Read Tarao Naga EPHESIA 6 Bible Online

EPHESIA 6 - Tarao Naga bible

EPHESIA 6

¹Naoeio, Akpu ta anna nannu nanpa in ansonta majuihve; alamva mah i akchim.

²“Nannu nanpata injahve” (mah i trongchetsoh inruuia matsahrem trongthuunsa),

³“mahchuvah nang turella nivaithra mahche thaleichungah soot niringnatu relnasa.”

⁴Apa eio, nansa eita amilung inhaangnatu roknoh eive, chuta anmahta Akpu rella matheih choulaia che akthra lam majuih masehnatu anmahta koolkem eive.

⁵Naichi eio Khrista tingah son majuihnanga trih mahche inchuunsoh inruuia, ril seenga thaleina akpuei in ansonta majuih eive;

⁶miiril ampelchek anmah nanga miian thratnatu veia routlohchu veinoh a, chuta Khrista vaa roijuih nanga nanril khanna Ringpu in amdonkha tlohve.

⁷Miikuungah noh ah, Akpu kuungah nantloh khananga akthra rilsoh inruuia rou tlohve,

⁸amah in naichi veislakho nohle thlaang thlaang veislakho tukhat in akthra tlohleva, amah in atlohtalta intrimbenga veikhat inlenga Akpu kuungnata aphahtu tih i romve.

⁹Innpu eio, mahkhasoh intrimbenga nannih in naichi ankuungakho tlohve, anmahta matritnoh eive, alamvah nannihtukho mahche anmahtukho Akpu nannih turella ringramma am tih i nannih in nanrom.

¹⁰Achena veia, Akpu kuungah mahche amah akchek amneh ah nannih in trangve.

¹¹Kousaar in thranoh chalaak asilna khanna indenpia ngir nancheknatu Ringpu vaa raal puunrei apumte silhve.

¹²Alamva inih in insuulpi i thii leh ruungta indenpinohme, chuta inih in insuulpi i akchek amneh anchungah tuui anchungah, anthim tukleiram akpuei anchungah che ringram amun jikchah ah am thranoh li eita inih in indenpi.

¹³Alamchunna thranohni athlenglai thratea ngir nancheknatu mahche anaamte tlohkira loungiir nancheknatu nannih in Ringpu vaa raal puunrei apumte silhve.

¹⁴Alamchunna nantak nannaam akchimma inraak chloulaia, mahche akchimlamseh in lukhepho thunna ngirve,

¹⁵leh oi vaa akthratrongi thlouraang tloh a kehkhrang nanga chuungve,

¹⁶anaamte ichunga, malotna pho choive, ohchunna thranoh antruung meibomta that nancheknatu.

¹⁷Chanringvaa thir lukhum mahche Li vaa chemseita choive mahchu Ringpu atrongsa.

¹⁸Nanngen nannih naamte inruruh a lai amrel Li ah ngenve. Che oinang aktrang rilsoh inruuia jihtranga doutrang apumtesoh akseeng mii naamte turella ngenve,

¹⁹che kei turelkho, anthupvaa akthratrongta intrinoh a raanni keikuungah keipeknatu keingenpive,

²⁰mairella keivah thirhanga inkhit akthratrong akphurh miisang; chunna keiin kitrongtuphuta intrinoh kitrongnatu keingenpive.

²¹Ipek keiin khatloh a ammangme mahche jangkitlohme tihrelna nannih inkho nanromnatu, Akpu ting malot aja routloh mahche khalmo kirilvol unao Tikhikas in keirella anaamma nanisontu.

²²Oirella amahta keiin nankuungah kamthlahnavah, kannih in khatloh a ammungme tihrella nanromnatu che nannih nanrilta amah in nanimsohnatu.

²³Unaoeio, nankuungah Pa Ringpu tingna mahche Akpu Jisu Khrista tinga leh oi khatkho malotsoh inruuia rilvol am veiso.

²⁴Inih Akpu Jisu Khrista vaa inpot amnoh rilvol malungsi in nannihta nanimruui veiso. Amen.