Read Tarao Naga TITAS 3 Bible Online

TITAS 3 - Tarao Naga bible

TITAS 3

¹Anmah in rampuui mahche akchek amneh ei anthlangah an amnatu, trongson majuihnatu, mahche injahna thlou rella inchaanga an amnatu,

²tukhat tingkho thranoh trongnoh natu, innah insuulnoh natu, ril tap a mahche mii naamte kuungah ril seenga mamuh i anmah in anromnatu matheih eiro.

³Alamva inih in laikhat avah kmongme, trong majuihnohme, invaia sehme, aktlei tleita dia mahche ril mapel mathlanna thranoh tloh ah dia mahche kallak inpea lai jikchata mamaanga, intirhsa veia mahche khat in khatta intirhna veime a;

⁴chuta inihvaa inikal Akpu miita rilvoltheih, mahche mii malungsi theihta mii kuungah ammuhpei,

⁵alamva inih itak in akchimlamma seh a itlohthlou relna noh, chuta amah ataktal in inihta inirilvol nujuih a akthar pok a inisil peia che Li Akseeng in inimthar apaalla inihta inikalpei.

⁶Inihta inikal Akpu Jisu Khrista vaa apaalla Li akseengta itakchungah huuitanga inibunpei.

⁷Chunna inihta amah malungsi in inimchimpei, ache amnoh ringna ah matuura inih in lalchun iveinatu.

⁸Mah asontrongi taktaksa. Ringpu amlot mii in akthra thloutloh a anmah antak in cheksilla anril amiluutnatu ta tranga kansonchou, mah i miikuung avah akanana che akthrarem,

⁹chuta kmong injanoh, apupu inthohnata majon, madon inchunnoh rella injanoh mahche trongsuur rella inna insuul, mainang nata inpelve, alamva oinangi akanana amnoh mahche sulning.

¹⁰Miita ajea amthlakja mii khat i veikhat nohle veinih nakchaaknua, mahmii nangkha inlenga jakhatkho tlohpinohro,

¹¹mahchunang miiva chimnoh lamma seh, alehchel mahche atak anroua maraal inpemii tih a romro.

¹²Keiin Artimas nohle Taikhikas kuungah kamthlahpei, Nikapolis phah a nangin keikuungah nithlengnatu suulro, alamva mah khanna keiin phalbia kiamja.

¹³Jinas leh Apolos anlamma jakhatkho anvaat amnanohtu nichek makhei anmahta anneiro.

¹⁴Che nang nimiiei in kananoh thlounata akthra thloutloh a am eiso.

¹⁵Keisoh inruuijou annaamte in nangkuungah saambaan amithlah. Malot lamtingah inirilvol ankuungah saambaan kamilan. Malungsi in nankuungah am veiso.