah akraan amleva, amah in phool phahso.

¹⁰Ipek mii in anjaata nohle Ringpu in ajaata keiin kijonme? Chunohle mii mapelna tuta keiin insuul sangme? Miita keiin mapel sangleva; keiin Khrista aroijuih veinoh utang.

¹¹Alamva unaoeio, keiin kiraan akthratrongkha miitanoh tihrella kairomjachou.

¹²Alamva mah i mii kuungnata phahnoh ung, nohle keitingnata kamtheihpot khonohchou, chuta mah i Jisu Khrista in aphoongkhata thleng.

¹³Alamva matsah a Judiei heikoh ah kiamlaina kei chaankha nantheihpei, keiin Ringpu vaa khakla ta khalmo lahna thlouva kikchut che mahchuta mamaangnatu kiksuul;

¹⁴che kei kimiiei ankaara keisoh kintrimpi anmah aktamva Judiei heikoh ah matsah veisung, ipa ipuin annonoa anroutlothlou akhanna khalmo kirilta kailuut.

¹⁵Chuta keiin kipoknoh maanata keita kamjepeiang, che amahvaa malungsi apaalla keita keiongpei,

¹⁶amahta Jental ankaara keiin kiraannatu Asa kupata keikuunga aphoongin pelsa, ruung leh thiisoh ring miisoh keiin intelpinoh ang,

¹⁷kei kimaa a raangroi akvei ankuungakho Jerusalem phah a sehnoh ang, chuta keiin Arab ah seh ang; mahchuche veikhatla Damaskas ah inlengsang.

¹⁸Mahche kumthum aknua Keiphas inrompinatu Jerusalem a hangsang, che amahsoh nijan somlei ranga amjousung.

¹⁹Chuta Akpu vaa anao Jems noh a aktlei raangroi tukhatkho muhnoh angei.

²⁰(Keiin pek nankuunga kimjih irella Ringpu maikuunga keiin kimah in thinoh ang!)

²¹Cheva keiin Siria leh Sisilia aveella sehsang.

²²Khrista ningah am Judi vaa khakla eiin keita kisak keirom nohsei;

²³chuta keirella anmah in nga tloh a antheihva, “Laikhat ah inihta mamaangnatu inichut ansuul amah in amlotpeia pekva araanpei.”

²⁴Cheva anmah in keirella Ringpu ta paar amithratpei.