Read Tarao Naga HIBRU 3 Bible Online

HIBRU 3 - Tarao Naga bible

HIBRU 3

¹Alamchunna ringramting iniongna ah chuum akjajou akseeng unaoeio, inih inara oisa ta sonna iphoong raangroi mahche akthloi thiimpu Jisu rella madonrei.

²Moses kho Ringpu in malot aja mii nanga amahta thlou akthun amahkuungkho malot ajana vei.

³Chulata inntloh miita innchunga ralla injah khananga, Jisu vah Moses chunga ralla injah aja paarthra veisa.

⁴Alamva inn makhei akseem mii khat am, chuta poot anaamteta akseemva Ringpu.

⁵Ipek Moses vaa Ringpu vah innsuung anaamtea roijuih vei, vaknua trongnasam jikcharella sakhitu veia malot aja,

⁶chuta Khrista vaa Ringpu innsuung achunga asa kupa veia malot aja che inih in iril malumma imlot mahche innih in matuura in orh mekha achena phah a chet a matuhmele inihva amah innsuungsame.

⁷Alamchunna Akseeng Li in asonnanga, “Mi in, nannih in amahouta nantheihlai,

⁸raprilla chaang keiannia keita raaltlohnanga, nannih nanril matrangnohve,

⁹mahkhan nanpai eiin keita chaang kan annang, che kum sopli kitloh thloueita anmuh.

¹⁰Alamchunna keiin anmah ringnatluun chunga kimlunghaang sang, che kitih ei, ‘Anmah in lai amrella anrilla invaia sehsei; anmah in kilamta romnoh ei.’

¹¹Keiin kamlunghaanga trongchet kitlohnanga, ‘Anmah in kanngeihna a tiknikho luutnoh tuei.’ ”

¹²Unaoeio, cheksilve, chunohleva nannih in akring Ringpu ta mathlah a amlotnoh tukhat in nannihta naniching aja.

¹³Chuta alehting masimna a tunangkhat in nanrilta amtrangnoh natu “Mi in,” tih i amlaia, aknirel khatleh khat bung inthokve.

¹⁴Alamva inih in iril lumma malot amthronnatu achenaphah a matuh a ammele, innihvah Khrista ah chuum akjajoukha veisame,

¹⁵mah i asonlaia, “Mi in, nannih in amahouta nantheihlai, keita raal nantloh khananga nanril matrangnohve.”

¹⁶Theih rerea raal nantlohna angkha tuchoume? Moses in aklokveia Ijip nata anthruhpi annaamkhanoh eime?

¹⁷Tukuunga amah in kum sopli amlunghaangme? Aleh akthloh in raprilla antak thia anruungta tukleia inriil miinoh eime?

¹⁸Akpu ingeihna ah anmah in tikniakho luutnoh tuei ta amah in tukuunga trongchet athlohme, chuta mahchu sonjuihnoh ankuungna nohme?

¹⁹Chunna anmah in amilotnoh rella ingeihna a luut cheknoh eita irom.