Read Tarao Naga MADANGNA 9 Bible Online

MADANGNA 9 - Tarao Naga bible

MADANGNA 9

¹Mahche ranga tihpi amah pik ulta atumpei, che ringramnata arsi inkhat thaleichungah tla a kimuh, che adongna amnoh khurbaovaa chapi amah kuungah amlanpei;

²Che amah in adongna amnoh khurbaokha amhoongpei, che meipiina meikhu inthruhnanga abaonata meikhu inthruhsa; khurbao nata meikhu inthruh in kinikho marvaankho amthimpei.

³Che meikhu khannata khaoruungpii thaleichungah thlengsei, thaleina aitreh atuui am khananga ankuungah tuui amlanpei,

⁴Thaleichungah akmoong inlou nohle in em akmoong inlou nohle thingtalvah mamaangnoh natu anmah kuungah asonei, chuta tukhat amchalla Ringpu vaa chum innamnoh miikhopta mamaangnatu asonei;

⁵anmah in anmahta thatvanoh a, chuta thla ranga malah manangnatu amjapei, anmah in anlah annangkha aitreh in miita amreia asunna amlah nangsei.

⁶Mahni chunna mii in anthihnatu anjontu jonseilakho tiknikho anthihnatu tuuknohtuei; anmah in anthihjatu, che kthi in anmah kuungnata juunga sehtuei.

⁷Khaoruungpii anmeelva raal turella amichaang skol khananga anmah ankangah ra — ao nanga boorpii ankhum; anmah anmaivah miimainang,

⁸anmah ansam in kumei samnang, che anmah anha in saruungha nang;

⁹anmah anmeelva thirpho akoornang, anmah amithla ahouvah raaltloh akseh skol kari ahounang;

¹⁰Anmah in aitreh nangjimma anmeii ammei, anmeii khanna amreiikho ammei; anmah anmeii antuuivah miita thla ranga masok a amnat.

¹¹Adongna amnoh khurvah ringroi khanna anmah anchungah kurung veia paal amah akmingvah Hibru tronga Abadon che Kriik tronga Apolion tih a an ong.

¹²Matsahna lahna khavah aralpei anro, mah i aknula ralla lahna innih thlengumang.

¹³Cheva kuruk tihpi ringroi in amah pik ulta atumpei, che Ringpu amaikuungah am ra — ao vaa thiilkuungah aki manli nata roolhou khat keiin kitheihpei,

¹⁴Pik ul akchoi kuruk tihpi ringroita ason, “Khalmo inrol avaa Euphretis ah khit a asih ringroi manlikha mathlahro.”

¹⁵Chunna mahpung, akni, athla mahche akum kharella machaanga asih ringroi manlita mii inthumsunga inkhat thatnatu amthlahpei.

¹⁶Che skol raalmii akpul anmasing solh sopni ei; anmah anmasing chuta keiin kitheihpei.

¹⁷Kei kahamuh akhanna skolkha kimuh ei: akthou eiin mei lukhepho ansilh, meikhu saphiar, che salphar mahchu lukhepho che skol ankangah saruung ankangah che anmah anbaonata salphar meikhu che mei inthruh.

¹⁸Anmah anbaonata inthruh mei, meikhu mahche mei salphar mah inthum in miita saruk inthumsunga inkhat anthatpei.

¹⁹Alamva skol antuuivah anmah anbaoa mahche anmah anmeii ah am; anmah anmeiivah muruulnangei, che ankang am; che anmah ankang khanna miita amisok.

²⁰Natna rii in athatnoh mii anlei eita seitan mahche ra — ao, lupa, pithrai, lung khatkho thingah inseem leili mathruunnatu mathlah cheknoh ei, nohle anmah in mah leili ei i muhkho muhnoh ei, theihkho theihnoh ei mahche sehkho cheknoh ei.

²¹Anmah in miithat miisunnata, pootseem nata khatkho inru inraannata anril thlengnoh ei.