Read Tarao Naga KOLOSIA 3 Bible Online

KOLOSIA 3 - Tarao Naga bible

KOLOSIA 3

¹Chunna nannih in Khrista soh ringjou taningchouvah, achungtongah am poot eita jonve, mahkhan Khrista in Ringpu akchangtongah inbok a am.

²Achungtongah am poot khanna nanril sihve, thaleichungah ak am poot eikhanna nanril sihnohve.

³Alamva nannih in thisachou, che nannih nanchaan Ringpu kuungah Khrista soh inthup a amjou.

⁴Inih ichaan akvei Khrista ta amdanglai nannihkho amahsoh inruuia paarhtra ah nanimdangtu.

⁵Alamchunna thaleitu vei nantak ah amkha thatve: Changvaangnoh kupa kumei ah thranoh hoonga seh, akbuur, thranoh lamtinga arilhang, thranoh di, mahche kallak mainangei ivah leili amthruun miisei.

⁶Mainang mii anchungah Ringpu amlunghaangna thleng.

⁷Mainang li ah nanringlai sootvah oinang thloua seh a thranoh nantloh.

⁸Chuta pekva anaamte i mathlahvesa, mah chuvah inraatkanga ksao, malung haangtrang, mii andah, mii loonna trong, mahche thranoh trong trongnohve.

⁹Nannih in khatleh khat insimnanohve, alamva nannih in amlui hoongah nan amkha kanmahpei ta romve.

¹⁰Akpu kutseem ah khiiallah akthar nanimvei peitaningvah akthar hoongta nannih in silhve.

¹¹Manna Kriik khatkho Judi, avuntan khatkho tannoh, barbarina[1] mii, Skaithina mii, naichi, thlaang thlaang mii jakhatkho threknoh, chuta Khrista vah apumtetu vei mahche apumte ah am.

¹²Chunna Ringpu in acharkhat veia, akseeng mahche rilvolna mii nanga, rilvoltheih, ril inneem, inruruh, mahche doutrangta nannih in silhve,

¹³tunangkhat in tunangkhat chungah atlannoh amle, khatleh khat doujouve, khatleh khat in ipjouve; Akpu in nannihta nani ip nanga nannih khatleh khat in ipve.

¹⁴Anaamte chungah rilvol in silhve, mah inna bilam anaamte mapung ampha a khalek veia akhit.

¹⁵Che Khrista vaa leh oi in nanrilsuungah paal veiso, tak a nannihta aruungkhat veinatu naniongpei. Mahche mapaakkho mapaakve.

¹⁶Khrista trongta nantaksuunga huuitanga am veiso, lousing naamte in inkhat in khatta matheih khatkho inchaak a, lailaa, mapaaklaa, mahche Li tu vei laasoh nanrilsuungah Ringpu ta mapaak a laa tlohve.

¹⁷Mahche nannih in jangmekhat trongta nohle tlokhal choulakho, bilam naamte Akpu Jisu mingah tlohve, amah apaalla Pa Ringpu ta mapaakve.

¹⁸Akmei eio Akpu tingah matikcha nanveinanga, namisal aliah amve.

¹⁹Amsal eio, nanmeita rilvolve, mahche ankuungah thranoh tlohnohve.

²⁰Naoeio, bilam nannu nanpa in ansonta majuihve, alamva mah in Akpu ta ampel.

²¹Apa eio, nansa eita anril mahaangnoh eive, chunohleva anril inlengtuei.

²²Naichi eio, bilam thaleiah am nannih akpu in ansonta majuih eive, miita mapel anmah nanga miian thratnatu routloh veinoh a khakla ah Ringpu trih a tloh khalve.

²³Nannih in miita routloh veinoh a, Akpu ta rou nantlohnanga nantloh nankhal naamte nanril maluut a tlohve.

²⁴Phahphu khaankha Akpu tingnata kanphahtu tih a romma, nannih in Akpu Khrista ta rou nantloh.

²⁵Alamva chimnoh a aktloh mii in amah in atlohthlou chimnoh khata inlenga amphahtu, che keimii miimii sihnohtu.