Read Tarao Naga MADANGNA 18 Bible Online

MADANGNA 18 - Tarao Naga bible

MADANGNA 18

¹Mah i aknua aktlei ringroi khat in ringramnata trum keiin kimuhpei, amahninga akchek amneh khalmo am; amah amtik in thaleita amvaarpei.

²Che amah in roolhou inkaanga onga ason, “Inriilsa, inriilsa kliin Babilon! Rappu ramnai in a amna, akseengnoh in an amna, intirhsa akvei annaam in an amna hukveisa;

³alamva jatboom naamtein amah kumeivaa seengnoh tuiibuhta iinna inruiisei, thaleina kurung eiin amahsoh inlaaljousei, che thaleita aklei akjuur eiin amahvaa akseengnoh adoon akhaal khanna anmah in kdoon hukveisei.”

⁴Chela ringramtingah aktlei roolhou khat in asonkha keiin ktheihpei, “Kei kimiieio, nannih in amah aleh khanna akhol nanveijounoh natu mahche amah in aphah klah knang khanna chuum nanphahnoh natu amah ningnata inthruhve;

⁵alamva amah alehkha ringram phah a inpeisa, che amah achimnohkha Ringpu in intheihsa.

⁶Amah in nannihta rou nanihtloh khananga nannih inkho amahta rou tlohve, che amah athlou nujuih a amahningakho saruk innih malanve; mah inpool kam khanna amah turella saruk innih mapoolve.

⁷Amah akroua paar mathrat a che chimnoh thranoh lamma leeng khananga amah kuungah klah knang khatkho marhuuikha intrimma akuungah malanro. Alamva amah arilla trong, ‘Keiin kurungpii inkhatveia inboksang, keivah trulmeinu noh ang, keiin tiknikho marhuuina muhnohtung.’

⁸Chunna nikhatvah amah kuungah natna rii, kna ksa, marhuui che buhchaal thlengtu, che meiah kaangtu; alamva amahta pichaar aktloh Akpu Ringpu vah akchek amnehsa.”

⁹Che amahsoh kumei kupa inlaalthlou tlohjoua khatkho thranohoonga ril mathlanna amjou thaleina kurung eiin amah in mei akaangna meikhukha anmuh in, amahrella anmah in traptruuia marhuui tuei;

¹⁰amah in anangkhata anmuh in intria saraalla ngirra anson, “Lahnasa a! Lahnasa a! Akchek amneh khuuboom Babilon! Pung khatsuunga nang pichaarkha thlengsa.”

¹¹Mahche thaleichungah aklei akjuur eiin amahrella trapsei che marhuuisei, alamva tukhat inkho anmah anpoot ancheita anleinoh rella,

¹²pootchei chuvah ra — ao, harngou, amanchaal lung, doilung, puun intle, bukal amchu puun, innaal khatkho in aang puun, amrimtui thing, kusaiha, amanchaal thing, kuri, thir che innaal lungou,

¹³charong, maroi, mekruk, amrimtui thao, amrimtui haalna, nanglituii, thao, akthra jaamleh kehu, siil, sadam, skol khatkho skol kari, naichi mahche miivaa anli.

¹⁴“Nang nikli in akdit akrahkha nang nikuungnata sehsa, che nangtu aktui khatkho akthra naamte nangkuung nata maangkirsei, nangin anmahta veikhat inlenga tuuknoh usache!”

¹⁵Amah apaalla doon akphah ei poot akjuur eiin, amah in alah anangkhata intirh seia saraalla ngirra che traptruui mahche marhuuia ansonpei,

¹⁶“Lahnasa a, lahnasa a! Akthrapuun, mangkra amchu puun aksilh, mahche ra — ao, amanchaal lungin khatkho doilungin inliing kliin khuboomkha!

¹⁷Alamva pung khatsuunga doonkhaal naamte maangsa.” Muli akpu, muli chuunga akseh, muli akthouei che tuiiboom chungah sehloonna ringnatu akthrulh naamtein inlaa a ngirsei.

¹⁸Che amahta mei in akaangna meikhu hangta anmuh in anmah in onga antihpei, “Mah kliin khuuboom i maisoh intrim khuuboom am ume?”

¹⁹Che anmah in ankangah phil inbahsei, ongsei, trapsei mahche sinthruuia antihpei, “Lahnasa a! Kliin khuuboom turella mahchuvah muli akdoon eiin amah kumei in adoon apaalla kdoon anphahkha! Pung khatsuunga adoon akhaalkha maangsa.

²⁰Ah ringram, anmah turella roomthokve, raangroiei, ringraanei, ringramei, akseeng miieio, alamva Ringpu in nannih turella amahchungah pichaar atlohtu!”

²¹Cheva akchek amneh ringroi khat in buhsukna lungnanga inrolkhat alohche tuiiboom suungah loonna ason, “Nga tloh a kalthihang housoh inruuia kliin khuuboom Babilon ta alontu che veikhat inlenga intuuknoh usa;

²²mahche snanta aksukei, laahoi leenga aksukei, pasi aktumei khatkho pik ul aktumei anhou nankuungah veikhat inlenga intheihnoh usei! Che thiim tlohna tupoot anaam thiimtloh mahche aktlei tukhatkho veikhat inlenga nangkuungah tuuknoh usachou, sumlung ahou veikhat inlenga nangkuungah intheinoh usa;

²³che nankuungah akvaar in veikhat inlenga vaarnoh usa; che changri leh thirei anhou nankuungah veikhat inlenga intheihnoh usa; alamva nangturel avah akjuur akleikha thaleia anbok miisei, che nang leiva in jaatboom naamteta nisimnapei.

²⁴“Che ringraanei, akseeng miiei, khatkho thaleichunga anthatmii annaamtevaa anthii amah kuungah antuukpei.”