Read Tarao Naga MADANGNA 14 Bible Online

MADANGNA 14 - Tarao Naga bible

MADANGNA 14

¹Che keiin kian in, Jaion muulchungah Sadamte inkhat ngirra am kimuh, amahsoh inruuia anmah amichalla amah Pa mingta inijh mii choihkhat akpul soplilei manli ammei.

²Mahche ringramtingna houkhat khalmo tuiitam ahounanga che aktrang khu inrinanga ktheihpei; mahche snanta aksuk eiin snantata ansuk ahou khananga kitheih.

³Anmah in phompii manli anmaikuung khanna mahche anparuul anmaikuung khanna mah akthar laa ita antloh. Thaleichung nata athlokche mii choihkhat che akpul soplilei manli khanoh a aktlei tukhat inkho laakha room cheknoh ei.

⁴Mahmii eichuvah kumeisoh inchunnoh, alamva anmahvah akseengsei anmahvah sadamte in aseh asehnata aknu akjuih miisei, anmahvah Ringpu mahche sadamte vaa akrah veia mii tingnata inthlokchesei,

⁵anmah anbaoa mii masimna trong intuuknoh, alamva anmahvah thranoh daak amnohsei.

⁶Che aktlei ringroi inkhat in ringram alaia juunga am keiin kimuh, thaleia am jaatboom naamte, jaat naamte, trong naamte khatkho miinaam kuungah araannatu ache amnoh akthratrong amah kuungah am;

⁷che amah in roolhou inkaanga ason, “Ringpu ta trihve che akuungah paarthra malanve, alamva amah in pichaar atlohnatu pungkha thlengsa; ringramta, thaleita, tuiiboom che dop anaamteta akseem amahta mathruunve.”

⁸Innih tihpi aktlei ringroi khatin amah aknuta juih a ason, “Inriilsa, jaatboom naamteta kumei kupa seengnoh thlou rella tuiibuh maiinnatu aktloh akliin Babilon kha inriilsa.”

⁹Anmah annungtongna inthumtihpi aktlei ringroi khat in anmahta juih a ahoutranga onga ason, “Tunangkhat in sa khata che amah leili khata mathruunleva chela amah amchalla nohle akut ah daangta intuuknoh leva,

¹⁰amah inkho amlung inhaang khananga kam khanna asuungpot anpoolnoh Ringpu in amlung anhaangna tuiibuhkhata a iintu; che amahta akseeng ringroi khatkho sadamte amaikuungah mei leh salphar haaalla amlahtu.

¹¹Anmah in anhaalna meikhukha ache amnoh a achungah kalla hang, saraang khata che amah leilita amthruun khatkho amah akmingvah daak antuukna mii khavah suun khulouh inngai phahnoh ei.”

¹²Onna akseeng mii in ansingnatu lousingkhat am, onna Ringpu vaa trongthuun mahche Jisuta malot a akdouchek mii ammei.

¹³Chela ringram tingna roolhou khatin kikuungah asonta kitheih, “Mah i majihro: Peknata Akpu tinga akthi anmah eikha doiphahsei.” Li in ason, “Tak a adoi akphahsei.” Li in anmah anthlounata inngai anphahnatu, che anthlou in amah annuta anjuih.

¹⁴Mahche sumphai inngou inkhat che sumphai achung khanna asa kupa nang inbok a am ke in kimuhpei, amah akangah ra — ao boorpii che akut ah tokoi ngeih inkhat achoih.

¹⁵Aktlei ringroi khatin mathruunna thlaamnata inthruhsa, amah in sumphai achungah anbok akuung khanna ahousuuk a ongsa, “Nang tokhoikha thlaak a vaatrosa, alamva chi luhnatu pungkha thlengsa, alamva thaleina chi luhna turella chikha minsa.”

¹⁶Chunna sumphai chungah anbok khanna thaleiah amah tokoi athlaakpei, mahche thaleita avaatpei.

¹⁷Mahche aktlei ringroi khat in ringramma mathruunna thlaamnata inthruhsa, che amahkho tokoi angeihkhat achoih.

¹⁸Aktlei ringroi khat in thiilkuung nata inthruhsa, meichungah amah ringroi in tuui am, tokoi angeih akchoi akuungah roolsuuk a onga ason, “Nang tokoi angeihkha thlaakrosa, mahche thaleina nganglirah eikha matlonrosa, alamva thaleina nanglirah eikha minsei.”

¹⁹Mahche ringroiin amah tokoita thaleia thlaak a, thaleina nganglirah ta amtlonpei, mahchu Ringpu in inraatkanga inhaanga nganglirah soorna amunkhanna alonpei;

²⁰anmah in nganglirah ta khuuboom apaalla anchilh, che nganglirah soorna ah thii kluungkha skolbaotal inkaanga mel reija innihvak.