Read Tarao Naga 1 JOHN 5 Bible Online

1 JOHN 5 - Tarao Naga bible

1 JOHN 5

¹Jisu i Christa sa tih a amlot miinaam in Ringpu vaa asasa, che amah Apakho rilvol mii in Asakho arilvolpei.

²Onna inih in Ringpu ta rilvolla amah trongthuun eita imjuihlai khanna Ringpu asaeikho iringvolsei tih a irommang.

³Ringpu ta rilvolli maire, mah chuvah inih in amah trongthuunta ingaak. Amah trongthuunvah pootriknoh.

⁴Alamva Ringpu nata akpokmii in tukleiramta achekpei; tukleiramta ichek i inih in imlot apaalla raal ichek.

⁵Tukleiramta akchek chuche Jisu i Ringpu vaa Asa kupa tih a amlot miichu tunangme?

⁶Tuiisoh mahche thiisoh akthlengkha mah khasa, Jisu Khrista, tuii khop noh chuta tuiisoh thiisoh inruuia thlengsa.

⁷Che Li in sakhisa alamva Li vah akchimkhasa.

⁸Sakhi inthum am, ohchuva Li, tuii, mahche thii, mah inthummi injaei.

⁹Inih in miivaa sakhita loumele, Ringpu vaa sakhi in ralla liin; alamva Asa kupa rella amlan sakhikha Ringpu tingna sakhisa.

¹⁰Ringpu Asa kupata amlot mii in ataktalla sakhikha amsa. Ringpu ta amlotnoh miikhan amahta amchinthi amthlaak, alamva Ringpu Asa kupa rella amlan sakhikhata amah in malotnohsa.

¹¹Sakhi chuva Ringpu in ache amnoh chaan inimlanpei, mah chaanni Asa kupa ah am.

¹²Tukhat in Asa kupata amah kuungah amle akring punsikha amah kuungah amsa; tukhat in Ringpu vaa Asa kupata atak kuungah amnohleh akuungah chaankha amnoh.

¹³Ringpu Asa kupa minga amlot mii in ache amnoh a ringa am tih i nanromnatu mah i nankuungah kimjihpeichou.

¹⁴Che amah kuungah iril imthrumnavah oire, mah chuvah amah in amdon nujuih a jangmekhat darkaar amchu nihmele amah in atheih.

¹⁵Inih in inihkhata amah in atheih tih a inih in irom, inih in amah kuungah inihkha akuungnata iphahtuta irom.

¹⁶Tukhat unaopasa in thihna vanoh tupot a aleh atlohta muhleh nangin ngenro, che Ringpu in chaan amahta amlantu, alamva anmah alehkho am; mah kharella amah in ngensota keiin tihnoh ang.

¹⁷Chimnoh thlou anaam aleh, chuta athih nainoh aleh am.

¹⁸Tukhat in Ringpu tingah pokle aleh tlohnohsa tih a irom chuta Ringpu ah akpokmii in akroua inkem inseel, che thranoh in amahta mamaangnoh.

¹⁹Inihvah Ringpu atame mahche tukleiram apumte thranoh tuuikhat athlangah amme tih a irom.

²⁰Che Ringpu Asa kupa thlengsa, akchim amahta romma roulou itheihnatu rilta inimlanpei tih a irom; che inihvah amah Asa kupa Jisu Khrista akchimkuungah amsame. Amahvah akchim Ringpu, che ache amnoh chaan khasa.

²¹Indih naoeio, leili mathruunnata nanroua inseel inkemve.