Read Tarifit Matta 18 Bible Online

Matta 18 - Tarifit bible

Matta 18

¹Ḏi ṯsaƹƹat nni qarrben-d imeḥḍaren ɣar Ƹisa nnan-as: "Ug iǧan qaƹ ḏ ameqqran ḏi ȓmulk ujenna?"

²Iȓaɣa-d Ƹisa x yijjen n uḥenjir ḏ amezyan, isbedd-iṯ ḏi ȓwesṭ nsen.

³Inna-asen: "Aqa tesȓam ȓḥaqq: Labud i kenniw aḏ tḏewȓem aḏ tiȓim amecnaw iḥenjiren imezyanen. Meȓa lla, ataf ƹemmarṣ aḏ taḏfem ḏi ȓmulk ujenna.

⁴Wenni isemzayen ixef nnes amecnaw aḥenjir-a, ḏ netta iy ɣa yiȓin ḏ ameqqran qaƹ ḏi ȓmulk ujenna.

⁵Wenni ɣa iqebȓen can uḥenjir am wanita ƹlaḥsab isem inu, axmi ḏ nec ig iqbeȓ.

⁶Wenni iy ɣa yawin ijjen zeg imezyanen-a iy zzayi itamnen ɣar ȓmuƹṣiyeṯ, ḥsen i netta aḏas cedden ijjen n uzru n ṯsirṯ s usɣun ɣar yiri nnes aḏ itwaɣreq ḏi ȓaǧeɣ n ȓebḥar.

⁷Ya tamara n yiwḏan x ssabab n ṯmesȓayin itawin ɣar ȓmuƹṣiyeṯ. Ṯimesȓayin nni aḏ d asent, walakin ya tamara n bnaḏem nni ig iteggen manayenni!

⁸Cek fus nnec niɣ ḍar nnec meȓa itsebbab-ac ḏi can ȓmuƹṣiyeṯ, qess-iṯ zaƹma nḍar-iṯ. Ḥsen i cek aḏ taḏfeḏ jjenneṯ s yijjen n ufus niɣ s yijjen n uḍar zi meȓa qqimen ɣarek ṯnayen n ifassen niɣ ṯnayen n iḍaren aḏ tmenḍareḏ ḏi ṯmessi iy war ixessin ca ƹemmarṣ.

⁹Cek ṯiṭṭ nnec meȓa tsebbab-ac ḏi can ȓefḍiḥeṯ, qȓeƹ-it zaƹma nḍar-it. Ḥsen i cek aḏ taḏfeḏ jjenneṯ s yijjen n ṯiṭṭ zi meȓa qqiment ɣarek ṯnayen n ṯiṭṭawin aḏ tmenḍareḏ ḏi jahennama n ṯmessi.

¹⁰Ɣarwem aḏ tḥeggarem can ḥadd zeg imezyanen-a. Qqareɣ-awem: Lmalaʼikaṯ nsen ḏeg ujenna ȓebda xezzarent Baba iǧan ḏeg ujenna.

¹¹{Liʼanna Mmis n bnaḏem yusa-d aḏ inejja yinni iweddaren.}

¹²Min ḏawem imeḍharen? Ijjen ɣares miyya n iḥuȓiyen. Meȓa iweddar-as ijjen zzaysen, ataf aḏ ijj tesƹa u tesƹin ḏeg uḏrar aḏ iraḥ aḏ irzu x wenni iweddaren.

¹³Aqa tesȓam ȓḥaqq: Meȓa yufi-ṯ, ataf azzayes ifareḥ ktar zi min ɣa ifareḥ x tesƹa u tesƹin nni war iweddaren ca!

¹⁴Amenni uȓa ḏ Babaṯwem iǧan ḏeg ujenna war ixes uȓa ḏ ijjen zeg imezyanen-a aḏ iweddar.

¹⁵Meȓa ixḍa akiḏec wumac, ruḥ ɣares nha-ṯ ɣir cek ḏ netta ɣir s ṯnayen iḏwem. Meȓa igg-ac array, ataf aḏ tiȓiḏ mliḥ ƹaweḏ ak wumac.

¹⁶Walakin meȓa yugi aɣarek iṣenneṭ, awi akiḏec ijjen niɣ ṯnayen ḥima ataf lɣaleṭ nnes ssnen-ṯ ṯnayen niɣ ṯȓaṯa n ȓechuḏ.[45]

¹⁷Walakin meȓa yugi aɣarsen iṣenneṭ, ini-ṯ i jmaƹṯ n ȓmuminin. U meȓa yugi aɣarsen iṣenneṭ, ḥseb-iṯ ḏ ȓkafer niɣ ḏ axeddaƹ.[46]

¹⁸Aqa tesȓam ȓḥaqq: Marra min ɣa ṯceddem ḏi ṯmurṯ ataf aḏ yiȓi itwacedd ḏeg ujenna. Marra min ɣa ṯerzmem ḏi ṯmurṯ ataf aḏ yiȓi itwarzem ḏeg ujenna.

¹⁹Qqareɣ-awem ƹaweḏ: Meȓa ṯtafqem ṯnayen zzaywem x ṯmurṯ ṯettarem can ȓḥajeṯ i Baba iǧan ḏeg ujenna, ataf aḏawem t istajeb.

²⁰Ȓaḥeqqac mani ɣa munen ṯnayen niɣ ṯȓaṯa x ssabab inu, nec aȓ ḏin iȓiɣ ḏi ȓwesṭ nsen."

²¹Ȓexddenni iqarreb Buṭrus ɣar Ƹisa inna-as: "A Siḏi, cḥaȓ n ṯwaȓaṯin iy kiḏi ɣa ixḍa wuma bac aḏas semḥeɣ? Ma sebƹa n ṯwaȓaṯin?"

²²Inna-as Ƹisa: "Lla, war iǧi bu sebƹa n ṯwaȓaṯin, aḏac iniɣ sebƹin uweṯ-it ḏi sebƹa n ṯwaȓaṯin!

²³Ȓaḥeqqac ȓmulk ujenna itawi-d ḏeg yijjen n uzeǧiḏ irezzu aḏ igg ȓeḥsab ak ixeddamen nnes.

²⁴Wami ibḏa ḏi ȓeḥsab, uwin-d ɣares ijjen ḏayes aṭṭas n umarwas, am ƹecra aȓaf milyar.

²⁵War ɣares minzi ɣa yarr amarwas-a, iweṣṣa siḏes aḏ immenz netta ḏ ṯamɣarṯ nnes ḏ ṯarwa nnes ḏ marra min ɣares ḥima aḏ ixeǧes amarwas nni.

²⁶Yusa-d uxeddam nni isejjeḏ-as i siḏes inna-as: Ahya a siḏi, ṣbar xafi. Aḏac xeǧseɣ marra min ḏayi tarseḏ.

²⁷Ȓexddenni iqqes-as i siḏes iḏȓeq-as, ismeḥ-as ḏeg umarwas nni.

²⁸Iffeɣ uxeddam nni yufa ijjen nneɣni zeg ixeddamen, tuɣa itares-as cwayt waha, am yijjen n milyun. Iṭṭef-iṯ ibḏa itjeyyaf-iṯ iqqar-as: Xeǧes-ayi min ḏac tarseɣ!

²⁹Iwḍa-yas umeddukeȓ nnes ɣar iḍaren inna-as: Ṣbar xafi cwayt ac xeǧseɣ.

³⁰Yugi, iruḥ netta inḍar-iṯ ḏi ȓeḥbes aȓ ɣa ixeǧes amarwas nnes.

³¹Ẓrin yinni kis ixeddmen min iweqƹen, iqqes-asen ȓḥaȓ ruḥen ɣar siḏiṯsen ƹawḏen-as min iweqƹen.

³²Ikkar iȓaɣa-yas-d siḏes inna-as: Ay axeddam aƹeffan, mayemmi? Nec semḥeɣ-ac ḏi marra min ḏac tarseɣ ȓaḥeqqac ṯettareḏ-ayi.

³³Ȓa ḏ cek tuɣa itxeṣṣa-cek aḏ treḥmeḏ ameddukeȓ nnec amecnaw mammec c reḥmeɣ uȓa ḏ nec."

³⁴Iɣḍeb siḏes s waṭṭas isellem axeddam nni ɣar yinni iy ṯ ɣa iƹeddben aȓ ɣa ixeǧes marra min ḏayes ḏ amarwas.

³⁵Ammu iy kiḏwem ɣa igg Baba iy iǧan ḏeg ujenna meȓa war ismiḥ mkuȓ ijjen zzaywem s wuȓ nnes i wumas.