Read Tarao Naga 2 TIMOTHI 3 Bible Online

2 TIMOTHI 3 - Tarao Naga bible

2 TIMOTHI 3

¹Chuta mah i romro, achena aknichunna trihkhop a insuk inhal lahna thlengtu.

²Alamva mii in atakkhopta arilvol suuktu, inbaobeh andittu, in orh tuei, inhaangtlam tuei, thoi tuei, annu anpa in anson majuihnoh tuei, mii in atlohkhaan romnoh tuei, seengnoh tuei,

³mii rilvol amnoh tuei, mii andah tuei, miiruuta malaalla trongtuei, kaa anraltu, intrikhop tuei, akthrata intirh tuei,

⁴mii loonna trongtuei, cheksilnoh tuei, thoiliin anraltu, Ringpu ta anrilvol chunga antak mapelnatu ralla andittu,

⁵heikoh ahoongva antlohtu, amah atuuiva lounoh tuei, oinang miinata inpelro.

⁶Alamva anmah ankaar nata taploikuung taploikuunga luut luut a aleh pootrik roonna alam jkchah ah ansehpi tlamtuei, marnop kumeita namma ansuur tuei,

⁷rungai seilakho anmah in akchim khiialva phah cheknoh tuei.

⁸Janes mahche Jambres in Moses ta indahnanga, nga tloh a anmah inkho akchimta indah ei; thranoh rilta mahche malotta indah ei;

⁹chuta anmahvah pungpornoh usei, alamva anmah innih ankuungna nanga anmah in kmong eikha mii naamte kuunga indangtu.

¹⁰Pekva nangin muh a nirom, mah chuvah keiin kamtheihna hoong, kihoong kiva, kimlotna, chaanna masinna, keiin kidoutrang, keikuungah am mii rilvol, keiin soot kidouchekna,

¹¹Antiok ah, Ikunium ah mahche Listra ah keikuungah aksuuk keita kanchutna, kei klah knangna, keikuung kanchutna aksuuk jikcha i keiin kidou, keichut seilakho anaamte ankuungnata Akpu in keikalpei.

¹²Taktak a tukhat in Khrista Jisu kuungah akchim chaanna ring dieile, amah in inchut klah knang aphahtu tlasa.

¹³Thranoh mii mahche mii masimna, thranohchung thranoh vei miita amisimnatu che mii inkho amahta amisimnatu.

¹⁴Chuta nangin niromche eita chet a namlotna khannata incheknoh a amro, tutu kuungnata nitamme romro.

¹⁵Che nangin nao niveilai nga tloh a akseeng ringjih kirompei ta nitak in minna bahab tlasache Khrista Jisu ta namlot apaalla mah ringjih in nangta chaanring rella namtheihchek.

¹⁶Ringjih naamte Ringpu aphuknata suuk mahche miita matheihna turel, saalna turel, machimna turel, akchimlamseh ah matheihna turel akanana,

¹⁷mahchunna akthra thlourelta mapaangnatu Ringpu amii in mapungpha a thlouraang atlohpei.