Read Tarao Naga 2 TIMOTHI 1 Bible Online

2 TIMOTHI 1 - Tarao Naga bible

2 TIMOTHI 1

¹Khrista Jisu ah am chaanvaa trongchet nujuih a Ringpu in amdon Khrista Jisu ningah raangroi Paul,

²keiin kirilvol kisa Timothi kuungah: Pa Ringpu mahche inihvaa Akpu Khrista Jisu tingah malungsi, rilvoltheih khatkho leh oi am veiso.

³Keiin inngainoh a kingen kingenna ah nangta kantheihlai kapa kapu in antloh khananga, akseeng chim chimnoh romna rilsoh rou katloh Ringpu ta kimpaak.

⁴Nang ruithlita intheih anga, roomthok in kitak ah asipnatu, juktiing khulouh nangta kimuhja hangsache.

⁵Niril seenga namlotkha keiin intheih ang, tak a malot i nang nipi Lois leh nangnu Unis kuungah amche pekkho ammangche, nankuung akho amtuta keiin kamlot.

⁶Mairella nichungah kikut kisih apaalla nitak ah am Ringpu vaa kuttholta nihuuinatu kiromche;

⁷alamva Ringpu in intrinatu li inimlannoh chuta tuuitu Li mahche rilvol khatkho atak anroua kut inchalnatu inimlan.

⁸Chunna inih Akpu rella sakhi malanna chunohle amahrella simma am keirella injaknohro, chuta Ringpu vaa tuuiah akthratrong rella klah knang phah ah chuum jaro,

⁹amah in inihta inikalpei che seenga amahningah inihta iniongpei, inih in itlohthlou relna noh, chuta amah in amdonkhat amrelna, mah chuvah amah in chup chup amaa a Khrista Jisu kuungah inimlanpei,

¹⁰che pekva inihta inikal Khrista Jisu andang apaalla aphoongpei, amah in kthita ammutche akthratrong apaalla chaan khatkho kthi amnohluung akvaarting inihthlenpei.

¹¹Mah akthratrong irella keita akthratrong akraan, mahche raangroi khatkho lulok veia thlou keithunpei,

¹²Alamchunna oirelna keiin klah knang kidou, chuta keiva injaknoh ang, alamva keiin kamlotkha kirom, amah kuungah kimsilhkha amah inkho Aknikha aphahnohmiil kemma keisihtuta kitak in kirom.

¹³Nangin kei kuungnata nitheihche akchimtrong khata Jisu kuungah malot mahche rilvolna akthra pandamkha majuihro;

¹⁴nankuungah amsil akchimkha inih isuungah am Akseeng Li vaa apaalla ngaak kemro.

¹⁵Asia ah am annaamte in keikuungnata inheia sehseita nirom, anmah ankaara Phukelas mahche Hermokenes jaosei.

¹⁶Onisiphoras ataploikuunga Akpu rilvol theihkha amso, alamva amah in injomma ril kamthlannang; keiin thirhang kanlukrella amahva injak amnoh,

¹⁷chuta amah in Rome atlunglai arilhanga keita keijonang che keituuk ang —

¹⁸mahni khanna Akpu tingna rilvoltheih aphahnatu Akpu in akuungah malanso che Iphisas ah amah in keita khalmoa rou keitlohkha nirom.