Read Tarifit Matta 16 Bible Online

Matta 16 - Tarifit bible

Matta 16

¹Usin-d ɣar Ƹisa ȓḥizeb n ifarrisiyen ḏ ȓḥizeb n iṣadduqiyen, ttaren zzayes ijjen n lƹalama ḏ ṯameqqrant zeg ujenna bac aṯ jarrben.

²Indeq-d Ƹisa inna-asen: "Ɣar ȓmeɣreb ṯeqqarem ṯiwecca aḏ yiȓi ljaw ḏ aṣebḥan ȓaḥeqqac ajenna ḏ azeggwaɣ.

³Ɣar ȓefjar ṯeqqarem: Nhara aḏ yiȓi unẓar ḏ wajjaj ȓaḥeqqac ajenna ḏ azeggwaɣ ḏayes aseynu[40] ḏ abercan. Lḥala n ujenna ṯessnem at tcerrḥem. Walakin lƹalamaṯ n zman-a lla, war ṯzemmarem aṯent tcerrḥem.

⁴Iwḏan iƹeffanen n ȓweqṯ-a ixeddƹen Arebbi tettaren lƹalama ṯameqqrant, walakin war ḏasen itmuci illa lƹalama nni n nnabi Yunes." Ssenni iruḥ ijji-ṯen.

⁵Wami uwḍen imeḥḍaren nnes ɣar ujemmaḍ-in n ȓebḥar ttun war kisen uwin ca aɣrum.

⁶Inna-asen Ƹisa: "Ɣarwem! Ḥḍam ixef nwem zeg untun[41] n lʼaḥzab n ifarrisiyen ḏ iṣadduqiyen."

⁷Ssiwȓen jarasen nnan: "Iqqar manaya ȓaḥeqqac war d nuwi bu uɣrum."

⁸Issen Ƹisa minxef tuɣa ssawaȓen inna-asen: "Kenniw lʼiman nwem ḏ uqlil. Mayemmi ṯeqqarem jarawem war ɣarneɣ bu uɣrum?

⁹Ma ƹaḏ war ṯefhimem? War ṯeƹqiȓem xemsa nni n ṯecnifin ig iseccen xemsaȓaf n iryazen, mecḥaȓ n ṯeqrabin iy ṯeccurem?

¹⁰War ṯeƹqiȓem sebƹa nni n ṯecnifin ig iseccen arbeƹaȓaf n iryazen, mecḥaȓ n ṯeqrabin iy ṯeccurem?

¹¹Mammec ṯeggim war ṯefhimem? Nec war ssiwiȓeɣ ca x uɣrum. Ḥḍam ixef nwem zeg untun n lʼaḥzab n iṣadduqiyen ḏ ifarrisiyen."

¹²Ȓexddenni ƹaḏ iy fehmen imeḥḍaren belli war ḏasen issiwiȓ ca x untun n uɣrum; Lla, inna-asen: Ḥḍam ixef nwem zi min seȓmaḏen ifarrisiyen ḏ iṣadduqiyen.

¹³Wami yuweḍ Ƹisa ɣar jjiheṯ n ṯendint n Qayṣariya n Filippas, isseqsa imeḥḍaren nnes inna-asen: "Min qqaren yiwḏan x Mmis n bnaḏem?"

¹⁴Nnan-as: "Ijjen iqqar cek ḏ Yaḥya,[42] ijjen iqqar cek ḏ Ilyas, ijjen iqqar cek ḏ Irmiya niɣ ḏ can yijjen zi lʼanbiya."

¹⁵Inna-asen Ƹisa i imeḥḍaren nnes: "Y kenniw, min ḏayi d tarram nec?"

¹⁶Indeq-d Simƹan Buṭrus inna-as: "Cek ḏ Lmasiḥ, Mmis n Arebbi iddaren."

¹⁷Ȓexddenni inna-as Ƹisa: "Ssaƹḏ nnec a Simƹan a mmis n Yuna! War iǧi bu ḏ ca n bnaḏem iy ḏac d ismeḍharen manaya menɣir Baba iǧan ḏeg ujenna.

¹⁸Nec ƹaweḏ aqa qqareɣ-ac: Cek ḏ Buṭrus, iƹni ḏ 'Azru.' X uzru-ya aḏ bniɣ nec jmaƹṯ n ȓmuminin inu, ṯiwwura n Ljaḥim war zzayes tiwint walu!

¹⁹Aḏac uceɣ ȓemfataḥ n ȓmulk ujenna. Min ɣa ṯceddeḏ ḏi ṯmurṯ aḏ yiȓi itwacedd ḏeg ujenna. Min ɣa ṯerzmeḏ ḏi ṯmurṯ aḏ yiȓi itwarzem ḏeg ujenna."

²⁰Ȓexddenni Ƹisa iweṣṣa imeḥḍaren nnes inna-asen war qqarem i ḥadd belli nec ḏ Lmasiḥ.

²¹Ssenni ibḏa Ƹisa isfehham i imeḥḍaren nnes belli labud aḏ iraḥ netta ɣar ṯendint n Lquds aḏ itwaƹeddeb x waṭṭas n ṯmesȓayin x ufus n imeqqranen n Ayṯ-Israʼil ḏ arruyas n ȓfuqaha ḏ imseȓmaḏen n ccariƹa. Aṯ nɣen, wis ṯeȓtiyyam aḏ d itwasekkar zi ȓmewṯ."

²²Isbeƹƹeḏ-iṯ Buṭrus waḥḏes inha-ṯ inna-as: "Ac iḥfeḍ Arebbi a Siḏi! Ƹemmarṣ war ḏac itewqiƹ manaya."

²³Walakin Ƹisa ineqȓeb-d ɣar Buṭrus inna-as: "Aggwej xafi ɣar ḏeffar a Cciṭan! Cek am yijjen n uzru ḏeg ubriḏ inu tneqȓaḏeɣ ḏayes. Cek war tfekkareḏ ca amecnaw Arebbi; Lla, cek tfekkareḏ amecnaw bnaḏem."

²⁴Ssenni issiweȓ Ƹisa ak imeḥḍaren nnes inna-asen: "Wenni ixsen aḏayi iḏfar nec, labud aḏ ismeḥ ḏeg yixef nnes aḏ ikessi ṣṣalib nnes[43] aḏayi iḏfar.

²⁵Ȓaḥeqqac wenni ixsen aḏ isenjem ṯuḏarṯ nnes ataf at ixsar. Wenni ɣa ixsaren ṯuḏarṯ nnes x ssabab inu ataf at yaf.

²⁶Minzi ɣa infeƹ bnaḏem meȓa irbeḥ ddunect-a qaƹ wa ixsar ȓaƹmar nnes? Min ɣa yuc bnaḏem ḏeg umcan n ȓaƹmar nnes?

²⁷Aqa Mmis n bnaḏem aḏ d yas s lƹaḍama n Babas ak lmalaʼikaṯ nnes, uca aḏ ijaza mkuȓ ijjen ƹlaḥsab ȓxeḏmeṯ nnes.

²⁸Aqa tesȓam ȓḥaqq: Ȓebƹaḍ zeg yinni iǧan ḏa akiḏi war tmettin ca aȓ ɣa ẓren Mmis n bnaḏem yusa-d ḏi ȓmulk nnes."