Read Tarao Naga 1 THESSALONIKA 1 Bible Online

1 THESSALONIKA 1 - Tarao Naga bible

1 THESSALONIKA 1

¹Paul, Silvanas mahche Timothi in Pa Ringpu khatkho Akpu Jisu Khrista ah am Thesalonika vaa khakla ah: Malungsi mahche leh oi nantak ah am veiso.

²Kannih in nannih naamte rella lai amrel Ringpu ta kamipaak, nannihta son sonna kanngenpichou.

³Inih Ringpu mahche Pa amaikuungah namilotthlou khatkho rilvolna thlou mahche inih Akpu Jisu Khrista ah am matuurkhan nanchetnatu intheih ung.

⁴Alamva Ringpu in arilvol unaoeio, amah in nannihta nanicharpei ta inih in irom;

⁵alamva kannihvaa akthra trongi nankuungah trong khop veia thlengnoh, chuta nankuungah tuuia, Akseeng Li ah mahche chet a malotsoh inruuia thlengsa. Nannih turel kannihvah jaknangmii veisungme ta nankaara mamuhna tuta nanrom.

⁶Che nannih in Akpu vaa mahche kannih kanhoongta amjuih veisachou, alamva Li Akseeng nanithun peia roomthoksoh inruuia klah knang jikcha kaara trongkhata nanroulohpei,

⁷chunna nannih in Mesidonia khatkho Akhaia ah am amlot mii naamte nanhoongta nanitamna veiso.

⁸Alamva Mesidonia mahche Akhaia khop ah Akpu trongkha intheihnoh, chuta nannih in Ringpu namilotkha amun naamtea intheksa, chunna inih in aktlei isonnatu amnohsa.

⁹Alamva antaksaak in nannih rella antongvah khatloh a nankaara kannihta nanison ungme, che nannih in akring mahche akchim Ringpu ta routlohnatu leili mathruunnata khatloh a Ringpu ting inheichoume,

¹⁰thinata kiring mahche akthlengsam malunghaang nata inikal Jisu Ringpu vaa Asa kupa ringramnata iloungaaknatu.