Read Tarao Naga EPHESIA 1 Bible Online

EPHESIA 1 - Tarao Naga bible

EPHESIA 1

¹Ringpu in amdon nujuih a Khrista Jisu vaa raangroi Paul in Ephesia ah am akseeng ankuungah mahche Jisu Khrista ting malot aja ankuungah:

²Pa Ringpu mahche Jisu Khrsista vaa malungsi leh leh oi nankuungah am veiso.

³Inih Akpu Jisu Khrista vaa Apa Ringpu ta mapaakrei, ringram amun jikchana Li akvei doisoh inruuia Khrista ningna doi inimlanpei,

⁴tukleiram aseemnoh maanata inihta amah in inicharpei, alamva inih in amah amaikuungah kseenga che akbuur itak ah amnohnatu.

⁵Jisu Khrista apaalla, matsah a amah in inihta inirilvol, amdon nujuih a,

⁶mii machaaltheih amah in khangvaalla amahvaa paarthra malungsi inimlan rella amahta mapaakrei.

⁷Amah in adoon malungsi nujuih a, amah athii apaalla inithlokpei inih in ichimnohta in ip iphahpei.

⁸Amah malungsi leh alousing huuitanga itakchungah inimlanpei.

⁹Khrista kuungah iamnachaang nujuih a inihkuunga lousing naamte mahche amdon anthup trongta inimrompei.

¹⁰Laichu atlunglai ringramma mahche thaleiah am bilam naamte amah kuungah khalek veia amchunnatu amchaangpei.

¹¹Amah in miita akchaaknatu amdon nujuih a tlohtangta amdonthlou anaamteta mathlung achek.

¹²Khrista tingah matsah matuura inih in amah paarthrata impaaknatu matsah machaanga inicharpei.

¹³Amah kuungah nannih inkho akchimtrong, chaanringvaa akthratrongta nantheih, che amahta namilot, trongchetvaa akseeng Li in nannihta chum naninampei,

¹⁴Inih in iphahtuphuta inijapei mahchuvah inih in ita veia iphahnohmiil amah paarhtrata mapaakrei.

¹⁵Alamvah mairella nannih in Akpu Jisu ta namilot mahche akseeng mii eita nanrilvol i keiinkho kitheih,

¹⁶nannih turella keiin mapaak inngainoh ang, keiin kingenrel nannihta intheih ang,

¹⁷mahchuvah inih Akpu Jisu Khrista vaa Ringpu, paarthravaa Apa in lousingvaa Li mahche amah khiialta madangnatu nankuunga nanimlan,

¹⁸nannih naril mitta nanimvaarpei, mahchuvah amah in naniongna matuurchu jangmeta nanromtu, mahche akseeng miiei tingnata amah in aphahtuphu doonkhaalvaa paarthrachu jangme,

¹⁹che amahta amlot miikuungah am amah atuui i jikcha phah olcheknoh a liinme, mah i amah in akchek amnehvaa thlou nujuih a suuk.

²⁰Amah in Khrista ta thinata amringpei che ringramma akchangtonga amboklai thloukha mapung amphapei.

²¹Marvaan pumte chungah akpaal, akchek amneh tuui am mahche akpu akvei anchungakho paal mahche pekna chup ikhopnoh a athlengsam chup akho ming inpe annaamte chungah ralla akliin;

²²mahche anaamteta akeh majathuia asihpei, mahche khakla turella anaamte chungah akang amveipei;

²³khakla khavah amah aruung, amahtu aksipkeng khatkho bilam apumtea sip.