Read Tarao Naga 1 TIMOTHI 1 Bible Online

1 TIMOTHI 1 - Tarao Naga bible

1 TIMOTHI 1

¹Inihta inikal Akpu Ringpu mahche inih in imtuurna Khrista Jisu vaa trongthuun nujuih a Khrista Jisu tu raangroi Paul keiin.

²Malottinga akchim kisa Timothi kuungah inih Pa Ringpu tingah mahche inihvaa Akpu Khrista Jisu tingnata malungsi, rilvoltheih che leh oi am veiso.

³Keiin Mesidonia ah sehtung kitihlai nangta Ephesia ah niamnatu tranga kisonpeiche, mahchuvah aktlei anthliin malot rella matheihnoh natu,

⁴achaknoh inseem thaminna, ringramtingna malotphu thlouta maliin maphorhnatu angut a trong inkherhna masuuk, ache amnoh ringnatluun rella ril maluutnoh natu nangin anmahta namtheihnatu.

⁵Khatting inih in imsinna ithloua akseengril, chim chimnoh maromna akthraril mahche ril seenga malotnatu inthruh rilvolsa.

⁶Mii arouva oinangnata inheia sehseia kanana amnoh trongtlamma ammei,

⁷anmah in jangta trongungme nohle anmah in chimungta antrangna aramva romnoh eia aiiltu lulokva anveija.

⁸Pekva tukhat in aiilta alamchimma huuinale, aiilva thtra ta inih in irom,

⁹mah i irom, mah chuvah akchimmii turella aiilta sihnoh, chuta aiil amjuihnoh khatkho aleh am mii turella, akseengnoh mii khatkho akchimta ambuurmii turella, apa khatkho anu akthatmii rella, miithat misunrella,

¹⁰thranoh hoongah akseh mii rella, kumei kupa ah inlaal mii, miisuur, amlei seimii, chimnoh ah seitatloh, mahche akchim malottingah matheihnata inhea akseh mii turelna.

¹¹Mah i doiphahthra Ringpu vaa paarthra akthratrong kikuunga amsilta aknu majuihna turelna.

¹²Keita aktrangli amlan inih Akpu Khrsita Jisu ta kimpaak, alamva amah aroutlohna ah thlou keithunanga keita malot aja mii kamveiang,

¹³mansah avah keiin Ringpu ta khalmo thranoh a trong sanglakho, chut sanglakho mahche manuih sanglakho, chulata rilvolna kiphahpei alamva mahkha Amahta kimlotnoh rella romnoh a kitlohning,

¹⁴che inih Akpu vaa malungsi Khrista Jisu ah amta malot, khatkho rilvolnakha kei turelvah khalmo inleisolhsa.

¹⁵Aleh am mii eita kalnatu Khrista Jisu in tukleiramma thlengsa ta asonni malotphu mahche roulou matikcha, keiin aleh am ankaara akthloirem veisang,

¹⁶chuta mairella keiin rilvoltheih kiphahpei.

¹⁷Chup chuptu kurung, kthi amnoh, muh icheknoh, khalekru vei Ringpu ache amnoh paarthra khatkho injahna am veiso. Amen.

¹⁸Kisakupa Timothi, anmah in nangta namisoh nujuih a nangin aktrang raal nitlohpinatu nangrella matsah a ringraan in ansontrong nujuih a thloui kamsil peiche,

¹⁹nangin namlotta chet a matuhro mahche chim chimnoh romna akthra rilla amro. Mah maromna rilita indah eia mii arouva amilotnata mulikoi veisei,

²⁰anmah ankaara Himenas leh Alekjendar kho jaosei, anmah in antlohthlou mii manuih samanuih i thranohsa ta anmahta seitan kuungah kamlanpeiei.