Read Tarao Naga MADANGNA 22 Bible Online

MADANGNA 22 - Tarao Naga bible

MADANGNA 22

¹Ringpu mahche sadamte vaa phompii nata kiluung lungrilnang intle akseeng akring avaa inkhat amah in keita kammuh ang.

²Mah khuuboom alaikhanna che mah avaapang innihkhanna ringna thing moonga am, mah thingin athalrel aje jea akrah inrah; mahthing anah in jatboom annat ansatta amthratei.

³Mah khanna veikhat inlenga phool amnoh usa, chuta Ringpu khatkho Sadamte vaa phompiikhan mah khanna amtu, che amah roijuih eiin amahta amithruuntu.

⁴Anmah in amah ameelta anmuhtu, che amah akmingkha anmah amichalla amtu.

⁵Mah khanna veikhat inlenga khulouh amnoh usa; anmah turella mitton nohle kini kvaar akanana amnoh usa; alamva Akpu Ringpu in anmahtu akvaar veitu, che anmah in ache amnoh a paaltuei.

⁶Che amah in keikuungah keisonang, “Mah ei i chim khatkho malotphu. Akpu Ringpu in intha a aksuuksam khata amah aroi ankuungah mamuhnatu akseeng ringroi eita amthlah ei.”

⁷Anro, keiin intha a thlengtung. Mah nirik in aphoong trongta amjuih miikha doiphah veisa.

⁸Mah ita aktheih mahche akmuhkha John keisang. Che mah ita keiin kitheihlai mahche kimuhlai, keikuungah kammuh ringroi akehkungah mathruunnatu inluksang;

⁹Chuta amah in keikuunga keisonang, “Mah i tlohnohro! Alamva keivah nangsoh mahche nang unao ringraan eisoh khatkho mah nirik ita ngaak a majuih a akseh roijuih akveijou miisang, Ringpu ta mathruunro.”

¹⁰Che amah in kikuungah keisonang, “Mah nirik ah aphoong trongi chum namnohro, alamva lai knaisa.

¹¹Thranoh aktloh amahkhan thranohta nga tloh a amso, akbuur amah khanna buura nga amso, akchimlamseh amah khanna chimma nga amso, akseeng amah khanna seenga nga amso.”

¹²“Anro, keiin intha thlengsang, miirelta amah amah in atlohthou nujuih a keiin kamlannatu nantlohkhaan thlenna thlengsang.

¹³Keivah Alpha khatkho Omeka, matsah khatkho achena, kulkung khatkho kulrel khasang.”

¹⁴Anmah inluut insuulta aksuk eikha doiphasei, mahchuvah anmah in ringna thingkhata phahnatu mahche khuboomvaa thong eikhanna anluutnatu amitik ankuungah am.

¹⁵Apaalla ak am miiei chuvah uiisei, leiva aktlohsei, kumei kupa aklaalsei, miithat miisunsei, miimei miimasal aklaalsei, leili amthruunsei. Chimnohta rilvol mahche antlohja aktloh miisei.

¹⁶“Khakla ei ankuungah mah ringtukna thamin ita malannatu Jisu keiin kei ringroita nankuungah kamthlahpei. Keivah Devit vaa akjung khatkho atute, intle arsi kvaarnu khasang.”

¹⁷Li in mahche thirei in ason, “Thlengro.” Maita aktheih amah in sonso “Thlengro.” Che tuii akraal amah in thlengso, akdi amah in akringvaa tuiita khangvaalla iinso.

¹⁸Mah nirik in aphoong trong ita arungai miinaamta kikchaakchou tukhat in mah injih ichungah daakleva, Ringpu in achungah mah nirik asuungah injih natna rii eikha achungah adaaktu,

¹⁹che tukhat in mah nirik ah aphoong trongta loujok leva, Ringpu in akring thingnata che mah nirik asuungah injih akseeng khuuboom nata amah achuumta alohtu.

²⁰Mah ringtukna thamin ita amlan amah in ason, “Ta tak a keiin intha thlengsang.” Amen. Thlengrosa, Akpu Jisu!

²¹Akpu Jisu vaa malungsi in akseeng mii nannaamteta nanimruui veiso. Amen.