Read Tarao Naga 1 THESSALONIKA 2 Bible Online

1 THESSALONIKA 2 - Tarao Naga bible

1 THESSALONIKA 2

¹Alamva unaoeio, nannihta nanian thlengungkha apupunoh tih a nantak in nanrom,

²chuta Philippi ah kannihta klah knang khatkho injahna hoongah thranoh kanitlohkha nannih in nanrom, kannihta kaniandah anmaikuunga Ringpu vaa akthratrongta raannatu Ringpu in kanimsoh ung.

³Alamva kannih in noolla kansonkha chimnoh nata nohle seengnoh nata chunoh a mii masimnatheih kuungnata inthruhnoh;

⁴chuta akthratrongta kankuungah amsilnatu Ringpu in kannihta kanija peitaningvah, kannih in mii mapelna tuta tlohnoh ung, chuta kanrilta chaang ak an Ringpu ta mapelnatu trongsung.

⁵Alamva nannih in nanromkhaning, kannih in tikniakho ril chimnoh a inpaaknatrong huuinahnoh ung, nohle salok rella intlohsin noh ung, Ringpu in sakhi;

⁶Khrsita vaa raangroi veia kantak ah akchek amneh amsunglakho, nohle mii tingna slakho, aktlei mii tingna slakho, kannih in paarthrata jonnoh ung.

⁷Chuta anukhat in asaeita klukanga aroiinanga, kannih inkho nankaara kanril inneem veisung.

⁸Nannihta khalmo kanrilvol choua, kannih in nankuungah Ringpu vaa akthratrongta malankhop veinoh a kantak luungkho nankuungah malannatu inchaangsung alamva nannih i kannihtu khalmo inchaalna veisachou.

⁹Alamva unaoeio, kannih in kantloh kankhal mahche tranga thlou kantlohta nannih in intheihchou nannihta pootrik maronnoh natu kannih in khulouh suun thloutloh a Ringpu vaa akthratrongta kanraanchou.

¹⁰Malot mii nankuungah kannih in jikcha seenga, akchimlamseh ah mahche malaalna amnoh kanhoong kanva irella nannih in sakhichou.

¹¹Apa khat in asa akuungah atloh khananga, nannih khatkhatta bung kanthokchou, nanrilta kamisoh choukha mahche thlou kamisil choukha nanrom.

¹²Amah kurung huunnavaa paarthra ah nannihta naniong Ringpu in matikcha chaanna nanichingnatu.

¹³Mairella kannih inkho inngainoh a Ringpu ta kamipaak, mahchuvah kannih tingnata nantheih Ringpu trongkha nanlouloh laia, mahkha nannih in miitrongnata vei tihnoh a atak a Ringpu trongta nanloulohpei, mah chuvah Ringpu ta amlot nankuungah thlou atloh.

¹⁴Alamva unaoeio, Judia na Khrista Jisu ningah am Ringpu vaa khakla ei anhoongta amjuih veisachou; alamva Judiei tingnata klah knang intrimma anphah khananga nannih inkho nanramna mii tingnata klah knang nanphahpei;

¹⁵Anmahvah Akpu Jisu mahche ringraan eita anthat, che kannihkho kanimnomung; khatkho Ringpu ta mapelnoh ei che mii naamteta indah ei.

¹⁶Jental in inkal anphahahnatu ankuungah akthratrong kanraankho anmah in kanivat ung — ngatloh lai amrel anmahvaa anleh chaangta ralla amisip. Chuta achena avah Ringpu in trihkhop a amlunghaanga anchunga thlengsa.

¹⁷Chuta unaoeio, inih irilvanoh ah ruunga veia kannih leh nannih inthreksame, kannih in khalmo dia nanmeel kanmuhnatu insuulsung;

¹⁸alamva kannih in nankuungah thleng kandit — Paul keiin inlenga nankuungah kithlengnatu insuullang, chuta seitan in inivatpei.

¹⁹Alamva Akpu Jisu in athlenglai inih in imtuur nohle phlaak huuina nohle amah maikuungah ithoina boorpiichu jangsame? Mahchu nannihnoh choume?

²⁰Alamva nannih in kannihtu paarthratna mahche phlaak huuina veisachou.