Read Tarao Naga HIBRU 8 Bible Online

HIBRU 8 - Tarao Naga bible

HIBRU 8

¹Ipek inih in isonna amuveiva oire; Ringramma amtik akliin phompiivaa akchanga inbok a am, inihtu oinang akthloi thiimpu am,

²akseeng munna che mii in aseemnohpot chuta Akpuin aseempot akchim ramuk a routloh a am.

³Alamva akthloi thiimputu kutthlolpoot, mahche inthiimna poot katnatu thlou athunei, chunna mah thiimpu in jangjangme ste akattu tla.

⁴Ipek amah inta thaleichuunga amleva, trongsuur nujuih a kuttholpoot akkat thiimpu amtaningva, amah in thiimpu veinoh tupotta.

⁵Ringram akseeng munna aniim che ahoongkhanna anmah in rou antloh; alamva Moses in ramuk mangirhtang ansuullai, Ringpu in amah kuungah matheih a ason, “Muulchunga nangta kammuhchekha mah khananga, bilam niseemnatu anro.”

⁶Chuta mainanga Jisu in amluichung ralthloia che trongirhna ah amah in amchun veisa.

⁷Alamva matsah trongirhna khanta insoinohle, innih tihpina i darkaar amnoh uta.

⁸Alamva anmah in anchoihta antuukche ason, “Keiin Israel innsuung leh Judah innsuungsoh akthar trongirhna inkhat kiseemnatu aknikha thlengtu.” Akpu in ason, “Keiin akthar trongirhna kilinlai Israel mii eisoh, che Judah na mii eisoh,

⁹Ijip iramnata keiin anmahta ankut matuh a kanthruhpi aknukhanna anmah anpa anpueisoh inruuia kiseempot trongirhna khananga veinoh usa; alamva kei trongirhnata majuihnoh ei mahche keiin anmah turel kiril maluutnohsang.”

¹⁰Mah aknieichu aknua, keiin Israel mii eisoh inruuia kiseemsam trongirhnachu maire, Akpu in ason, “Kei kitrongsuur eita anmah anrilla kisihtu, mahche keiin anmah amilunga mah i kimjihtu, che keiin anmah Ringpu veitung, khatkho anmah in keimii vei tuei.

¹¹Che tukhat in anruuipi mii makheita matheihnoh usa, nohle unaopasa makheita, ‘Akpu romro’ tihnoh usa. Alamva annaam in kanrom usang, andihrem nata anrolrem phah.

¹²Alamva anmah in anchimnohta keiin kiril invol usei, mahche anmah anlehta keiin inlenga intheihnoh usangei.”

¹³Akthar trongirhna rella intel in Amah in matsahna khavah in huuinanoh amveipei, che huuinajanoh amluikha intha maangusa.