Read Tarao Naga TITAS 1 Bible Online

TITAS 1 - Tarao Naga bible

TITAS 1

¹Ringpu vaa ringroi mahche Jisu Khrista vaa raangroi Paul, Ringpu in acharche mii in amilot mahche Ringpu amdon nujuih a akveikchek akchimta romma ahanralnatu,

²ache amnoh chaanta matuura amchinthi amnoh Ringpu in leithingah kimlantuta trongchet atlohche,

³che tancha athratlaia akthra trongta raan apaalla amah trongta iniphoongpei, mah chuvah akthratrongta raanni inihta inikal Ringpu vaa trongthuun nujuih a keita kamsilpeiang.

⁴Malot ah intrim nujuih a kisa Titas kuungah Pa Ringpu mahche inihta inikal Khrista Jisu tingna malungsi mahche leh oi am veiso.

⁵Mairella nangta Kriti ah kimahche, mahchuche akvaat thloueita nangin intlaanga nihantloh natu mahche keiin nangta kimtheih chekha aknujuih a khuupii khuupii ah anparuul eita anthlou thuneiro,

⁶tunangkhat kupata malaaltuphu amnoh, kumei khatvaa amsal asa ei in Akpu malot antakchungah anlaal amnoh mahche son majuihnoh a ansoina amnohle anmah khanangta thlou thuneiro.

⁷Alamva sadamkem khat in, Ringpu routloh khat veia, malaalna amnoh; kei ningsangta insoonnoh nohle intha amlung inhaangnoh nohle tuiibuh ah aril maluutnoh nohle innah insuul trangnoh nohle achuungna turel karaamnoh,

⁸chuta routloh theih, akthra di, anroua inpuuichek, ril intluun, kseeng, mahche anroua kut inchalmii veitu tla;

⁹amahta imtheih khananga malot aja trongta chet a matuhso, chunna akthra malot rella matheih acheknatu khatkho injanoh eita anmaraal mathruh acheknatu.

¹⁰Alamva trongson majuihnoh alamtlanoh a trong mahche mii masimna khalmo ammei, amuveia anvuntan ruultingna,

¹¹anmahva trongnoh tupotei, anmah nangva anchuungnatu anditrella matheih phunohta matheih a taploikuung apumteta achung athlang amilat.

¹²Anmah ankaara ringraan khat in ason, “Kritan eivah lai amrella amichin thiei.”

¹³Mah sakhi i chim. Alamchunna anmah in malot a akchim anveinatu anmahta tranga saaleiro,

¹⁴Judiei in anseem thaminna nohle akchimta thleia akseh miiva trongthuunna anril amiluutnoh natu tranga cheksilro.

¹⁵Akseeng kuungah bilam kseeng, chuta akseengnoh mahche amlotnoh miikuungah bilam seengnoh; anmah anril chim chimnoh romna anrilkho seengnohsa.

¹⁶Anmah in Ringpu akromva veia trongei chuta anmah in antlohthlouva amahta indah ei, anmahva intirhsei, trongson majuihnoh, akthra thlou rella anmahva matik chanoh ei.