Read Tarao Naga EPHESIA 4 Bible Online

EPHESIA 4 - Tarao Naga bible

EPHESIA 4

¹Alamchunna Akpu rella simma am keiin, nannihta naniongna nujuih a naniongna khanna nannih nanchaankha matikcha veia nansehnatu kinoolchou.

²Inruruh mahche ril tap apumtesoh, doutrangsoh inruuia khatleh khat ril involla,

³leh oi ah inkhit a lia ril inchunna sehnatu tlohve.

⁴Nannihta nanionglai matuur khat ruungkhat mahche Li inkhat am,

⁵Akpu khat, malot khat, inlup khat,

⁶Ringpu khat che anaamtetu Ipa ipukho vei, amahvah anaamte chunga, anaamte tanga anaamte kaara am.

⁷Chuta Khrista vaa kutthol achaang nujuih a inih khat khatting malungsita inimlanpei.

⁸Alamchunna maita asonpei, “Amah in achungah inkaanga akallai, asuur ruuleita chinga asehpipei, mahche miikuungah kutthol amlannei.”

⁹(“Amah in achungah kalsa” mah i arthavah, amah in thaleina tukleiril akho trumtu tih a asonnanohme?

¹⁰Achungnata aktrum amahvah poot naamteta amsipnatu ringraam apumte achungtingah kalkho amahning)

¹¹Che amah akuttholta mii aroutingah raangroi amveinatu, aroutingah ringraan amveinatu, aroutingah akraanseh amveinatu, aroutingah sadamkem amveinatu, mahche aroutingah lulok amveinatu amlanei,

¹²routloh a thlou tlohna turella akseeng mii eita anvaat anpaa ah masipnatu, Khrista aruung seemnatu.

¹³Mah i inih inaamtein malot a mahche Ringpu Asa kupata romma innkha inphahnoh miil, amahta akromma kiminmii veia Khrista vaa aksip mapungpha olna chaang aveinohmiil.

¹⁴Chunna tuiibuun in khatkho malot rella matheihna thli in raanna phurhtlam khatkho mii masimnatheih, trongtlam mahche amahnoh leemna trongin andihnao nanga veinohve.

¹⁵Mahchu ngut a akchimta dia trongah, bilammah akang akvei Khrista kuungah inih in liin tupotme.

¹⁶Amah kuungah ruung apumte khipta injomkir, che inthruikir, amah in amjonnarel injomkir, che amah in thlou amtlohta, thra a atlohlai aruungkha hukliinsa, rilvol apaalla akroua inseemsa.

¹⁷Mah i pek keiin romma Akpu ningah sakhi kimlanchou, mah chuvah Jental eiin akanana amnoh a amidon rilta antloh ankhalnanga nannih inkho ringnohve;

¹⁸anmah in anromna rilkha inthimma, anmahvah aktrangril che anmah in anromnoh rella Ringpu in amlan chaan khananga anmah in inhea seh ei.

¹⁹Anmah in anril amitrangpei, kochanoh che akbuur thloutloh a karaamesi che kochanoh thloukha anroua inpesei.

²⁰Nannih invah mainanga Khrista ta romnohsachou!

²¹Nannih inta amahrella oinanga routheih chouleva che Jisu ningah akchim amiita nankuungah nanimtheih eileva,

²²nannih in matsah nanringna tukleiramtu veimii masimna kiditrang, athlou chimnoh, thranoh nanhoong nanlakha mathlahve,

²³mahche nannih nanrilna likha matharve,

²⁴che akseeng akchimlamseh khatkho akseeng Ringpu tingna ahoongah aseempot akthar miita nannih in silhve.

²⁵Alamchunna chimnoh trong mathlahve, mii naamte in anthringpi miisoh akchimma trongve, alamva inih khatleh khat akhol khatningme.

²⁶Namilung inhaang slakho alehva tlohnohve, namilung anhaanglai kini mathlaknohve.

²⁷Khousaar kuungah reipakthra malannohve.

²⁸Inrumii in veikhat inlenga inrunohso, chuta mahchu ngut a amah akut in thloutloh a, huuinoh khalnoh mii eita amah in malan acheknatu thlou tranga tlohso.

²⁹Nannarnata thranoh trong inthruhnohso, chuta arungai mii ankuungah rilvolna aveinatu rilvol nujuih a nantrongna trongkhanna miita seemna veiso.

³⁰Ringpu vaa Li Akseengta malahnohve, nanithloksam aknikha phah a nannihta chum naninampei.

³¹Ril inkhahkang, trihkhop a malunghaang, ril inhaang, derderta ong, mii loonna trong inruuia thranoh naammte nankuungnata inthruh veiso.

³²Khatleh khat ril involve, ril inneem veive, Khrista apaalla Ringpu inkho nannih nanlehta a ip khananga khatleh khat in ipve.