Read Tarao Naga 1 PITAR 2 Bible Online

1 PITAR 2 - Tarao Naga bible

1 PITAR 2

¹Chunna thranohta akdi naamte, mii masimna, ril seengnoh, kallak mahche mii loonna trong naamte nata insenga mahve.

²Pokpek naoson nanga akseeng livaa siilchuhta diveh, mah khanna nannih in chaanringah liin uchou;

³alamva Akpu vaa malungsita namitempei.

⁴Mii invah indah a alonche, chuta Ringpu amit an avah acharche amanlu akring lung akomkhanna thlengve;

⁵nannihkho akring lungei nanga Jisu Khrista apaalla Ringpu kuungah lou aja Li tu vei katphu katnatu akseeng thiimpu veia litu inn naniseempei.

⁶Alamva mah i ringjh ah injh a amsa, “Anve, kicharpot amanlu akring lungta Jaion na kamthrun, amahta amlot miiva injak maphahnohtung.”

⁷Alamchunna amahta amlot miiva amanchaal veisa, chuta amlotnoh miiei turelva, “Inntloh eiin indah a anlon lungta akiingah amuvei lung amiveipei.”

⁸Chela “Miikeh masuihna lungkhavah mii mariilna lungpiisa.” Ankeh amisuih alamva anmah in trongsonta majuihnoh ei; mahkha asuuknata antak in amidonta anphah.

⁹Chuta nannihta anthimnata salungkhouna akvaar ah nanionga am salungkhouna thloueita sonna namidangnatu nannihva acharche jatih, kurungtu thiimpu, akseeng jatih che amah atak ataschou.

¹⁰Matsah a nannihva amahmii veinohchou chuta pekva Ringpu amii veisachou, matsah avah nannih in rilvoltheih phahnohchou chuta pekva rilvoltheih nanphahpei.

¹¹Kirilvol eio, nannih nanlita andah a raal nantloh i ruung in akditnata nanloungaak natu miiramna mii mahche roi mathlahmii nanga keiin kinoolchou.

¹²Jental ankaara nanhoong nanvaa thra a sehve, anmah in naniandah a nannihta chimnoh aktloh miichou nanitih seilakho, amah in nanian athlenglai nannih in akthra nantlohthlou anmah in muh a Ringpu ta paar mathrat eiso.

¹³Mii in anseem aiil athlanga amve, mah i Akpu turella, kurung in akthloirem akchek amneh taningva amah athlanga ringve,

¹⁴nohle chimnoh aktloh eita tandi tlohnatu mahche akchim aktloh eita mapaaknatu amah in amthlah rampuui anthlanga amve.

¹⁵Alamva nannih in akthra tloh a kmongmii in kmonga antrongkha hou masuuknoh a rimta sih Ringpu in akditthlou,

¹⁶Thlaang thlaang mii nanga ringve, chulata nannihtu thlaang thlaangkha thranohta abahnoh natu veia huuninave; chuta Ringpu vaa roijuih ei nanga ringve.

¹⁷Mii naamteta injahve. Akpu amlot unaopasa eita rilvolve. Ringpu ta trihve. Kurungta injahve.

¹⁸Naichi eio, nannih akpu eita injahsoh inruuia anmah anthlanga amve; akthra mahche ril inneem mahche mii rilvoltheih anthlanga am khop noh a nannihta ralla thranoh nanitloh ei anthlang akho amve.

¹⁹Alamva nannih in Ringpu tinga nanril namiluut rella tukhat in chimnoh a nanimlah nanimnangta douchek choule doi nanphahtu.

²⁰Alamva nannih in thranoh nantloh laia khatkho mah kharella mii in nanikhon naniraan laia doutrang choule mah khanna jaknang kanana nanphahme? Chuta nannih inta akthra nantloh laia che mah kharella klah knang phah adoutrang choule Ringpu in nanijapei.

²¹Alamva nannihta naniong peitaningva inih turella Khrista in klah athotaningva nannih in amah akehmun namijuihnatu tamna nanimveipei.

²²Amah in tiknikho aleh tlohnohluung; amah anarra a chinthi tiknikho intuuknoh.

²³Kreikanga amahta ansaallai, amah in kreikanga roumasangnoh; amah in klah knang aphahlai anmahta loumatritnoh; chuta chimma pichaar aktloh mii kuungah amlot.

²⁴Inih ileh in thia inih in akchimlamseh tinga iringnatu thingchungah amah atak aruungin inih ilehta aphurhpei; amah sungmunkhan nannih nannatna amthratpei.

²⁵Alamva nannihvah invia akseh sadam nangsachou, chuta pekva sadamkem akpu kuungah inlengsachou.