Read Tarao Naga MADANGNA 8 Bible Online

MADANGNA 8 - Tarao Naga bible

MADANGNA 8

¹Sadamte in sirih tihpi chum amhoonglai, pungkhaivak ringramma jakhatkho ahoula intheihloua daichritsa.

²Ringpu amaikuungah akngir ringroi sirih che ankuungah pik ul sirih amlankha keiin kimuh.

³Che mekruk haalna ra — ao kam akchoi aktlei ringroi khat in thlenga thiilkuunga ngirsa; che phompii amaitalla am ra — ao vaa thiilkuung achungah akseeng mii annaam in mekruk tam amlanpei,

⁴Che ringroi akutnata Ringpu amaikuungah mekruk meikhukhan akseeng mii in anngenkhasoh kalsa.

⁵Che ringroi in mekruk haalna kamkha alohpei, mahche thiilkuungna meita thaleichungah ahunlonpei; mah khanna khu inri, khalmo houtam, kini inthla che runaangnu thousa.

⁶Pik ul sirih akchoi ringroi sirih in pik ul antumnatu inchaangsei.

⁷Matsahna ringroi in amah pik ulta atumpei, cheva khurah mahche mei in thiisoh inpoolla tlasa, che mah eichuta thaleichungah tlasei; che thalei in inthum suunga khat kaangsa, thing eikho inthumsunga khat kaangsei, mahche in em inlou naamte kaangkirsei.

⁸Innih tihpi ringroi in amah pik ulta atumpei, che muulpii meikaang nanga tuiiboomma ahunthlakpei.

⁹Che tuiiboom inthumsunga khatva thii in olsa, tuiiboom asuungah am akring kutseem inthumsunga inkhat thisei, mulipii inthumsunga inkhat ammaangpei.

¹⁰Inthumtihpi ringroi in amah pik ulta atumpei, che meiser nanga intle khalmo inrol arsi khat ringramnata tlasa, che mah khanna avaa in saruk inthumsunga khat mahche tuii dop anchungah tlasei.

¹¹Mah arsikhavaa akming “Aklungthing” antih; tui saruk inthumsunga inkhatvah aklungthing in olsa, che mii aktam tuiikhanna thisei alamva tuiikha amkhahpei.

¹²Manli tihpi ringroi in amah pik ulta atumpei che kini in inthumsunga inkhat, thla in inthumsunga inkhat mahche arsi in inthumsunga inkhat amratpei, chunna anmah avaarkho inthumsunga inkhat inthimsa; che suun in inthumsunga inkhat vaarnohsa; mah khananga khulouh in inthumsungsa inkhat vaarnohsa.

¹³Cheva keiin kimuh mahche ringram alaia juungnanga barmu inkhat in ahou suuk a trap a ason keiin kitheihpei, “Aktlei pik ul in ahoutrang khananga ringroi inthum inkho antumsam! Thaleiah am mii turella Lahnasa a, lahnasa a, Lahnansa a.”