Read Tarao Naga JEMS 1 Bible Online

JEMS 1 - Tarao Naga bible

JEMS 1

¹Ringpu mahche Akpu Jisu Khrista vaa roijuih Jems, inthek invorh a am Jatih somlei innihta, saambaan kamlanchou.

²Kiuh kinaoeio, nannih in alam jikcha ah chaang an nantuukpilai mahkha roomthok roomthok a madonve,

³alamva nannih in namilotta chaang an khanna doutrang amsuuk tih i nannih in nanrom.

⁴Jakhatkho nanvaat amnohnatu che nannih in mapungpha nanveinatu chet a doutranga athlou veia mamuhve.

⁵Tukhat in lousing vaatchoule mii naamteta klok a amlantheih mahche indah tlohnoh a amlantheih Ringpu kuungah nihso, che mahchuta akuungah amlantu.

⁶Chuta amah in aril intluunnoh tlohnoh a malot a nihso, alamva aril intluunnoh amahkhavah thli in raan riinna asehpi tuiiboom tuiisolh khanangsa.

⁷Alamva ril intluunnoh mii in Akpu kuungnata jangmekhat kphahtuta madonnohso. Amahva aril innih suuk veinohso.

⁹Khalmo intoolla am naota amliin in amah in akthrating in orhso,

¹⁰che akdoon in miithlang an amlai anroomthokso, alamva akdoon in inlou paarnanga amahva maang umang.

¹¹Alamva kini insa in inraatkanga inthruh a che inlouta amhuui; chuche apaar tril, che mah athratkha maang. Mahchunanga akdoon miikho mah in athrul suungah triimtu.

¹²Chaang anlai athochek miiva doiphah thrasa, alamva amahta chaang a anlai Ringpu ta rilvol am ankuungah kamlantuta trongchet atloh akring boorpii amah in aphahtu.

¹³Amahta amdoilai tukhat inkho, “Ringpu in keita kamdoinoh” tihnohso, alamva Ringpu ta thranoh in madoi cheknoh che Ringpu in tukhatkho madoinoh;

¹⁴chuta miikhatta amah in akdit khanna inluppia amahta amdoi.

¹⁵Chuche amah in akditna khanna inpooia alehta apokpei; che alehkhan mapung aphalaiva kthi suuksa.

¹⁶Kirilvol unaoeio, nannih in khatleh khat insimnanohve.

¹⁷Akthra malan mahche mapungpha kutthol anaamte achungtingna, kvaar amlan Pa tingnata trum amah kuungah ajethrel nohle inthleng aniimtla amnoh.

¹⁸Amah ataktaltu amdon nujuih a akchimtrong apaalla inihta inithlokpei chunna amah in iniseem inihta anaamte suunga matsahrem akrah inimveinatu.

¹⁹Kirilvol unaoeio, mah i romve, mii in intha rungaitheih, trong inneem, malunghaangah tap veive,

²⁰alamva miivaa malunghaang in Ringpu vaa akchimlamseh thlou tlohnoh.

²¹Alamchunna akbuur mahche thranoh ah ril maluutta che nannih nanruungvaa lita akalchek nankuunga amthlah trongkhata ril inneemsoh inruuia loulouve.

²²Chuta nannih in trongkhata athlou veia aktlohmii veive, nantak nanroua insimna a trongkhata arungaikhop veinohve.

²³Alamva tukhat in trongkhata arungai mii aveiche aktlohmii veinoh leva, amahvah patjang an anche amuhsaak ameelta ak anmii nangjimsa;

²⁴alamva amah in amelta an anche amahpei che atakva jaknang miiangme tihkha kak hanga ampolhpei.

²⁵Chuta aningtamna mapungpha trongsuur ah injomma ak am mii mahche mapolhtranga arungaikhop veinohve, athlou veia aktloh mii khavah, amah in atlohthlou adoi amlantu.

²⁶Tunangkhat in keivah heikoh ammangta amdonche; amah amleita suura sih cheknohle, mah chuvah amah arilta amsimnapei, atak in keivah heikoh ammang atihkha sul veisa.

²⁷Ringpu khatkho Pa amaikuungah akseeng che akbuur amnoh heikohvah: anu apa akdoonnoh mahche trulmeinu in anlah ansamma an, che tukleiramna thranoh nata anrouva inngaak.