Read Tarao Naga 2 THESSALONIKA 1 Bible Online

2 THESSALONIKA 1 - Tarao Naga bible

2 THESSALONIKA 1

¹Paul, Silvanas khatkho Timothi in Pa Ringpu mahche Akpu Jisu Khrista ah am Thesalonika vaa khakla ah:

²Inih Pa Ringpu mahche Akpu Jisu Khrista vaa malungsi khatkho leh oi nankuungah am veiso.

³Unaoeio, nannih turel lai amrel kannih in Ringpu ta mapaakphu, mah i tlohphu, alamvah nannih in namilot i huuitanga liinna porsa, che miinaam in khatleh khat ril involchou i ahanral.

⁴Alamchunna nannih in inchut nanphahna jikcha ah malot trangchou mahche klah knang jikchata chet a nandouchek rella Ringpu vaa khakla ah nannih rella kanthoina vei.

⁵Mah i Ringpu tingna akchimlamseh pichaarvaa akseeng aveinasa, mahchuvah nannihta Ringpu kurung huunna ah matikcha nanimveinatu, mahchurella nannih in klah knang nanphah —

⁶nannihta nanimlah mii eita tak a Ringpu in mananga athung alohtuei,

⁷che aktrang meikaara Akpu vaa akchek amneh ringroi eisoh ringramnata Akpu Jisu ta amdanglai, klah akphah nannih in kannihsoh inruuia inngai inimphahtu,

⁸Ringpu akromnoh mii eita che inih Akpu Jisu vaa akthratrong amjuihnoh eita athung alohtuei.

⁹Anmah tandivah ache amnoh kmaang krel klah knang veitu che Akpu akchek amneh paarhtra nata athrektuei.

¹⁰Mah i amah akseeng mii in amahta paar mathratnatu mahche amlot mii in amah kuungah salungkhounatu amah in athlengsam akni khasa, alamvah nannih in kannih sakhita namilotpei.

¹¹Achena ah inih Ringpu in naniongta matikcha nanimveinatu, mahche nannih akthra turella nandit naamte khatkho namilotthlou naamte tuuisoh inruuia mathlungnatu, lai amrel nannih turella kanngen,

¹²chunna inih Ringpu mahche Akpu Jisu Khrista vaa malungsi nujuih a, nankuungah inih Akpu Jisu mingta nankaara paar amthrattu.