Read Tarifit Matta 17 Bible Online

Matta 17 - Tarifit bible

Matta 17

¹Ṯeƹḏu settiyyam, Ƹisa yuwi akiḏes Buṭrus ḏ Yaƹqub ḏ wumas Yuḥanna, yuwi-ṯen waḥeḏsen ɣar yijjen n uḏrar yuƹȓa.

²Ḏinni zzaṯ i ṯiṭṭawin nsen iḏweȓ am yijjen n nnur, aɣembub nnes itceƹciƹ am ṯfuct. Iḏweȓ warruḍ nnes ḏ acemȓaȓ ireqq am ṯfawṯ.

³Imeḍhar-asen-d ḏinni nnabi Ilyas ḏ nnabi Musa. Twaȓan-ṯen ssawaȓen ak Ƹisa.

⁴Indeq-d Buṭrus inna-as i Ƹisa: "A Siḏi, ḏ aṣebḥan akiḏec neqqim ḏanita. Meȓa ṯexseḏ, aḏ ggeɣ ṯȓaṯa n iqiḍan: ijjen i cek, ijjen i Musa, ijjen i Ilyas."

⁵Ƹaḏ issawaȓ Buṭrus ihwa-d xasen yijjen n useynu itseqsiq. Ṯendeq-d ijjen n ṯmijja zeg useynu nni ṯenna-asen: "Qa ḏ wanita ḏ Mmi iƹizzen, nec farḥeɣ zzayes. Ṣennṭeṯ ɣares."

⁶Wami sȓin imeḥḍaren ṯmijja nni ggwḏen sejjḏen ɣar ṯmurṯ.

⁷Iqarreb ɣarsen Ƹisa iḥaḏa-ṯen inna-asen: "Kkarem war teggwḏem ca."

⁸Ysin ṯiṭṭawin nsen ɣar ujenna war ufin ḥadd illa Ƹisa.

⁹Wami d hewwan zeg uḏrar iweṣṣa-ṯen Ƹisa inna-asen: "War tƹawaḏem i ḥadd min ṯeẓrim aȓ d ɣa ikkar Mmis n bnaḏem zi ȓmewṯ."

¹⁰Sseqsan-ṯ imeḥḍaren nnes nnan-as: "Mayemmi imseȓmaḏen n ccariƹa qqaren itxeṣṣa nnabi Ilyas aḏ d yas netta ḏ amezwaru?"

¹¹Inna-asen Ƹisa: "Ḏ ṣṣaḥ, itxeṣṣa aḏ d yas Ilyas aḏ iƹḏeȓ kuȓci.

¹²Walakin qqareɣ-awem: Aqa Ilyas nni yusa-d niṯni war ṯ ssinen ca, xeḏmen ḏayes min xsen. Amenni iy ɣa ƹeddben Mmis n bnaḏem."

¹³Uca fehmen imeḥḍaren belli issawaȓ-asen x Yaḥya wenni itṭehharen s waman.

¹⁴Wami d ḏewȓen ɣar ȓɣaci, iqarreb ijjen n uryaz ɣar Ƹisa iwḍa x ifadden zzaṯ nnes.

¹⁵Inna-as: "A Siḏi rḥem-ayi memmi, ijjen n jjenn itƹeddab-iṯ aṭṭas. Aṭṭas n ṯwaȓaṯin itweṭṭa ḏi ṯmessi niɣ ḏeg waman.

¹⁶Uwiɣ-ṯ-iḏ ɣar imeḥḍaren nnec walakin niṯni war zemmaren aṯ sgenfan."

¹⁷Indeq-d Ƹisa inna-asen: "A iwḏan n ȓweqṯ-a iy ḏi war iǧi bu lʼiman, a yinni iffɣen abriḏ! Mecḥaȓ iy kiḏwem ɣa qqimeɣ u mecḥaȓ ḏawem ɣa ṣbareɣ? Awim-ayi-ṯ-id ḏa."

¹⁸Ƹisa isbedd jjenn nni aƹeffan, iffeɣ zeg uḥenjir nni igenfa ḏi ṯsaƹƹat nni.

¹⁹Qarrben-d imeḥḍaren ɣar Ƹisa waḥḏes nnan-as: "Mayemmi zaƹma neccin tuɣa war nzemmar aṯ nsufeɣ?"

²⁰Inna-asen Ƹisa: "Ȓaḥeqqac lʼiman nwem ḏ uqlil. Aqa tesȓam ȓḥaqq: Mȓi ḏaywem lʼiman ɣir anect ijjen n ṯḥebbuct n bugarḏaȓ,[44] aḏ tinim i uḏrar-a: Neqȓeƹ-d cek ssanita ruḥ ɣar ḏiha ataf aḏ d ineqȓeƹ. War xawem iteqsiḥ walu.

²¹{Nnuƹa-ya n jjenn aṯ tsufɣem ɣir s ṯẓaǧiṯ ḏ uẓummi.}"

²²Imeḥḍaren nnes wami d munen akiḏes ɣar ṯmurṯ n Ljalil ikkar Ƹisa inna-asen: "Ƹȓayen aḏ itwasellem Mmis n bnaḏem ɣar ifassen n yiwḏan.

²³Aṯ nɣen, nhar wis ṯeȓtiyyam aḏ d itwasekkar." Ȓexddenni xeyyqen imeḥḍaren s waṭṭas s wawaȓ nni.

²⁴Wami yuweḍ Ƹisa ḏ imeḥḍaren nnes ɣar ubilaj n Kafernaḥum, usin-d yinni ijemmƹen ḍḍariba i ṯemziḏa ṯameqqrant. Qarrben ɣar Buṭrus nnan-as: "Ma war itxeǧis ca lmuƹallim nwem ḍḍariba n ṯemziḏa ṯameqqrant?"

²⁵Inna-asen Buṭrus: "Wah, itxeǧas-it." Wami yuḏef Buṭrus ɣar ṯeddarṯ, Ƹisa izwar-as s wawaȓ inna-as: "Min ḏac imeḍharen a Simƹan? Uw ɣa ixeǧsen ȓaƹcur niɣ ḍḍariba i izeǧiḏen n ṯmurṯ, ma ḏ ṯarwa nsen niɣ ḏ iwḏan ƹadi?"

²⁶Inna-as Buṭrus: "Iwḏan ƹadi." Inna-as Ƹisa: "Iwa ṯarwa nsen war txeǧisen ca baƹda.

²⁷Walakin itxeṣṣa war nesxeyyeq ḥadd. Ruḥ ɣar ȓebḥar nḍar ṯiṣennarṯ ḏeg waman, asȓem nni iy ɣa ṯeṭṭfeḏ ḏ amezwaru, rzem-as aqemmum aḏayes ṯafeḏ ijjen n ṯpeyyast n nnuqarṯ. Ysi-t uc-asen-t, xeǧes xac ḏ xafi."