Read Tarao Naga MADANGNA 19 Bible Online

MADANGNA 19 - Tarao Naga bible

MADANGNA 19

¹Mah i aknua ringramma mii khalmo tamhou nanga kitheih, “Haliluia! Chaanring, paarthra, mahche tuui i inih Ringpu atasa;

²alamva amah pichaarvah chim che kseeng, amah in kupa laalthlou a thaleita mamot akliin atakjuur kochanoh khata amah in pichaar atlohpei, che amah in amah Akpu roijuih anchungah thii amthlaakta amah in athung alohtu.”

³Veikhatla amah in ongsa, “Haliluia! Amah akuungah meikhukha ache amnoh a kalsa.”

⁴Che anparuul sopnihlei manli mahche akring kutseem manli in intolhtlep a phompii ah anbok Ringpu ta mathruunna ason, “Amen. Haliluia!”

⁵Phompii tingnata roolhou khat in ason, “Amah roijuih nannaam, che amahta aktrih andih anrool nannaam in Ringpu ta mapaakve.”

⁶Cheva tuiitam ahou, keklei tla ahou, mahche miitam ahounanga onga ason kitheipei, “Haliluia!” Alamva akchek amneh inihtu Akpu Ringpu in paalsa.

⁷“Inih in tlanrei, roomthokrei che amahta paar mathratrei, alamva sadamte vaa changvaangkha thlengsa, amah changri in inchaang chesa.”

⁸Intle akseeng, akthra puunrei silhnatu amah kumei kuungah amlanpei, alamva akthra puunrei akseeng miivaa akchim thlousa.

⁹Mahkha ringroi in keichungah ason, “Mah i majihro: Sadamte vaa changvaang buhdoonna kouh akphah eikha doiphahsei.” Che amah in keita keisonang, “Mah i Ringpu vaa akchimtrong.”

¹⁰Chunna amahta kamthruunnatu keiin akehkungah intolhsang, chuta amah in keisonang, “Mah i tlohnoh tupotche Jisu vaa aringtukna thaminta amlan nangsoh mahche nang unao eisoh roijuih akveijoukha keisang. Ringpu ta mathruunro,” alamva ringtukna thamin phoongi Li vaa ata.

¹¹Mahche ringram inhoong keiin kimuhpei, cheva anro, skol inngou akthou amah akmingvah Malot aja khatkho Akchim tih a an ong amah akchimlamseh khanna pichaar atlohche raal atloh.

¹²Amah amitva mei nanga intruunga seh mahche akangchungah boorpii tam am; amahnoh a tukhat inkho anromnoh villa amijihming inkhatkho am.

¹³Thii inlup lungluut amah in asilh, che amah akmingvah Ringpu Atrong tih a an ong.

¹⁴Che ringramma raalmii in akseeng akthrapuun inngouleh intle a inliingseia skol chuunga amah aknuta anjuih.

¹⁵Jatboom eita atuknatu chem angeihkhat abaonata inthruh, che amah in thir sungrolh choia anchungah paaltu; amah in Akchek amnehrem Ringpu in inhaanga asaona nganglirah soorna ah akchilh ei.

¹⁶Amah inluut insuulchungah che amah amtorchungah “Kurungei chunga kurung mahche Akpuei chunga Akpu” tih a villa injihming inkhat am.

¹⁷Cheva ringroi khat in kini ah ngirra amkha keiin kimuhpei, amah in ringram alaia akjuung va eita rool inkaanga onnga asonei, “Thlengve, Ringpu vaa akthloirem bohdoonna khanna inboomve,

¹⁸nannih in kurungei anruung, raalmii akpuui ei anruung, akchek amneh miiei anruung, skol mahche akthouei anruung mii naamte anruung, thlaang thlaang khatkho naichi, aksiin khatkho akliinvaa anruungta nansaaknatu thlengve.”

¹⁹Skolchung akchuung khatkho amah raalmii eita indenpia raal intlohpinatu saraang leh thaleina kurung in anmah raalmiisoh inruuia inchaangjou keiin kimuh.

²⁰Che amah amaikuungah salungkhouna thlou aktloh saraang khatleh chimnoh ringraan ta suura simma asihpei, amah daang khanna inromna veia sa vaa daang ak am mahche sa khavaa leilita amthruun eita amah in amsimnaei. Salphar soh kaanga am meipii khanna kiringa anmah innihta alonpei.

²¹Che skol akchuung akpu vaa abaonata anthruh chemsei khanna anlei makheita athatei; cheva annaamte in anmah anruungta ansaakche anvon invahsei.