Read Tarao Naga MADANGNA 1 Bible Online

MADANGNA 1 - Tarao Naga bible

MADANGNA 1

¹Inlitnoh a intha a aksuuksam Khrista in amah roijuih ankuungah mamuhnatu Ringpu in Khrista kuungah amlan Jisu Khrista in amdangkha oire; amah roijuih John kuungah amah ringroita mathlah a mahchuta amrompei.

²John in Ringpu atrongta mahche Jisu Khrista vaa sakhi khatkho amah in amuh naamteta sakhi amlan.

³Mah inphoong trong ita rool inkaanga akpaa arungai mahche mah asuunga injihta ngaak a akseh ankuungah doi akphahsei; alamva lai i innaisa.

⁴John in Asia ah am khakla Sirih ankuungah: Ipek ak am, ak amche khatkho akthlengsam amah akuungnata che amah phompii amaikuungah am li sirih nata,

⁵mahche Jisu Khrista tingna malot aja sakhi, akthi ankaar nata matsah a akpok mahche thaleichungah kurung anchungah akpu veia akpaal Jisu Khrista ningah malungsi mahche leh oi nankuungah amso.

⁶Che amah Apa Ringpu akuungah inihtu kurung mahche thiimpu amvei amah kuungah, paarthra mahche akchek amnehveia paalkha ache amnoh veiso. Amen.

⁷Anve, amah in sumphaisoh inruuia thlengtu. Mii naamte mit in amahta anmuhtu, amahta kusei a akkho miiluung inkho amahta anmuhtu; mahche thaleina jaat naamtein amahrella sinthruui tuei. Mahchu veitu. Amen.

⁸“Keivah Alpha khatkho Omeka,” Akpu Ringpu in ason, Ipek ak am, ak amche khatkho athlengsam, akchek amnehrem khasang.

⁹Nannih nan uhnao John keiin, nannihsoh inruuia Jisu rella trihkhop klah knanga, khatkho kurung huunna ah, mahche Jisu vaa doutrangah chuum akphahjou keiin Ringpu trongta mahche Jisu vaa sakhirella Patmos antih tuiikoiramma ammang.

¹⁰Akpu nia keiin Li ah ammang, mahche keikuungah pik ul ahounanga ahousuuk roolkhat keiin kitheihpei.

¹¹Mahchunna ason, “Nangin nimuhkha nirik ah majihro che mahkha Asia ah am khakla sirihtinga machuvah: Ephesia ah, Smarna ah, Perkamam ah, Thiatria ah, Sardis ah, Philadelphia ah mahche Laodisia ah mathlah eiro.”

¹²Mahchunna keikuungah tronghou khata kiannatu inheisang, keiin kanhei in ra — ao vaa mitton akeh sirihta kimuhpei,

¹³mitton taarna akeh sirih ankaara inluut insuul silh a mahche ra — ao inraakna ah alukhe a inkhit miivaa asa kupa nang inhat kimuhpei;

¹⁴amah akang mahche asam in samul nanga inngou, huur nanga inngou; che amah amit in meibom kvaar nanga kvaar;

¹⁵amah akeh majaavah meia soorra intlenche pithrainang, che amah ahouin tuiitam inborra kluung ahounang;

¹⁶amah akchangkut ah arsi sirih achoih, kveichanga aha innih kngeih chemsei khat amah abaonata inthruh, che amah ameelva khalmo tranga insaa a kvaar kininang.

¹⁷Keiin amahta kimuhlai, akthi mii nanga akehkungah inriilsang. Chuta akchang kut in kei kitakchunga sih a keisonang, “Intrinohro, keiva matsahrem khatkho achenarem khasang,

¹⁸keiva akring khasang, keiva thisang, che anve keiva ache amnoh luungtu veia ringsang, repnang leh kthivaa chapi keikuungah am.

¹⁹Ipek nangin nimuh eikha, pek akvei mahche mah i aknua akveisam kharelna majihro.

²⁰Kei kikchang kut ah nangin nimuh arsi sirih mahche ra — ao vaa mitton taarna sirihvaa anthuptrong khavah: arsi sirih in khakla sirihvaa ringroisei mahche mitton taarna sirih in khakla sirih khasa.”