Read Tarao Naga MADANGNA 7 Bible Online

MADANGNA 7 - Tarao Naga bible

MADANGNA 7

¹Mah i aknua thalei akiing manlia ringroi manli in ngirra am kimuh. Thaleiah nohle tuiiboomma nohle aktlei thingkhat achungah jangkhat thli in araangnoh natu, anmah in thaleina thli manlita amituh

²Ringpu vaa chum akchoi aktlei ringroi inkhat in nisuuktong nata achungtonga kal keiin kimuh, che thalei khatkho tuiiboomta masoknatu tuui amlan ringroi manlikuungah onga ason,

³“Kannih in Ringpu aroieita anmah amichalla chum kansunnohmiil thaleita nohle tuiiboomta nohle thingeita masok mamaang tlohnoh eive.”

⁴Che chum anampot amasingta keiin kitheihpei, Israel jaitihrel ansa kupata chum anam anmasingkha choi khat che akpul soplilei manli ei,

⁵Judah jatih nata mii akpul somleinih chum anampei. Reuben jatih nata mii akpul somleinih, Kat jatih nata mii akpul somleinih,

⁶Aser jatih nata mii akpul somleinih, Naphtali jatih nata mii akpul somleinih, Manasseh jatih nata mii akpul somleinih,

⁷Simeon jatih nata mii akpul somleinih, Levi jatih nata mii akpul somelinih, Iskhar jatih nata mii akpul somleinih,

⁸Jebulun jatih nata mii akpul somleinih, Joseph jatih nata mii akpul somleinih, Benjamin jatih nata mii akpul somleinih eita chum anampei.

⁹Mah i aknua keiin kimuh, tukhat inkho teen ancheknoh miitam, jatboomnaam nata, jatihrel nata mahche trong naamte tingnata puungou insuul silh a mahche ankut ah tuum abaak choia miitamin phompii ah che sadamte amaikuungah ngirsei,

¹⁰che ongsei, “Chaanringvaa phompii chungah anbok inih Ringpu mahche sadamte tingna!”

¹¹Che ringroi naamtein, phompii, anparuul, mahche akring kutseem manlita inhiilla ngirra ammei, che phompii maikuungah intolhtlep a Ringpu ta amithruunpei,

¹²Che anson, “Amen! Doiphahthra, paarthra, lousing, mapaak, injahna, tuui mahche akchek amneh ache amnoh a inih Ringpu in paal veiso! Amen.”

¹³Cheva anparuul suungna khat in keita keisonang, “Insuul puunngou aksilh ei i tueime? Che anmah i ramnata thleng eime?”

¹⁴Keiin amah kuungah kison, “Lulok nangin nirom.” Che amah in keikuungah ason, “Anmah i trihkhop a klah knang phahna khannata inthruh ei che anmah in insuul puunrei eikha sadamte vaa athii khanna amingoupei.

¹⁵Alamchunna anmah in Ringpu phompii maikuungah amma anmah in suun jaan amah mathruunna thlaamma amahta rou antloh; mahche phompii chungah anbok in anmah ankaara luuttu.

¹⁶Anmah in veikhat inlenga traamnoh usei, tuiiraal tihkho amnoh usei, kini insaa inkho jaia kchaar tihkho amnoh usei.

¹⁷Alamva phompii alaia akm Sadamte in anmahta aseltuei, mahche akring Ringpu vaa dopkhanna anmahta asehpi tuei; mahche Ringpu in anmah anmitnata ruithli naamtea anuultuei.”