Read Tarao Naga MADANGNA 12 Bible Online

MADANGNA 12 - Tarao Naga bible

MADANGNA 12

¹Ringramma trihkhopna aksuuksam daangkhat indangsa, kumei khat in kinita puun nanga asilhpei, thla in amah akehthuuia am, che arsi somlei innihvaa boorpiikhat amah akanga am;

²atak in nao inpooi, amah in nao apoksam rella khalmo klah knang phah a trnga inkoua amsa.

³Mahche aktlei trihkhopna daangkhat ringramma indangsa, anro, kliin in aang ruulpii munuhkhat amah akangvah sirih che aki som am, mahche amah akang sirih ah kurung boorpii sirih akhum.

⁴Amah akmeii in marvaanna arsi eita inthumsunga inkhat akmeii ah haia thaleichunga ahunthlakpei. Kumei khanna asa apoksoh ruulpiinu manuhkhanna alousaaknatu amah amaikuungah ngirra amsa;

⁵Jaatboom naamteta thir sungrolh in akpuihnatu kumei khanna asa kupakhat apokpei, amah asa kupata Ringpu kuungah che amah phompii kuungah ahanpei,

⁶Che Ringpu in machaanga asih rapril khanna kumei in tlaansa, alamva amah amunkhanna mii in amahta nijan akpul khatleh reija innih alei sopruk masaak a anjoktu.

⁷Ipek ringramma raal suuksa, Mikhael mahche amah ringroi in ruulpiinu chungah raal antlohpei; che ruulpiinu mahche amah ringroi inkho raal antlohpei,

⁸chuta ruulpiinu in raalkha achekpei, che ringramma anmahtu an amna amun veikhat inlenga amnohsa.

⁹Kliin ruulpiinu, leithingna muruul, akming rappu khatkho Seitan antih tukleiram pumteta masimna amahkhata manomma thaleichungah ahunthlakpei, che amahsoh inruuia amah ringroi eikho ahunthlakpei.

¹⁰Cheva ringramma roolhou inkaang khat in mah ason ita kitheih, “Ipek chaanring, tuui khatkho inih Ringpu kurung huunna mahche Khrista vaa akchek amnehkha thlengsa, alamva inih unao eita Ringpu amaikuungah juktiing khulouhthlang malaalla aktrang amahkhata ahunthlakpei.

¹¹Amahta anmah in sadamte vaa athii apaalla mahche anmah anringtukna thaminta sakhi apaalla raal anchekpei, alamva anmah in anthih phah akho anchaanta anrilvolnoh.

¹²Alamchunna ringram che mahsuungah am eio, roomthokve! Chuta thalei khatkho tuiiboomma ak am turelva lahnasa a! Alamva Seitan in amah laikha kakningsa ta arompeia, khalmo inhaanga nankuungah thlengsa!”

¹³Ruulpiinu khanna keita thaleia keithlaakpei tih a aromlaia asa kupa akpok kumeikhata akchutpei.

¹⁴Chuta kumeikuung akhanna amah in amna rapril khanna juung acheknatu kliin barmuvaa amthlah innihta amlanpei, che amahta muruul in aphahcheknoh natu amunkhanna lai kak, lai soot a, mahche lai tangkhai amsaak am iinpei;

¹⁵muruul in kumeita tuiiliinchungah amthlaannatu, kumeikuunga avaananga tuiita abaonata amsahpei.

¹⁶Chuta thalei in kumeikhata akalnatu ruulpiinu in abaonata amsah avaata amduulpei

¹⁷Chunna ruulpiinu in kumeikuung khanna khalmo amlung inhaangsa che amah in kumeivaa atute, trongthuunta ngaak a akseh khatkho Jisu vaa ringtukna thaminta akchoi ei in raal tlohnatu inthruhsei.

¹⁸Che amahvah tuiiboom sitsaichunga ngirsa.