Read Tarao Naga KOLOSIA 2 Bible Online

KOLOSIA 2 - Tarao Naga bible

KOLOSIA 2

¹Alamva nannih turella, Laodisia ah am mahche kei kimeel akmuhnoh miiei turella keiin khalmo tranga insuullangta kamromjachou,

²mahchuvah rilvol in khalek veia mahchunna anrilta masohna turelna, tak a seenga romna akdoonta, Ringpu vaa anthup lousing mahchu Khrista ta nantak a amnatu,

³amah kuungah lousing khatkho thiehsingna lal apumte inthup a am.

⁴Tukhat inkho nannihta nanileemna trongah nanisimna nohtu ta mah i kisonchou.

⁵Alamva kei kiruungin nankaara injaonoh sanglakho, kikli invah nannihsoh inruuia am, nannih in achaang naia nantloh nankhal mahche Khrista ta chet a namilot kimuh in kiroomthok ang.

⁶Alamchunna nannih in Akpu Khrista Jisu ta nanlouloh nanga, amahningah ringve,

⁷amahningah akjung moonga, seemkho hanseemve, mahche malottingah inthrungve, porhve, nannihta nanimtheih khananga amahta mapaaktingah huuitangve.

⁸Khrista in amdonnoh mii khanna anono a atlohthlou a che thuuk a madonmii in che jakhatnoh a miita leemna trongin nannihta mamaang aja, romve.

⁹Alamva Khrista Ringpu vaa Akseenghoong pumte ruung veia am,

¹⁰che miichungah akpaal khatkho akchek amnehvaa aklok chaan aksipkuungah thlengve.

¹¹Kut ah avun tannoh a amah kuungah avun intansachou, aruung atakta loonna Khrista vaa avuntan akhanna nannikho intansachou;

¹²inlup a amahsoh inphuumjou sachou, che thinata amring amahta Ringpu athloua namilot apaalla nannihkho amahsoh inruuia thinata ringjou sachou.

¹³Nannih nanleh ah mahche nanruung in avun intannoh a nanthihlai Khrista soh inruuia nannihta nanimringpei, inihvaa ileh naamtekho a ippei,

¹⁴inihta jekna kut ah injih aiilta ammutpei, che thingkharh ah thirkit hemma inthoi apaalla ajea inisihpei.

¹⁵Tukleiram akpuui ei che tuui ak ammei ankutnata Amah in asutpeiei che miinaam maikuungah anmah in raal chekta ammuh ei.

¹⁶Alamchunna saak iin rella, nohle ujouhoong rella, akningaak rella, nohle thlathar chunohkle sabat ngaak rella tukhat inkho pichaar nanitlohnohso.

¹⁷Mah ivah akthlengsam aniimning. Chuta amuvei pooteiva Khrista ata.

¹⁸Tukhat inkho nantloh khaanta atak inruruh rella mahche ringroita amthruun rella puhnoh cheta naksonnoh eiso. Amah ahamuh ah, jakhatnoh rella arila thoiliinsa.

¹⁹Che oinang akangveita chet a matuhnoh, akloknata ruung pumte, aruh, aril, atakchi naamte inkeih intuukkira, Ringpu in marolla liin.

²⁰Tukleiram apumtevaa amuvei pootcheita nannih in Khrista soh thihpijou choule, pek nannih in jarella tukleiramna mii veia ring mangchoume?

²¹“Matuhkho matuhnohve, matemkho matemnohve, palkho palnohve.”

²²Mah naamte ihuuina malamma maangtu seengning, mah i mii in amdon mahche malot rella nanimtheih nata namijuih nohme?

²³Mainang thloui tak a malottangta mathruunna lamma akseh, antak anrouta malah mahche ruungta malahna hoong slakho ruung in akditta vat a jakhatkho akana amnoh.