Read Tarao Naga JUDE 1 Bible Online

JUDE 1 - Tarao Naga bible

JUDE 1

¹Jisu Khrista vaa roijuih mahche Jems anao Jude in aongche nankuungah, Pa Ringpu ting kirilvollei mahche Jisu Khrista turella kemma nansih in aongche nankuungah:

²Nankuungah malungsitheih, leh oi mahche rilvol in hanral veiso.

³Kirilvol eio, keiin nankuungah inih inaamtu vei chaanring rella kimijihnatu kansuullai akseeng ankuungah veikhatru amlan malotkharella ril luut a thrulhnatu nannihta tak a majih i keitu veia tlohnoh janoh veisa.

⁴Alamva mii arouta inruk a luut a malaannatu amijapei ammahturella matsah a ringjih in alouphoongchepei. Anmahvah Ringpu malot mii veisinna Ringpu vaa malungsita chimnohtingah anthlengche inihtu khalekru vei lulok mahche Akpu Jisu Khrista ta akjanohsei.

⁵Nannih in veikhatrua anaamteta rom sachoulakho ipek nannih in veikhatla nantheihnatu keiin kikdit, mah chuvah Ijip ramna miita akkal amah in aknua amahta amlotnoh mii eita ammaangei.

⁶Ringroiei phomta rimta sihnoh chuta anmah anphomta cheknoh a an amnata akmah ringroi eita amah in akliin pichaar aknikha aphahnohmiil thirhanga ache amnoh a khit a asihtuei;

⁷Sodom mahche Komorah che akomma ak am khuuboomei nanga, kumei kupa ah inlaalla tlohphunoh ruung in akditta mathlungnatu aktloh mii eita ache amnoh meia tanti atlohsam khata khudam veia amtheih ei.

⁸Mainangjimma amahmi in anrui i ruungta mabuurnatu madonna ammei, akchek amneh eita indah ei che paarthra ak ameita aminuih.

⁹Chuta aklok Maikel in seitansoh insuulla Moses aruungrella trong inkharhlaia tronga pichaar tlohnatu amah in karaangnoh, chuta ason, “Akpu in nakalso.”

¹⁰Chuta anmah invah romnoh a trongei, raprilsa in antlohnanga anmah in antrongtlam khanna antak anrouta insok a amimaang.

¹¹Anmah turelvah lahnasa a! Alamva anmah in Kain asehna ah sehsei, che Balaam in asoi khananga anmah in anchuungna jonna sehsei, che Korah invah alaal intheih a atrong majuihnoh nanga animaangpei.

¹²Anmah ivah nannih rilvol buhdoonna ah maraal am miisei, anmah in intri intra amnoh a anroua rou intlohjousei; tuii jaonoh sumphai thli in araan akthil kumveia inrahnoh theih, akjung inlong;

¹³antak anroua jakhatnoh thlouta apolsuuk tuiiboomvaa trihkhopna tuiiboom nangsei; aksehtlam arsisei anmah turelvah inthimma am athlangnungrem ache amnohta khaak a asihpei.

¹⁴Anmahkho Adam nata ringnatluun sirih tihpina Enok in phoonga ason, “Anve, Akpu in amah akseeng mii akpulsomsoh thleng,

¹⁵mii naamte chungah pichaar tlohnatu, Ringpu malotnoh mii naamte in Ringpu malotnoh thlou antloh; kanlaalpei tih a ril masuuknatu, che Ringpu malotnoh thranoh aleh am mii in amahta indangpia thranoh a trongei.”

¹⁶Anmahvah inso trang, anpel amnoh miisei, antak in anditta majuih a seh, annar ah in orh a trong, anchuungna anphahnatu miita amipaaksin.

¹⁷Chuta kirilvol eio, inih Akpu Jisu Khrista vaa raangroi in matsah a ansonkha intheihve:

¹⁸Anmah in nanisonvah, “Achetum laia mii manuih samanuih amtu; antak a Ringpu malotnoh a ring anditta majuih a sehtuei.”

¹⁹Onna inthrek baak amsuuk, tukleiramtu veimii antak a akchim amnoh.

²⁰Chuta kirilvol eio, nantak ah akseengrem malot khanna nanroua inseemve; Li Akseengah ngenve;

²¹ache amnoh a ringnatu inih Akpu Jisu Khrista vaa rilvoltheihta nanngaaklai, Ringpu vaa rilvoltheihta nantak ah amve.

²²Ril inhalmii aroueita rilvol mamuhve;

²³anmahta meinata kaia kal eive; mahche trihsoh inruuia aroueita rilvol eive, ruung in ambuur puunreita intirhve.

²⁴Pekva inriilnata nanikalchek amah kuungah daak amnoh roomthoksoh inruuia amah paarthra amaikuungah inimngirhtu,

²⁵Ringpu, inih Akpu Jisu Khrista apaalla inihta inikal, paarthra mahche akthloi achungah akpaal khatkho akchek amneh, leithingnata ipekphah chuche ache amnoh. Amen.