Read Tarifit Matta 13 Bible Online

Matta 13 - Tarifit bible

Matta 13

¹Nhar nni, iffeɣ Ƹisa zi ṯeddarṯ iqqim ṭṭarf n ȓebḥar.

²Munen-d xas aṭṭas n ȓɣaci. S zḥameṯ nni iruḥ inya ḏeg yijjen n ṯɣarrabut iqqim ḏayes. Iwḏan qqimen marra x cceṭṭ n ȓebḥar.

³Iqqar-asen aṭṭas n ṯmesȓayin s ȓemƹani inna-asen: "Ṣennṭeṯ! Iffeɣ ufeǧaḥ aḏ izreƹ.

⁴Wami izerreƹ, ṯewḍa-yas can zzarriƹeṯ x ṭṭarf n ubriḏ, usin-d ijḍaḍ ccin-teṯ.

⁵Can zzarriƹeṯ ṯewḍa-yas jar yizra war ḏinni bu caȓ aṭṭas. Ṯeɣmi-d ḏeɣya ȓaḥeqqac war ṯuǧiɣ ca ḏi ṯmurṯ aṭṭas.

⁶Walakin wami ṯsummar ṯfuct, ṯnezȓef ȓexddenni ṯisraw ȓaḥeqqac iẓewran nnes war uwṯin ca ɣar ȓaǧeɣ n ṯmurṯ.

⁷Can zzarriƹeṯ ṯewḍa jar isennanen. Ɣmin-d akiḏes isennanen nni jeyyfen-teṯ.

⁸Walakin can zzarriƹeṯ ṯewḍa x ṯmurṯ ṯaṣebḥant, ṯegga ṯiyḏerin. Ȓebƹaḍ ggint miyya, ȓebƹaḍ ggint settin, ȓebƹaḍ ggint ṯȓaṯin.

⁹Ṣenneṭ mliḥ a wenni itsȓan."

¹⁰Qarrben-d ɣares imeḥḍaren nnes nnan-as: "Mayemmi iy kisen ṯessawaȓeḏ s ȓemƹani?"

¹¹Indeq-d Ƹisa inna-asen: "Itwasmeḥ i kenniw aḏ tessnem min inuffaren ḏi ȓmulk ujenna. Walakin niṯni lla, war ḏasen itwasmiḥ ca.

¹²Ȓaḥeqqac wenni iǧan ɣares itmarni-yas, aɣares yiȓi aṭṭas. Walakin wenni war ɣar iǧi ca, itwaksi-yas uȓa ḏ min ɣares.

¹³X manaya iy kisen ssawaȓeɣ s ȓemƹani. Waxxa xezzaren, war twiȓin ca. Waxxa tesȓan, war tesȓin ca war fehhmen i ca.

¹⁴Amenni iy ḏasen itkemmaȓ wawaȓ n nnabi Icaƹya ig inna ḏeg yijjen n zman: <Cḥaȓ ma tesȓim war tefhimem, cḥaȓ ma ṯxezzarem war twiȓim.

¹⁵Ȓaḥeqqac ccaƹb-a, uȓ nnes iḏweȓ am azru, ƹȓayen war tesȓin walu, qqnen ṯiṭṭawin nsen. Ḥima war twiȓin ca s ṯiṭṭawin nsen, war tesȓin ca s imejjan nsen, war fehhmen ca s wuȓawen nsen, aɣari d ḏewȓen, aṯen sgenfiɣ.>[31]

¹⁶Walakin ssaƹd nwem kenniw wami ṯiṭṭawin nwem twaȓant, ssaƹḏ nwem wami imejjan nwem tesȓan.

¹⁷Aqa tesȓam ȓḥaqq: Aṭṭas n lʼanbiya ḏ ȓmuminin rzun aḏ ẓren min twaȓam, walakin war ṯ ẓrin ca. Rzun aḏ sȓen min ṯesȓam, walakin war ṯ sȓin ca.

¹⁸Iwa ṣennṭeṯ ȓmaƹna n ufeǧaḥ nni izerrƹen.

¹⁹Ijjen itsȓa i wawaȓ x ȓmulk ujenna war ṯ itefhim ca. Iƹni netta am zzarriƹeṯ nni ig iwḍan x ubriḏ. Itraḥ Uƹeffan nni n Ibȓis, itekkes awaȓ nni itwazerƹen ḏayes ḏeg wuȓ.

²⁰Zzarriƹeṯ nni ig iwḍan jar yizra nettaṯ am can bnaḏem ig itesȓan i wawaȓ n Arebbi iqbeȓ-iṯ s ȓefraḥeṯ.

²¹Wami war yuwṯi bu iẓewran mliḥ ḏeɣya tneqȓaƹen. Xmi d tasent can ȓemḥayen niɣ ḏ can uƹeddeb x ssabab n wawaȓ n Arebbi, ḏeɣya iteffeɣ abriḏ.

²²Zzarriƹeṯ nni ig iwḍan jar isennanen nettaṯ am yijjen n bnaḏem iy itesȓan i wawaȓ n Arebbi ḏayes amnus n ddunect, icemmeṯ-iṯ ṭṭmaƹ n wagȓa, ssenni itwajeyyef wawaȓ n Arebbi war ineffeƹ ca.

²³Walakin zzarriƹeṯ nni ig iwḍan ḏi ṯmurṯ ṯaṣebḥant nettaṯ am can bnaḏem ig itesȓan i wawaȓ n Arebbi, ifehhem-as itarew. Ijjen itarew miyya, ijjen settin, ijjen ṯȓaṯin."

²⁴Issiweȓ Ƹisa s yijjen n ȓmaƹna nneɣni inna-asen: "Ȓmulk ujenna igga am yijjen n uryaz izreƹ zzarriƹeṯ ṯaṣebḥant ḏeg umarjeƹ nnes.

²⁵Ijjen n ǧiȓeṯ wami ṭṭṣen marra iwḏan, yusa-d ȓaƹḏu nnes izreƹ zzarriƹeṯ n isennanen ak zzarriƹeṯ nni n yirḏan ȓexddenni yarweȓ.

²⁶Wami d gaƹƹḏen yirḏan ggin ṯiyḏerin, ȓexddenni gaƹƹḏen-d akiḏsen uȓa ḏ isennanen.

²⁷Usin-d ixeddamen nnan-as i bab n umarjeƹ: A siḏi, cek ṯzerƹeḏ zzarriƹeṯ ṯaṣebḥant ḏeg umarjeƹ nnec. Iwa manis ḏas d kkin isennanen-a?

²⁸Inna-asen: Can ȓaƹḏu ig iggin manaya. Nnan-as ixeddamen nnes: Ma ṯexseḏ a nraḥ a nekkes isennanen-a?

²⁹Inna-asen: Lla, bac war kiḏsen ṯqeǧƹem ca uȓa ḏ irḏan.

³⁰Jjeṯ irḏan aḏ mɣaren ak isennanen. Axmi d ɣa yaweḍ ȓweqṯ n umjar aḏasen iniɣ i icewwaren: Kkseṯ isennanen ḏ amezwaru smunem-ṯen ceddem-ṯen ḥima aḏ ḥarqen. Walakin irḏan jemƹem-ṯen awim-ṯen ɣar ṯesrafin inu."

³¹[32] Inna-asen Ƹisa ijjen n ȓmaƹna nneɣni: "Ȓmulk ujenna igga am yijjen n zzarriƹeṯ n yijjen n nnuƹ n arbiƹ qqaren-as bugarḏaȓ. Iysi-t ijjen n uryaz iẓẓu-t ḏeg umarjeƹ nnes.

³²Tiȓi nettaṯ ḏ ṯamezyant qaƹ x marra ṯiḥebba. Walakin xmi temɣar ṯḏewweȓ ktar zi marra arbiƹ. Ṯḏewweȓ ḏ ṯacejjarṯ, tasen-d yijḍaḍ teggen ḏayes ȓaƹwac nsen."

³³Inna-asen Ƹisa ijjen n ȓmaƹna nneɣni: "Ȓmulk ujenna am untun ṯeysi-ṯ yijjen n ṯemɣarṯ ṯuggwa zzayes ȓmudd n waren, antun nni isgaƹƹeḏ-iṯ-iḏ marra."

³⁴Qaƹ manaya inna-ṯ Ƹisa i yiwḏan s ȓemƹani. War kiḏsen issiwiȓ illa s ȓemƹani waha.

³⁵Ḥima aḏ ikemmeȓ wawaȓ iy inna Siḏi Arebbi i nnabi Icaƹya ḏeg yijjen n zman: <Akisen ssiwȓeɣ s ȓemƹani, aḏ sexbareɣ min innuffaren zeg wami ṯeǧa ddunect.>"[33]

³⁶Ijja Ƹisa ȓɣaci nni yuḏef ɣar ṯeddarṯ. Ȓexddenni usin-d ɣares imeḥḍaren nnes nnan-as: "Fesser-aneɣ ȓmaƹna n isennanen ḏeg umarjeƹ."

³⁷Indeq-d Ƹisa inna-asen: "Wenni izerrƹen zzarriƹeṯ ṯaṣebḥant netta ḏ Mmis n bnaḏem.

³⁸Amarjeƹ netta ḏ ddunect. Zzarriƹeṯ ṯaṣebḥant nettaṯ ḏ ṯarwa n ȓmulk ujenna. Isennanen niṯni ḏ ṯarwa n Uƹeffan nni n Ibȓis.

³⁹Ȓaƹḏu ig izerrƹen isennanen netta ḏ Ibȓis. Ȓweqṯ n umjar nettaṯ ḏ ȓefna n zman. Ixeddamen niṯni ḏ lmalaʼikaṯ.

⁴⁰Amecnaw mammec ismun ufeǧaḥ isennanen isḥerreq-iṯen ḏi ṯmessi, amenni iy ɣa ṯiȓi ȓefna n zman.

⁴¹Aḏ d issekk Mmis n bnaḏem lmalaʼikaṯ nnes, aḏ kksent zi ȓmulk nnes marra min itsebbaben ḏi ȓmuƹṣiyaṯ ḏ yinni iteggen ccarr.

⁴²Aṯen nḍaren ḏi ȓkuceṯ n ṯmessi mani ɣa iȓin imeṭṭawen ḏ uɣeẓẓaẓ n ṯeɣmas.

⁴³Walakin ȓmuminin aḏ cƹecƹen am ṯfuct ḏi ȓmulk n Babaṯsen. Ṣenneṭ mliḥ a wenni itsȓan.

⁴⁴Ȓmulk ujenna amecnaw ijjen n ȓkenz ixzen ḏi can umarjeƹ, yufi-ṯ can ḥadd iƹaweḏ isnuffar-iṯ. Uca s ȓefraḥeṯ nni iy ḏayes, izzenz marra min ɣares isɣa amarjeƹ nni.

⁴⁵Ȓmulk ujenna amecnaw ijjen n ttajar iy irezzu x jjuwhar aṣebḥan.

⁴⁶Wami yufa ijjen n jjuwhar iɣȓan, izzenz marra min ɣares isɣi-ṯ.

⁴⁷Ȓmulk ujenna amecnaw ṯracca inḍar-it ij ubeḥri ḏi ȓebḥar, ṯeṭṭef mkuȓ nnuƹ n usȓem.

⁴⁸Wami ṯƹemmar ṯracca sufɣen-t-id ibeḥriyen ɣar ṭṭarf n ȓebḥar. Qqimen, bḏan tixḍaren ggin iseȓman iṣebḥanen ḏi ṯsuǧaṯin, iseȓman iƹeffanen nḍaren-ṯen.

⁴⁹Ammu iy ɣa yiȓi nhar iy ḏi ɣa ifna zman: Aḏ d asent lmalaʼikaṯ aḏ fernent ȓkuffar zi ȓmuminin;

⁵⁰aṯen nḍarent ḏi ȓkuceṯ n ṯmessi mani ɣa iȓin imeṭṭawen ḏ uɣeẓẓaẓ n ṯeɣmas."

⁵¹Inna-asen Ƹisa i imeḥḍaren nnes: "Ma ṯfehmem marra manaya?" Nnan-as: "Wah a Siḏi."

⁵²Inna-asen: "Kuȓ amseȓmaḏ n Ccariƹa n Musa ig ifehmen ȓmulk ujenna netta am yijjen n bab n ṯeddarṯ ig isufuɣen ṯimesȓayin ṯiqḏimin niɣ ḏ jḏiḏ zi mani ixzen ȓkenz nnes."

⁵³Wami ikemmeȓ Ƹisa ȓemƹani nni, yuyur ssenni.

⁵⁴Iḏweȓ ɣar ṯmurṯ nnes ibḏa iseȓmaḏ ḏi ṯemziḏa nsen. Tƹejjben ḏayes nnan: "Mani yufa ȓefhameṯ-a iy ḏas immucen ḏ lmuƹjizaṯ-a?

⁵⁵Ma war iǧi ca wanita ḏ mmis n unejjar? Ma war iǧi yemmas ḏ Maryam? Ayṯmas ijjen qqaren-as Yaƹqub, ijjen ḏ Yusef, ijjen ḏ Simƹan, ijjen ḏ Yahuḏa ma lla?

⁵⁶Ma war ǧint ca suyṯmas aqaṯent akiḏneɣ ḏanita? Iwa manis ḏas d ikka marra manaya?"

⁵⁷X manayenni war ṯ qbiȓen ca. Ikkar Ƹisa inna-asen: "Nnabi meḥtarem mani ma, walakin ḏeg ubilaj nnes ḏ ṯeddarṯ nnes lla!"

⁵⁸Igga ḏinni Ƹisa ḏrus n lmuƹjizaṯ ȓaḥeqqac lʼiman nsen ḏ uqlil.