Read Tarao Naga MADANGNA 17 Bible Online

MADANGNA 17 - Tarao Naga bible

MADANGNA 17

¹18 Che kam sirih aksih ringroi sirih ankaarna khat in thlenga keikuungah ason, “Tiingvaro, tuiitam chungah inbok a am khalmo kochanoh atakjuur kumeichungah tlasam pichaarkha keiin nangta nammuhtang,

²thaleina kurung jikcha in amahsoh inlaaljousei, che thaleichungna mii inkho tuiibuh an iinche inruiia amahsoh inlaaljousei.”

³Che Li in keita raprilla keiphurh ang, mahche Ringpu ta manuih a aktrong mingin sip akang sirih che aki som am, an aang saraang inkatchungah kumei inkhat in inbokha keiin kmuhpei.

⁴Kumeikhan bukal mahchuleh in aang amchu puun asilh, ra — ao, harngou, khatkho amantam lunga inliing, akut a intirhsa khatkho kumei kupa inlaalthlou akbuur in sip ra — ao kam inkhat choia am,

⁵amah amchalla iromcheknoh inthup mingkhat injih khavah, “Kliin Babilon, antak akjuur khatkho thaleia intirhsana annu.”

⁶Akseeng mii anthiita mahche Jisu rella anthatmii anthiita iinna inrui kumei khat keiin kimuhpei. Keiin amahta kimuhlai asonna amnoh a salungkhousang.

⁷Chuta ringroi in keita keisonang, “Jarella nangin salungkhou cheme? Keiin nangkuungah kumei khavaa anthuptrong che amahta akphurh akang sirih khatkho aki sirih am saraang kharella naksontang,

⁸nangin nimuh saraangkha amta ipekva amnohsa amah in adongna amnoh khurnata inthruhtu, che amah in repnanga sehtu, ak amche, ak amnoh mahche ak amsam saraangkha anmah in anmuhlaia tukleiram mathronnoh lainata anmah anmingta akring nirik ah anjihnoh thaleichunga ak am mii in salungkhou tuei.

⁹“Onna lousing amna turella athlou tla: Akang sirihkhavah kumei in anbokna muul sirih khasa;

¹⁰anmahkhavah kurung sirih ei ankaarna rangavah inriilsei, inkhatva ammang, aktlei khava thlengnohmang, amah in athlenglai kakruta am uning.

¹¹Louamche khatkho amnoh saraang khavah kirit chuta sirih ankaarna khatva repnanga sehsa.

¹²Che nangin nimuh aki somkha pekphah kurung veia anpaalnatu tuui akphahnoh kurung somsei, chuta anmah in kurung nanga saraang khasoh inruuia pungkhat turella akchek amnehva anphahpei.

¹³Anmah in rilkhat veijouei, che anmah antuui khakho anchek aminehta saraang kuungah amilan.”

¹⁴Anmah in sadamte chungah raal antlohtu, cheva sadamte in anmahta raal achektuei, alamva amah in Akpuei chungah akpu, che Kurungei chungah kurungsa, che amah in anruuipi mii eikhavah amah in a ongche, acharche malot aja miikhasei.

¹⁵Chela amah in keita keisonnang, kumei in anbokna tuiitam nangin nimuh, miitammei, jaatboomei, che trong khalmo tammei.

¹⁶Nangin nimuh aki somleh sa khanna atakjuur kumeikhata intirh tuei; che amahta amimaangtu, puunrei masilhnohtuei, amah aruungta ansaaktu, che amahta mei anhaaltu,

¹⁷alamva Ringpu in asontrongta atlungnohmiil ril khlek anveinatu, che anmah kurung huunnata saraang kuungah amilannatu anmah anrilsuungah amah in amdonta antlohnatu anmah anrilla Ringpu in athunpei.

¹⁸Mahche nangin nimuh kumeikha thalei kurung anchungah akpu veia akpaal kliin khuuboom khasa.