Read Tarao Naga MADANGNA 13 Bible Online

MADANGNA 13 - Tarao Naga bible

MADANGNA 13

¹Mahche aki som, akang sirih am, che anmah ankangchungah boorpii som am chela ankang ankangah mii manuih samanuih am saraang tuiiboomnata inthruh kimuhpei.

²Che keiin kimuh saraangkha jokpiinang, amah akeh majaava kuvom akeh majaanang che abaoin saruung abaonang mahche ruulpiinu khannasa kuungkhanna amah atuui, phompii che akliin akchek amnehta amlanpei.

³Amah akang khatvah thi aja a asoknanga intloh, chuta amah kuungah khalmo asokna munkha thrasa, che thalei apumtein salungkhou seia saraang aknuta anjuihpei.

⁴Mii in ruulpiinuta amithruunpei, alamva amah in saraang kuungah akchek amnehkha amlanpei, che anmah in sa ta mathruunna antih, “Saraangkha amahnang tunang amme? Amahsoh raal antlohpichek tunang amme?”

⁵Che saraang kuungah akthloi trong atrongnatu mii manuih samanuih atrongnatu bao amlanpei, che thla soplilei innih phao akchek amnehta ahuuinatu amjapei;

⁶saraang khanna aanga Ringpu ta manuih a amah akming, amah thiil khatkho ringramma am anmah anchungah thranoh a trongsa.

⁷Akseeng mii eisoh raal antlohnatu che anmahta cheknatu saruung khata tuui amlanpei.

⁸Tukleramna jaatih ei antrong che jaatboom naamte in anthat sadamte vaa akring nirik ah anming anjihnoh miinaam in sa khata amithruuntu.

⁹Amkuur am miikhan rungai eiso

¹⁰Tunangkhat raalla suura ansehpi mii in roi veia sehtu; chemseiah inthat tupotle chemseiin inthattu tla. Onna akseeng mii in douchekna mahche malotna am.

¹¹Mahchuche aktlei saruung inkhat thaleinata inthruh kimuhpei; sadamte nanga aki innihche amah in ruulpiinu nanga trong.

¹²Amah in matsahna saraangvaa achek amneh pumte sa amaikuungah aleengna, che thalei khatkho mah khanna am mii eita thi ajaphah a insokta akthra matsahkhata mathruunve tih a amithruun.

¹³Amah in khalmo kliin daang jikcha tloh a miimai kuungah ringramnata thaleichungah mei luungkho amthlak.

¹⁴Che saraang maikuungah amlan daang jikchavaa apaalla, thlou tlohnatu amjakha thaleia ameita asimna, tukleiramma am ankuungah chemseiin thihna phah a amsoh eichuta akring saraang leili khat seemnatu ason.

¹⁵Saraangvaa leili khata akphuk malannatu amahchungah akchek amneh amlanpei, chunna saraangvaa leili in atrongnatu che leili khata amthruunnoh annaamteta thatnatu relnasa.

¹⁶Mah in indih khatkho inrol mahche kdoon khatkho inranriing mahche thlaang thlaang khatkho naichi pumteta kveitong kut nohle anmah amichalla daak asih ei.

¹⁷Chunna sa khavaa daak nohle ming nohle amah akming amasingta akphah khanoh a tunangkhat in lei nohle juur majanoh.

¹⁸Manna lousing inithun: Mahkhata room acheknatu lousing am mii khanna saraangvaa amasingkha teennatu suulso alamva mah i miikhatva amasing; amah amasing khavah reija kuruk che sopruklei kuruk (666).