Read Tarao Naga HIBRU 4 Bible Online

HIBRU 4 - Tarao Naga bible

HIBRU 4

¹Alamchunna amah anngeihna ah luutnatu trongchet khavah ammang taningva, nannih tunangkhat in mah khanna tlungcheknoh ajata pichaar nanitloh aja inih in cheksilrei.

²Alamva amah kuungah trong inraan khananga akthratrongkha inihkuungah thlengsa; chuta anmah in antheihpot trongraankha ankuungah achuungna amnoh, alamva mahkhata arungai mii in malotsoh inruuia lounoh ei.

³Alamva amlot inihvah inngeihna akhanna luutsame, amah in asonnanga, “Keiin kimlung inhaangrella suita kitlohnanga, ‘Ammah in kei kanngeihna a tiknikho luutnoh tuei.’” Chusalakho amah athlounaamte tukleiram amthron lainata chesa.

⁴Alamva amah in amunkhat ah nijan sirih tihpita oinanga ason, “Ringpu in amah athlou anaamte nata nijan sirih tihpi aknih a inngaisa.”

⁵Chela veikhatla amah amunna maita ason, “Anmah in kei kanngeihna ah tiknikho luutnoh tuei.”

⁶Alamchunna arouin inngeihna akhanna akluuttu ammei taningva, che akthratrongta matsah akphah eiin trongsonta amijuihnoh rella mah khanna luutnoh ei,

⁷veikhatla amah in, “Mi in,” tih a annikhat amnai, vachah asootnua Devit vaa apaalla insonchesa, trongchuva, “Mi in nannih in amah ahouta nantheihlai nanrilkha matrangnohve.”

⁸Alamva Josua in ankuungah inngeihna malansale aknua Ringpu in aktlei aknikhat rella anmah kuungah trongnohtu.

⁹Chunna nga tloh a Ringpu vaa amii turella sabatni am;

¹⁰alamva tunangkhat in Ringpu anngeihna ah akluut amah khanna, Ringpu athlounata anngeih khananga amahkho athlounata inngaisa.

¹¹Alamchunna amah in asonta majuihnoh a intilnohnatu, inngeihna akhanna inih in iluutnatu tranga insuulrei.

¹²Alamva Ringpu atrongva kiring mahche karaanga, aha innih chemseichunga ngeih lileh li; ruh akthlup phaova viit a athrek. Mahche imdonleh irilla amta aromchek.

¹³Kutseem anaam jakhatkho amah amaikuunga inthup amnoh chuta amaikuunga itloh ikhalphao amah amit anna poot anaamte indanglong mahche inhoongbong.

¹⁴Chunna ringram vanna akseh akloon inihtu akthloirem Thiimpu Ringpu vaa Asa kupa Jisu amtaningvah inih in inara iphoongkha chet a matuhrei.

¹⁵Alamva inih in icheknoh imnehnoh laia inimjoomchek thiimpu doonme, chuta bilam amahkho inihnanga madoi aphah, chuta aleh amnoh akthloi thiimpu inihtu am.

¹⁶Alamchunna inih in darkaar amlai inimjoom natu, inih in rilvoltheih iphahnatu mahche malungsi iktuuknatu inih in seenga malotsoh inruuia malungsivaa phompii ah innairei.