Read Tarao Naga 1 THESSALONIKA 4 Bible Online

1 THESSALONIKA 4 - Tarao Naga bible

1 THESSALONIKA 4

¹Achenaremma, unaoeio, Akpu Jisu ningah kannoolchou mahche kamisohchou; mahchuvah nannih in khatloh a ring uchou che khatloh a Ringpu namipeltu tihrella kannih kanningnata nanromcheta nantloh khananga nannih in ral ralla tlohve.

²Alamva Jisu Khrista apaalla kannih in kamitheih choukha nannih in nanrom.

³Alamva nannih nantakta seenga sih, kumei kupa thranoh hoongnata inlaachou i Ringpu in amdonthlou;

⁴mahchuvah kupa makhei in amah akmeita khatloh a seenga mahche injah a asih ume tihrella nanromnatu,

⁵Ringpu romnoh rappu ramnaita athruun mii nanga ruung in akditpot thranoh thloua nanril maluutnohve;

⁶Nan uh nannao kuunga amahnoh lamma seh a chimnoh tlohnohve, alamva nannih nankuungah khalmo thra a kansonche khananga, anaamte ichungah athung akloutu amahvah Akpu sa.

⁷Alamva Ringpu in inihta seengnoh veinatu iniongnoh, chuta akseeng veinatu iniong.

⁸Alamchunna tukhat in maita akjanohvah, miita janoh tanoh, chuta Akseeng Li amlan Ringpu ta janohsa.

⁹Chuta unao pasata rilvol relnavah tukhat inkho nankuungah amijihnatu darkaarnohsa, alamvah nantak khatleh khat ril involnatu Ringpu in nanimtheih chepei;

¹⁰mahche tak a Mesidonia apumte ah am unao naamteta nanringvol. Chuta unaoeio, mahchu ral ralla nantlohnatu kamisohchou,

¹¹nannihta nanihchaak khananga, daikenga nanpaalnatu, nanthlou a nanril namiluutnatu, che nankut in thlou nantlohnatu;

¹²chunna nannihta apaalna mii in naninjahnatu che tukhat tingkho nanbei nanohtu kisonchou.

¹³Chuta unaoeio, aktlei mii in amikuur amnoh a anringnanga nanril malahnohve, ak in miiei rella nannih in romnohchou i nanimtloh dah ang.

¹⁴Alamva Jisu in thisa mahche veikhat ringsa tih i imlot taningvah, mahchunanga Jisu apaalla Ringpu in Jisu soh inruuia athlengpi tuei.

¹⁵Mairella Akpu trong ita sonna kantihchou, mahchuvah Akpu in athlenglai phah a ak am inih in ak inche ei chungah matsahnoh ume.

¹⁶Alamva Akpu atak in ringramna hoisoh, akthloi ringroi in ong housoh mahche Ringpu vaa pek — ul ahousoh inruuia trumtu Khrista ah akthi eiin matsah a ringtuei;

¹⁷mahchuche ringa am inih in anmahsoh inruuia marvaanna Akpu soh inmuhnatu sumphaia pulla kak hanga inihantu; che nga tloh a lai amrel inih in Akpu soh amjou ume.

¹⁸Churella mah trongin nannih khatleh khat inbohve.