Read Tarao Naga 2 JOHN 1 Bible Online

2 JOHN 1 - Tarao Naga bible

2 JOHN 1

¹Inchar chonnu mahche asa ei ankuungah, anparuul keiin nannihta taktak a kirilvolchou, mahche keikhopnoh a chuta akchim akrom mii naamte inkho nannihta nanirilvol,

²alamva inihting am akchim mahche inihsoh ache amnoh a amjoutupot akchim relna:

³Pa Ringpu tingna mahche Pa vaa Asa kupa Jisu Khrista tingna malungsi, rilvoltheih mahche leh oi achim khatkho rilvol in inihkuungah am veiso.

⁴Ipa in inihta initirh nanga nisa eiin akchim amijuihta kitheih in khalmo kiroomthok ang.

⁵Mahche chonnu o, ipek keiin kinoolche keiin akthar trongthuun nikuungah kimjih apaalla inih khatleh khat ril involreio tihrella kulkung nata kankuungah amkhata kimjih.

⁶Che mah i rilvol chusa mah chuvah inih in amah trongthuunta aknujuih a sehme; mah i trongthuunsa mahchuvah nannih in kulkung nata nantheih mahche nannih in nanjuih khatkho nanrilvolpei.

⁷Alamva Jisu Khrista in ruung veia thlengsa tih a mii in chimsa tih a son indah a mii masima khalmoa tukleiramma sehsei; mah i miita masimna miisei mahche Khrista ta andah miisei.

⁸Nannih in nantloh nankhalkha amaangnohnatu chuta nannih in nantloh khaankha chek a sip a nanphahnatu nantak nanroua cheksilve.

⁹Tukhat in akchimnata raldoia seh mahche Khrista rilla matheihna amnoh mii in atak ah Ringpu amnoh; akchimta matheihna ah incheknoh ak am amah in Pa mahche Asa kupa annih ta amah kuungah am.

¹⁰Tunangkhat in nankuungah thlenga akchim matheihnatu thlennohle nan inn akho lousoong nohve nohle saambaankho malannohve;

¹¹alamva amahta saambaan amlan mii khanna akthleng miisoh thranoh thloua chuum ajajoupei.

¹²Keiin nankuungah kimjihtu khalmo amsalakho muk nohle che huuina a majih indahsang, chuta inih roomthok ah mapung aphahnatu keiin nankuungah thlenga imaileh imai inmuh a nannihsoh trongnatu kimtuur.

¹³Nang niser asa eiin nangta saambaan namlanei.