Read Tarao Naga HIBRU 2 Bible Online

HIBRU 2 - Tarao Naga bible

HIBRU 2

¹Alamchunna inihta thliraang in raanna iniphurhnoh natu inih in itheih khanna ralla iril imluuttu tlasa.

²Alamva ringroi eiin trongraanta sonna amidangta chimleh che chimnoh naamte khoia nohleh trongson amjuihnoh mii in atak atak in antloh nujuih a akchim pichaar tandi phahleh,

³inih in vachah liin chaanringta thousanoh mele khatloh a inlit umeme? Mahkha matsah a Akpu in sonna amdangpei, che amahta akhoihmii eiin inihta amjapei.

⁴Ringpu inkho daang eisoh, salungkhouna eisoh, alam jikchahna salungkhouna thlousoh mahche Akseeng Li vaa kutthlol jikchata amah in amdon nujuih a aseempei.

⁵Alamva inih in itrangna ah akthlengsam tukleirammi Ringpu in ringroi athlangah sihnoh.

⁶Amunkhat ah sakhi malanna ason, “Nangin madonna nianmii khasame, nohleh nangin klukanga nakem miivaa asa kupa i jakhasme?

⁷Nangin amahta ringroi anthlangah ste tla a niseemnohme, nangin amahta paarthra leh injakna boorpii namkhumpei,

⁸Poot naamte amah akeh athlangah asihpei.” Ipek poot naamte amah athlangah asih, amah in akut ah achalnoh jakhatkho amnohsa. Mah chunanga poot naamte amah athlangah am tihtalva muhnoh mangme.

⁹Chuta lai kakva ringroi anthlangah ste tlabeb a Jisu ta inih in imuh, amah in akthita klah knang adourella paarthra mahche injah in boorpii amkhumpei, chunna Ringpu vaa malungsi ah mii naamte turella amah in thisa.

¹⁰Alamva amah in asa kupa jikchaeita paarthratingah athlen, klah knang adou apaalla chaanring lam amhoongta chap amchapei amah turella chanasa. Alamva mahrella che amah apaalla poot naamte veisa.

¹¹Alamva amseengpot miirel anmah anpavah khatning. Churella anmahta unaopasa tih a amah in ong injaknoh,

¹²amah in ason, “Keiin nang nikmingta kiuh knaoei ankuungah sonna kamdangtu, kulsa ankaara keiin nangta kimpaak uche.”

¹³Che veikhatla, “Keiin kimlot i amah kuungah kisihtu.” Che khatla, “Kei mahche Ringpu in keikuungah amlan naoeisoh onna amsung.”

¹⁴Alamchunna naoei i ruung leh thii ah chuum anphah taningvah, amah atak inkho oh khananga intrim hoongta louva, amah in athih apaalla, thinata tuui am amahta tihvah seitanta ammaangnatu,

¹⁵mahche thitrih a anchaanluung naichi veia insuura ammeita amthlahpei.

¹⁶Alamva tak a amah in ringroi eita madonna majoomnoh thlengnoh chuta Abraham nata akthleng atute eita amjoom.

¹⁷Alamchunna amah in miivaa anlehta ipnatu, Ringpu ta routloh a rilvoltheih mahche malot aja akthloi thiimpu ahukveinatu, amah in miinaamtetu unaonanga veitu tlasa.

¹⁸Alamva amah atak in madoi aphah a klah knang atho khanna, madoi akphah eita amah in majoom achekpei.