Read Tarifit Matta 1 Bible Online

Matta 1 - Tarifit bible

Matta 1

¹Wa ḏ lkitab n ȓejḏuḏ n Ƹisa Lmasiḥ, wenni iǧan zi ddurriṯ n Dawed ḏ Brahim.

²Brahim ijja-d Isḥaq. Isḥaq ijja-d Yaƹqub. Yaƹqub ijja-d Yahuḏa ḏ ayṯmas.

³Yahuḏa ijja-d Faris ḏ Zaraḥ ak ṯemɣarṯ nnes Ṯamra. Faris ijja-d Ḥaṣrun. Ḥaṣrun ijja-d Aram.

⁴Aram ijja-d Ƹaminadab. Ƹaminadab ijja-d Nassun. Nassun ijja-d Salmun.

⁵Salmun ijja-d Buƹazza ak ṯemɣarṯ nnes Riḥab. Buƹazza ijja-d Ƹubayd ak ṯemɣarṯ nnes Raƹuṯ. Ƹubayd ijja-d Yassa.

⁶Yassa ijja-d Dawed azeǧiḏ. Dawed azeǧiḏ ijja-d Suliman zi ṯenni tuɣa iǧan ḏ ṯamɣarṯ n Uryaḥ.

⁷Suliman ijja-d Raḥubƹam. Raḥubƹam ijja-d Abiya. Abiya ijja-d Asa.

⁸Asa ijja-d Yahucafaṭ. Yahucafaṭ ijja-d Yuram. Yuram ijja-d Ƹuzzaya.

⁹Ƹuzzaya ijja-d Yuṯam. Yuṯam ijja-d Aḥaz. Aḥaz ijja-d Ḥisqi.

¹⁰Ḥisqi ijja-d Manassa. Manassa ijja-d Amun. Amun ijja-d Yuciya.

¹¹Yuciya ijja-d Yakunya ḏ ayṯmas ḏi ȓweqṯ nni wami twasufɣen ɣar Babil.

¹²Menbaƹd i ȓweqṯ nni wami twasufɣen ɣar Babil, Yakunya ijja-d Cƹaltihil. Cƹaltihil ijja-d Zarubbabil.

¹³Zarubbabil ijja-d Abihud. Abihud ijja-d Lyaqim. Lyaqim ijja-d Ƹazur.

¹⁴Ƹazur ijja-d Ṣaduq. Ṣaduq ijja-d Axim. Axim ijja-d Alyud.

¹⁵Alyud ijja-d Lƹizar. Lƹizar ijja-d Mattan. Mattan ijja-d Yaƹqub.

¹⁶Yaƹqub ijja-d Yusef aryaz n Maryam nettaṯ iy d ijjin Ƹisa ig itwasemman s Lmasiḥ.

¹⁷Ḏinni arbeƹṭac n lʼajyal zi Brahim ɣar Dawed. Zi Dawed ḥetta wami twasufɣen ɣar Babil arbeƹṭac n lʼajyal. Zeg wami twasufɣen ɣar Babil ḥetta wami d ixȓeq Lmasiḥ arbeƹṭac n lʼajyal.

¹⁸Fa mammec iy d ixȓeq Ƹisa Lmasiḥ. Yemmas Maryam tuɣa ṯegga lxuṭuba ak Yusef. Menbaƹd qbeȓ ma aḏ meȓcen jarasen ṯeysi aƹeddis zi Arruḥ iqeddsen.

¹⁹Yusef anexḍab nnes, nican ig iǧa. War ixes ca axas iḍȓeq ddiƹaya, irezzu aḏas iǧef s ṯnufra.

²⁰Walakin wami itfekkar ḏi ṯmesȓayṯ nni, ṯbedd-d xas ijjen n lmalaʼika ḏi ṯirjiṯ ṯenna-as: "A Yusef a mmis n Ayṯ-Dawed, war teggweḏ ca aḏ tiȓi Maryam ḏ ṯamɣarṯ nnec. Aqa zi Arruḥ iqeddsen iy zi ṯeysi aƹeddis.

²¹Aqa aḏ d tejj ijjen n uḥenjir aṯ ṯsemmiḏ Ƹisa ȓaḥeqqac netta iy ɣa isnejmen ȓqum nnes zi ȓmuƹṣiyaṯ nsen."

²²Qa ḏ manaya marra ig iweqƹen ḥima aḏ ikemmeȓ wawaȓ iy inna Siḏi Arebbi i nnabi Icaƹya ḏeg yijjen n zman:

²³<Aqa ṯaƹzriṯ aḏ teysi aƹeddis, aḏ tejj ijjen n uḥenjir aḏas semman Immanwil.> (Ȓmaƹna nnes: Arebbi aqaṯ akiḏneɣ.)

²⁴Wami d ifaq Yusef zeg yiḍeṣ igga min ḏas ṯenna lmalaʼika n Siḏi Arebbi, yuwi-d ṯamɣarṯ nnes.

²⁵Walakin war ɣares iqarreb ca aȓ wami d ṯejja mmis. Ṯumma isemma-ṯ igga-as Ƹisa.